«Білімді ұлт» сапалы білім беру» ұлттық жобасының ерекшелігі – ол нақты және ең маңызды міндеттерге бағытталған. Егер 2016-2019 жылдарға арналған мемлекеттік бағдарламамен салыстыратын болсақ, онда бұл жерде іс-шаралар 10 есе аз. Бірақ бұл проблемалар аз шешіледі дегенді білдірмейді. Дәл осы жерде мемлекет негізгі қол жеткізуге болатын және ең қажетті міндеттерге баса назар аударады»,- деді министр.
Ұлттық жобаның үшінші міндеті – мектептерді жайлы, қауіпсіз және заманауи білім беру ортасымен қамтамасыз ету. Оқушы орындарының тапшылығын қысқарту үшін 2025 жылға қарай 1000 мектеп салу жоспарланған. Нәтижесінде үш ауысымды мектептерді жою және апатты мектептер үлесін 0,1%-ға дейін қысқарту күтілуде. 2025 жылға қарай шағын қалаларда, аудан орталықтарында, ауылдарда 5000 мектеп жаңғыртылып, балаларды оқыту үшін қауіпсіз және қолайлы жағдайлар жасалатын болады.
Осы міндеттен туындаған «Жайлы мектеп» ұлттық жобасы арқылы 2025 жылға дейін апатты жағдайдағы және үш ауысыммен оқитын мектептер мәселесі толық шешілуі тиіс. Президент «Әділетті мемлекет. Біртұтас ұлт. Берекелі қоғам» атты Жолдауында осындай міндет жүктеген болатын. Бұл тапсырма өңірімізде қалай орындалуда, жобаның тиімді тұстары қандай, енді соны тарқатайық.
ҰЛТТЫҚ ЖОБАНЫҢ ҰТЫМДЫ ТҰСЫ
Жайлы мектептің басты ерекшелігі, бастауыш және жоғары сынып оқушылары үшін арнайы блоктар салынады. Тиісінше, әр блоктың өзінің спорт залы мен асханасы болады. Дәстүрлі мектептен тағы бір айырмашылығы, пәндік кабинеттер, компьютерлік сыныптар мен зертханалар, шеберханалармен қамтылмақ. Әрбір оқушы үшін арнайы жеке заттары мен оқулықтарын сақтауға арналған шкафтар орнатылады. Бұл оқушылардың ауыр сөмкелерін біршама жеңілдетуге мүмкіндік береді. Оқушылардың қауіпсіздік мәселесі де қатаң бақылауда болмақ.
– «Жайлы мектеп» жобасы бойынша бой көтеретін білім ошақтарында оқушыларға, мұғалімдерге барлық жағдай жасалатын болады. Соңғы үлгідегі құрал-жабдықтар мен техникалармен жабдықталады. Балалардың қауіпсіздігі үшін мектептің әрбір қабатында, ауласы мен сыртында қауіпсіздікке байланысты техникалық құралдар мен бейнебақылаумен толық қамтылады. Сондай-ақ, балалардың демалатын жерлері мен шығармашылықпен айналысатын орындары да соңғы үлгіде салынады,– дейді облыстық білім басқармасының басшысы Мейрамбек Шермағанбет.
Білім сапасы да басты назарда болмақ. Орта мектептен айырмашылығы, оқушылардың білім деңгейіне мектепшілік бақылаудан бөлек, сыртқы бағалау жүйесі жүргізілмек. Бұл білім деңгейін зерттеп, зерделеп отыруға мүмкіндік береді. Сондай-ақ, берілетін білім сапасын бақылауға қатысты үлкен жұмыс жүргізіледі. Мектеп білімінің мазмұны жасақталған және мұғалім оны бағалайды. Оның ішінде формативтік, суммативтік бағалау түрлері бар. Айта кетейік, жайлы мектептердің директорынан бастап мұғалімдеріне дейін арнайы тәртіппен қабылданады. Олар білім сапасын арттыруда арнайы оқудан өтеді.
ОБЛЫСТА ЖОБАНЫҢ ЖҮЗЕГЕ АСУЫ
Өңірімізде жоба бойынша 2023-2025 жыл аралығында 15100 орынға арналған заманауи 21 мектеп салынады деп жоспарлануда. Атап айтқанда, Қызылорда қаласында 8 мектеп, Арал ауданында 4 мектеп, Қазалы ауданында 2 мектеп, Қармақшы ауданында 2 мектеп, Жалағаш ауданында 1 мектеп, Сырдария ауданында 1 мектеп, Шиелі ауданында 1 мектеп, Жаңақорған ауданында 2 мектеп бой көтереді.
Бұл жобаны жүзеге асыру үшін «Samruk-Kazyna Construction» акционерлік қоғамынан 100 млрд. теңге бөлінген. Балалардың кедергісіз білім алуына жағдай жасау үшін биыл облыста 10 жайлы мектептің құрылысы басталады. Ал, қалған он бірі келесі жылға жоспарлануда.
– Қазіргі жағдайда «Samruk-Kazyna Construction» акционерлік қоғамы жайлы мектептердің сметалық құжаттарын жасап жатыр. Алдағы уақытта ашық конкурс берілетін болады. Сондықтан жаз айында биыл 10 мектептің құрылысы, атап айтсақ, Қызылорда қаласында 5 мектептің құрылысы, сондай-ақ, Жаңақорған ауданында екеу, Қазалы ауданында біреу және Арал ауданында екі мектептің құрылысы басталатын болады,- дейді Мейрамбек Шермағанбет.
Иә, білім саласы бір ізге түсіп, жүйелі жұмыстар атқарылып келеді. «Жайлы мектеп» ұлттық жобасы –үш ауысымда оқитын оқушылардың мәселесін шешудің тиімді тетігі.
Е.ЕРБОЛҰЛЫ
