Кітап оқу жастардың әдетіне айналуы тиіс

Кітап – рухани мұра сақтайтын қойма. Дүниенің, әлемнің құпиясының жиынтығын кітаптан табасыз. Надандықтан арылтып, саналы адамның қатарына қосуда кітаптың үлесі зор. Жалғанның тылсымын адамдарға таныстырып, ізденіп, мәлімет жинаған ерте кездегі ғалымдардың ғылымдағы жетістіктері кітап беттерінде сайрап тұр. «Егер сіз кітап оқымасаңыз, демек өз кітабыңызды таппағаныңыз» деген секілді, өзіне қажетті кітаппен кездеспей, адасып жүрген адамдар жетіп жатыр. Бұрынғы ғалымдардың ашқан жаңалықтары қазіргі күні толыққанды өмір сүруге лайықты мәлімет береді деп, кесіп-пішу қиын. Әлі де ашылмай, ізденісті талап ететін дүниенің құпиялары жетерлік.

Қазіргі таңда оқырман қаншалықты кітап оқып жүр? Кітаптан өз керегін алып жүр ме? Телефонға телміріп, компьютерлік ойындарға көз жанарын құрбан етіп жүрген жастарға үгіт-насихат жүргізген дұрыс. Жасөспірімдер тұрмақ, үлкендердің де әлеуметтік желіге белсене кірісіп, кітап дүниесінің кереметтерімен көрмей жүргені белгілі. Бірақ, жастарды кітапқа баулу оң нәтиже беретіні, болашақты жастардың жасайтынын ұмытпағанымыз жөн.

Ел Президенті Қ.Тоқаевтың: «Кітап оқу арқылы әлемге деген қызығушылық мектеп қабырғасынан қалыптасуы тиіс» деген сөзі бүгінгі күні өзекті. Мектеп қабырғасында оқушылардың қызығушылығын арттырып, оларға кітапты таныстырып, санаға тоқып оқуды дәріптейтін шаралар өткізген дұрыс. Оқушылардың қабылдауы қарқынды жүзеге асып, тез қабылдайтыны себебінен пайдалы іс-шаралар көптеп өткізу күн тәртібінен түспеуі тиіс.

Әдеби кітаптар оқу арқылы шығарманың толқынымен жүзіп, әсер алуға болады. Кітап оқу – мәдениеттіліктің жоғарғы көрінісі. Ой-өріс кеңейіп, сөйлеу қабілетін, еске сақтауды да дамытады. Осы орайда Б.Момынбаев атындағы №278 ақпараттық-тахнология мектеп-лицейі базасында Қызылорда қаласы бойынша білім бөлімінің ұйымдастыруымен «Қазіргі уақыт талабы – өскелең ұрпақ бойында кітап өқуға деген құштарлықты қалыптастыру» тақырыбында облыстық тәжірибелік семинар өтті. Қызылорда қаласы бойынша білім бөлімінің басшысы Ерлан Боданов пен облыстық оқу орталығының директоры Сырым Асқаров шараға қатысып, қатысушы қонақтарға сәттілік тіледі.

– Б.Момынбаев атындағы №278 IT мектеп-лицей қаламыздағы маңдайалды мектептердің бірі. Облысқа іссапармен Оқу-ағарту министрі Ғани Бейсембаев келгенде осы мектепке тоқтап, өткізілген шараны абыроймен атқарды. Бүгінгі семинардың да осы мектепте өткізілуі бекер емес. Әр кезде оқушының жанынан табылып, оларға біліммен қатар рухани азық сыйлап, кітап оқуды жастарға дәріптеп жүрген барша мұғалімдерге рақмет айтамын,- деді Қызылорда қаласы бойынша білім бөлімінің басшысы Ерлан Теңізбайұлы.

Қатысушы қонақтар этноауылға саяхат жасап, түрлі тағамдардан дәм татты. «Заманауи кітапхана – заман талабы» атты С.Әлжіков атындағы №144 орта мектебінің мектеп ішінен жаңадан жабдықтаған кітапханамен келген қонақтар танысты. М.Шоқай атындағы №187 IT мектеп-лицейінің оқушысы QR код арқылы «Ұшқан ұя» повесінің ұлттық құндылықтарын оқырманға ұсынуға бола­тынын көрсетті. Сонымен қатар, С.Толыбеков атындағы №3 IT мектеп-лицейі «Кітап оқып, рухани бай бол» оқуға ұсынылған 17 кітап көрмесін көпшілікке ұсынды.

«Мәртебелі минуттар» атты ашық сұхбат алаңы ұйымдас­ты­рылып, семинар аясында ақын-жазу­шылармен коворкинг алаңында тәжірибе алмасты. Қаламыздағы Абай атындағы ДБА мектебі, №5 мектеп-лицейі, №12, №278 IT мектеп-лицейлері, Абылай хан атындағы №140 мектеп, №222, №120 орта мектеп кітапханашылары кітап оқытуда қолданатын әдіс-тәсілдерді таныстыру, оқырмандардың жылдам ойлау қабілетін дамыту, мектеп кітапханасында электронды платформаларды тиімді пайдалану, көркем әдебиеттер құндылығын дәріптеу бағытында өз тәжірибелерін көрсетті.

Ал, «Мектеп театры» жобасы аясында Б.Момынбаев атындағы №278 IT мектеп-лицейінің оқушылары Т.Жүргеновтың туғанына 125 жыл толуына орай «Құйынды жылдар құрбаны» көрінісін көрсетті. Б.Соқпақбаевтың «Менің атым Қожа» повесінен үзіндіні Абай атындағы ДБА мектебі қойса, №268 мектеп кітапханашы­лары «Кино терапия» кино кейіпкер­лерін сомдап, көпшіліктің көңі­лінен шықты. Қорытындылай келе шара қонақтары соңында пікір алмасып, кері байланыс жасады.

Өскелең ұрпақтың жай-күйі бізді алаңдатуы тиіс. Ата-аналар да, ұстаздар да балалардың білімді болып, кітап оқып дамуына өз үлесін тигізгені абзал. Себебі, көңіл бөлінбеген бала ер жетіп, ересек болғанда ерме адамға айналып, өзінің жеке пікірі болмауы мүмкін. Сондықтан да қазірден балалардың қажеттілігін толықтай қамтамасыз етіп, тура жолды нұсқауымыз қажет. «Бұлақ көрсең көзін аш» дегендей, балалардың ынтасын ашу арқылы барлық жақсы дүниеге әуестендіре аламыз. Өткізілген іс-шараның оқушыларға тигізер пайдасы мол екенін байқадық. Кітапханалардың көп болуы, мазмұнды кітаптардан рухани азық алуы оқушылар үшін мол олжа, таусылмас байлық.

Қазақбай ӘНДЕШ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған