Сапалы білімнің нәтижесінде ғана адам баласы белгілі бір деңгейге жетіп, қоғамға тың өзгерістер алып келеді. Еңселі ғимараттың мықты болып тұруы іргетасының дұрыс қалануынан. Сол секілді кез келген адамның білімінің іргетасы мектепте қаланады. Тұлға болып қалыптасуы үшін мектепте алған білімнің әсері мол. «Кел, балалар, оқылық» деп Ыбырай Алтынсариннің қазақ балаларын білімге шақырғаны да осыған дәлел. Қазақ ұлдарымен қатар, қыз балаларының да білім алуына құқылы екенін айтқаны, ұлтына деген жанашырлық. Дала заңына ғана бағынатын қазақ халқының салт-дәстүрі жатқан білім. Бірақ, заманның талабына сай, өзге мемлекеттермен бәсекелес болуы үшін білім алуға шақырған қазақ зиялыларының әрекеттерінің нәтижесі кейіннен жүзеге асты. Халқымыздың маңдайына біткен ағартушылықпен айналысқан асыл тұлғаларымыздың арқасында қазіргі мектептердің осыншалықты жоғары нәтижеге жеткенін байқаймыз. Мектеп білім ордасының бала өміріндегі бастапқы кезең екендігі, бастапқы кезеңмен қатар басты кезең екендігі де белгілі. Ұстаздың оқушы өмірінде үлкен маңызды адам екендігін ұстаздар жайлы айтылатын түрлі әңгімелерден, әндерден байқауға болады. Ұстаз бен оқушының байланысы қаншалықты тығыз болса, жететін жетістіктер оқушыға жақындай түседі.
Озық технологиялардың қоғамда алға шығуы білім ошақтарының сапасын арттыру керектігін көрсетеді. Мемлекетіміздің білімге баса назар аударатыны осыған байланысты болса керек. Себебі, білімді ұрпақтың түрлі қиындықтан шешім таба алатын қабілетке ие екендігін дамыған мемлекеттер көрсетіп-ақ жүр. Қазақ даласында әлемге өзгеріс әкелетін қазақ баласының жүргенінен үміттіміз. Бірақ, білімге құштар баланың қызығушылығын одан ары дамыту үшін мектептердің сапасын көтеру шарт. Жыл сайын еліміздің әр түкпірінде заман талабына сай мектептер салынуда. Оқушылардың игілігі үшін салынатын мектептердің көп әрі сапалы болуы білімді жастың болашағының жарқын көрініске ие болатынына үлкен септігін тигізеді.
Қызылорда қаласында Наурыз мерекесі қарсаңында қуанышты жаңалық болды. «Сабалақ» елді мекенінде Ұлыстың ұлы күні дарынды балаларға арналған, заманауи үлгідегі 150 орындық №285 мамандандырылған мектеп-лицей-интернаты ашылды. Жоғарғы сападағы жабдықтармен жабдықталған мектеп-интернат ел игілігіне пайдалануға берілді. Сайлауда үлкен белсенділік танытып атсалысқан тұрғындарға алғысын айтып, облыс әкімі Нұрлыбек Нәлібаев мектеп-интернатының ашылуында жерлестерін айтулы мерекемен құттықтап өтті.
— Мемлекет басшысы Қасым-Жомарт Кемелұлы Тоқаевтың, Үкімет деңгейіндегі жан-жақты қолдаудың және бірлескен жұмыстардың нәтижесінде Сыр өңірінде тың жобалар жүзеге асуда. Біз адами капиталды дамыту және білім сапасын арттыру мемлекеттің негізгі міндеттерінің бірі екенін әрдайым айтамыз. Өңірімізде заманауи жаңа білім ошақтары бой көтеріп, жас ұрпақтың сапалы білім, саналы тәрбие алуына бар жағдай жасалуда. Өткен жылы облыста 19 балабақша, 6 мектеп, Жалағаш ауданында Оқушылар үйі және Өнер мектебі пайдалануға берілді. Туған жерге жанашыр меценаттар, кәсіпкерлер 9 миллиард теңгеден астам демеушілік қаржыға ауқымды жобаларды жүзеге асырды. Нәтижесінде 80 спорт-ойын алаңы, демалыс парктері мен аллеялар ел игілігіне табысталды. Қызылорда қаласында «Анаға тағзым» орталығы, Арал ауданы Тоқабай ауылында жаңа мектеп құрылысы жүргізілуде. «ҚазГерМұнай» ұлттық компаниясы басшылығымен келісім нәтижесінде Қызылорда қаласында заманауи үлгідегі «Оқушылар сарайының» жобасы басталады. Алдағы уақытта да мемлекет, облыс басшылығы тарапынан бүлдіршіндерімізді, талантты оқушыларымызды қолдау тұрақты жүргізіледі, – деді Нұрлыбек Машбекұлы.
Үкімет басшысы Әлихан Смайылов өткен жылдың желтоқсан айында Сыр өңіріне арнайы келіп, дарынды балаларға арналған физика-матматика бағытындағы мектеп интернатын салуды, 1775 орыннан тұратын 4 мектеп құрылысын аяқтауды «Білімді қолдау қоры» қаражатынан қаржыландырылатын құрылыстар тізіміне қосқан болатын. Құны 100 млрд. теңгеден асатын 15100 орыннан тұратын 21 мектепті салу «Жайлы мектеп» ұлттық жобасы аясында облысымызда салу көзделген. Биылғы жылы әзірше 10 мектептің құрылысы басталды. 2025 жылға қарай апатты жағдайдағы мектептердің мәселесі шешімін тауып, үш ауысымды мектептің жағдайын шешу қарастырылып, оқушылардың білім алуына жағдай жасау көзделген. Еңбек нарығына қажетті мамандықтарды игеруі үшін тұрмысы төмен отбасылардың балаларына облыс әкімінің 100 гранты бөлінді.
— Тағы бір ақжолтай жаңалық, осы жылы қаланың сол жағалауында дарынды балаларға арналған 400 орындық физика-математика интернаты мен 350 орындық «Оқушылар сарайының» құрылысы басталады. 2025-2027 жылдары облыста 6 өнер мектебі мен 600 орындық оқушылар үйін салу бойынша министрлікке ұсыныстар беріліп, тиісті жұмыстар жүргізілуде. Жыл сайын мектептерде орын тапшылығы туындайтыны жасырын емес. Қажеттілікті ескере келе, қаладағы Абай атындағы және №264 мектебіне 550, №101, №3 мектепке 375 орынға лайықталған қосымша құрылыс жұмыстары жүргізілуде,- деді облыстық білім басқармасының басшысы Мейрамбек Шермағанбет.
Балаларымыздың болашағы үшін жасалып жатқан Сыр өңіріндегі шаралар халықтың көңілінен шығуда. Білім беру бағытына үлкен мән беретін мемлекетіміз үшін мектептердің сапалы және талапқа сай болуы қарастырылған. Қай мемлекет болсын, білім беру жүйесінің дамуына үлкен мән беруі заңдылық. Дамыған қоғам үшін бәсекеге қабілетті білімді де білікті мамандардың көбейгені дұрыс. Бір-бірімен білімімен жарысқан елдердің барлығы да әлемнің түйткілді мәселесін шешуді көздейді. Қоғамның қиындығын шешу үшін білімді тұлғалардың ықпалы зор. Білімді тұлғалардың қалыптасуының бастапқы кезеңі мектептен шығатынын естен шығармауымыз керек. Сыр өңірінде де жайлы мектептердің салынып, ел игілігіне берілуі білімді ұрпақтың болашағы үшін жасалынып жатқаны қуантады.
Қазақбай Әндешұлы
