Мектепке дейінгі тәрбие мен оқыту мекемелері еліміздің ертеңі, өсіп келе жатқан жас ұрпақтың балауса көңілдеріне жылу мен қуаныш, бүлдіршіндердің балалық шағына шат-шадыман шаттық сыйлайтын тәлім мекені. Білімді, жан-жақты қабілетті ұрпақ – ұлтымыздың баға жетпес қазынасы.
Қоғамда болып жатқан әлеуметтік-экономикалық өзгерістер мен еліміздің білім беру саласының әлемдік білім кеңістігіне өтуі білім беру саласында, соның ішінде мектепке дейінгі тәрбиелеу мен оқытуға уақыт талабына сай өзгерістерді енгізуді талап етіп отыр.
Бүгінде біз мектепке дейінгі тәрбие мен оқытуды дамыту моделін басшылыққа ала отырып жұмыс жасап келеміз. Дені сау, дербес, білуге құмар, сын тұрғысынан ойлай алатын балаларды қалыптастыру мақсатын ойын арқылы іске асырудамыз. Бала өміріндегі мектепке дейінгі тәрбиелеу мен оқыту тәсілінің іс әрекетінен әр баланың жеке ерекшеліктері мен қызуғушылығы және қажеттіліктерін ескере отырып, баланың әлеуетін барынша дамытуға жағдай жасап отырмыз. Педагогтың алдын ала жоспарлаған әрекеттерін орындап қана қоймай, баланың қызығушылығына көңіл бөліп, бала өзі таңдаған күнді белсенділік түріне қарай жоспарлауды жүзеге асырып жатырмыз. Ол үшін педагог үнемі біліктілігін көтеріп, ізденімпаз, шығармашыл болуы тиіс және ата-аналармен бірігіп серіктес ретінде жұмыс жасау керек.
Білім беру саласындағы оның ішінде мектепке дейінгі тәрбие мен оқыту ұйымдарына қатысты басты жаңалықтың бірі бүгінде лицензиялау тақырыбы болып отыр. Балабақшаларды лицензиялау олардың жұмысын жақсартады деп есептеймін және лицензиялауды қолдаймын. Қазіргі таңда сапаны көтеру ең маңызды мәселе және осы мәселені шешудің бірден-бір жолы ол – лицензиялау.
Биылғы оқу жылында мектепке дейінгі білім беру саласында енгізіліп отырған айшықты жаңалықтар, өзгерістер өте көп. Мен жаңашылдықты қолдаймын. Бүгінгі таңда «Сыр бөбегі» бөбекжай бақшасының педагогтері толық жаңартылған білім мазмұнына байланысты біліктілікті арттыру курстарынан өтті. Баланың негізгі әрекеті мен дамытудың негізгі құралы ойын арқылы балаларды тәрбиелеу мен оқытуды қолданып келеміз. Тәрбиеленушілерге еркіндік беріп, бірге ойнау және еңбек әрекеті дағдыларын, тазалықты, тәртіптілікті, ұйымшылдықты, ойлауды, қабылдауды, сурет салуды және басқа да дағдыларды меңгертуіміз ойын нысанында жүзеге асылырылуы өзінің тиімділігін көрсетіп отыр.
Биылғы оқу жылы біздің мекеме үшін тағы бір жағымды жаңалықпен басталмақ. Қызылорда облыстық оқу орталығының жетекшілігімен біздің ұйым үлкен тәжірибе. «Жасыл бөбекжай-бақша» жобасы – экологиялық тәрбие мен білім берудің заманауи құралы. «Жасыл Қазақстан» ұлттық жобасының негізгі 7 бағытын ұстана отырып жұмыс жасаудамыз. Қазірде тәрбиеленушілердің табиғатқа құндылық қатынасын қалыптастыруға, тәрбие мен білім берудің экологиялық бағыттылық деңгейін арттыруға, қоршаған ортаны қорғау және табиғи ресурстарды тиімді пайдалану мәлелері бойынша тәрбиеленушілердің хабардар болуына, өскелең ұрпақтың табиғатқа жауапты көзқарасын тәрбиелеуге, экологиялық сауатты мінез-құлықты қалыптастыруға бағытталған кешенді тәрбие мен білім беру жобасы ретінде жүзеге асып келеді.
Жаңа Қазақстанда заманға лайық жаңа білім беру процесін іске асыруда мектепке дейінгі ұйымдарда қолданылатын тиімді технологиялар мен әдіс-тәсілдерді пайдалану өз жемісін беретіні сөзсіз. Бүгінгі таңға біздің мақсатымыз – әлемдік білім беру жүйесінен қалмай, озық отандық жүйені қалыптастыру.
Мектепке дейінгі мекеме балаларына үздіксіз тәрбие мен білім беру келешек ұрпақтың еркін дамуына, жан-жақты білім алуына, белсенді, шығармашыл болуына тікелей әсер ететін – балабақша мен тәрбиешілері. Осыған орай мектепке дейінгі мекемелердің тәжірибесіне оқыту мен тәрбиелеудің әртүрлі технологиялары енгізілуде. Мәселен, ынтымақтастық педагогикасы, білім беруді ізгілендіру, ойын арқылы оқыту, түсіндіре басқарып оза оқыту, өздігінен оқыту, сын тұрғысынан ойлауды дамыту, оқытудың компьютерлік технологиясы, психологиялық, педагогикалық әдістемелік білімді, педагогикалық шеберлікті, балалардың жан-дүниесіне терең үңіліп, оны ұғына білуді талап етеді.
Мектепке дейінгі шақ – адам өміріндегі ең маңызды кезең. Өйткені осы кезде баланың бойындағы табиғи дарындылық жан-жақты дами бастайды. Осы шақта балалармен жан-жақты дамытушылық әрекеттер жүйелі жүргізілсе, жұмыс соншалықты нәтижелі болады. Тәрбиелі, білімді ұрпақ балабақшадан мектепке дайын шәкірт болып шығады. Балабақша барлық тәрбие мен білімнің ең алғашқы баспалдағы іспеттес. Мұндағы тәрбие мен білім балалардың табиғи мінезін, қабілетін ерте жастан дамытады. Бала – болашағымыз, бала – қуанышымыз. Ендеше мектепке дейінгі үздіксіз тәрбиемен, біліммен қамту өзімнің басты мақсаттарымның бірі екенін қуана айта аламын.
Зағи ЕСҚАЛИ,
«Сыр бөбегі» бөбекжай бақшасы меңгерушісі
