Кітап – бүкіл әлемнің жаңалығы жасырынған адамзаттың азығы. Кітап оқымау деген сөз тұлға ретінде бір орыннан жылжымай, дамуды тежейтін фактор. Әлемнің барлық танымал адамдары, оның ішінде ғылымға жаңалық енгізген ғалымдардың бәрі де кітап нәрімен сусындаған. Өздері де келер ұрпаққа ашқан ғылыми жаңалықтарын жазып қалдырып, жаңа буынның дамуына әсер ете білді. Демек, кітаптың қасиеті төмендемейді, керісінше уақыт жылжыған сайын буындар алмасуымен түрлі кітаптар жарыққа шығады.
Қазақ халқында ұлтымыздың көзін ашып, ағартушылықпен айналысқан ұлт перзенттері жетерлік. Ұл мен қызды қатар білімге шақырып, ұлтымыздың болашағы үшін білім алу керектігін, адамзаттың даму жолын насихаттаған өмірден өткен қаншама ғұламаларымыз бар. Бір өзі бір кітапқа татитын Абайдың өлеңдері, қара сөздері рухани азық. «Пайда ойлама, ар ойла, талап қыл артық білуге. Артық ғылым кітапта, ерінбей оқып көруге» деген ұлы Абайдың өлеңінен кітаптың маңыздылығын байқауға болады.
Оқырманның жақсы көңіл-күйде ілім алуына әсер ететін, қызыққа толы кітапты ұсынатын – кітапханашылар қауымы. Мектеп кітапханасы, кітап орталықтарындағы кітапханашылардың бәрі де оқырмандар үшін талмай қызмет етуде. Қазіргі таңда адамдардың кітапқа деген қызығушылығының артуына жұмыс жасап жүрген кітапханашылар көп. Облысымыздағы кітапханашылардың білім алмасуы мақсатында Қызылорда қаласындағы Т.Есетов атындағы №264 мектеп-лицейінде «Кітапхана озық тәжірибе зертханасы» тақырыбында облыстық білім басқармасы мен оқу орталығының ұйымдастыруымен облыстық тәжірибе алаңы өткізілді.
Облыстық білім басқармасының басшысы Мейрамбек Шермағанбет, барлық аудандардағы білім бөлімінің әдіскерлері мен кітапханашылар қатысқан тәжірибе алаңында өзара тәжірибе алмасты. «Оқуға құштар мектеп» жобасы аясында жасалып жатқан жұмыстарға Мейрамбек Зинабдинұлы тоқталып өтті. Сондай-ақ, кітапханашылардың кәсіби шеберлігін шыңдайтын, балалар мен жасөспірімдер арасында кітап оқуды әдетке айналдыру керектігін мақсат еткен тәжірибе алаңында барлық қатысушыларға сәттілік тіледі.
— Кітап — адамзат баласының баға жатпес асыл қазынасы. Балаларды кітап оқуға баулу мәселесі күн тәртібінен түскен емес. Биыл осы мақсатта облыстық бюджеттен бөлінген 120 миллион теңгеге 70 аталым бойынша 30 мыңнан астам көркем әдебиет алынған. Бұл оқушыларымыздың кітапқа деген қызығушылығын оятуға және “Оқуға құштар мектеп” жобасын тиімді жүргізуде өз септігін тигізетін болады, — деді басқарма басшысы.
Шара соңында қатысушылар кітапханашылар арқылы кері байланыс жасап, болашақта аталған семинардан алған тәжірибелерді, әдіс-тәсілдерді өз жұмыстарына енгізетінін айтып, алғыстарын білдірді. Семинардан ой түйіп тарасты.
Облысымыздағы мектеп оқушыларының білімді болып, олардың кітап сөрелеріндегі кітаптарды қызығушылықпен алып, кітап оқуды күнтізбелеріне енгізуге атсалысып жүрген кітапханашылардың жұмысы орасан зор. Жасөспірімдердің кітапқа қызығушылығын дамыту олардың интеллектуалды деңгейін де көтереді. Алдағы уақытта да кітап оқу бағытында түрлі семинарлар өткізіліп, ойлы оқырмандардың көбеюіне септігі тиетініне кәміл сенеміз.
Қ.МАТАЙ
