ҚЫЗЫЛОРДАДА ЖӘРМЕҢКЕ ҰЙЫМДАСТЫРЫЛДЫ

 Наурыз мерекесі қарсаңында облыс орталығында ауыл шаруашылығы өнімдерінің жәрмеңкесі өтті. Қызылорда облысының әкімі Нұрлыбек Нәлібаев пен қала әкімі Асылбек Шәменов сауда орындарын аралап, тұрғындармен пікірлесті.

Жәрмеңке Қызылорда қаласының халық көп шоғырланған үш аумағында ұйымдастырылды. Атап айтсақ, сауда-саттық қатарлары «Шанхай» мөлтек ауданында Жанқожа батыр мен Құлтекенов көшелерінің қиылысында, «Мерей» мөлтек ауданында Журба көшесі мен Саламатов көшелерінің қиылысында және Астана даңғылының бойында Жеңіс көшесіне дейін орналасты.

Қала тауар өндірушілері мен «Байқоңыр» ӘКК» АҚ-ның кәсіпкерлері 90 жүк көлігіне тиелген 150 тоннаға жуық тауарды тұтынушыларға ұсынды. Оның ішінде 15 тонна күріш, 30 тоннадан астам ет пен балық өнімдері, 20 тонна картоп, 13 тонна сәбіз, 20 тонна пияз, 30 тоннаға жуық көкөніс пен жеміс, 1 тонна күнбағыс майы, 7200 дана жұмыртқа, 6 тонна кондитер өнімдері, 4 тонна сүт өнімдері, 3 тонна ас тұзы және тұрмыстық заттар бар. Жәрмеңкеде аймақта өндірілетін отандық өнімдерді қолдау үшін арнайы көрме ұйымдастырылды. Сыр маржаны – ақ күріш, сүт өнімдері, жемістер мен көкөністер, кондитерлік өнімдер ұсынылды.

Мерекелік жәрмеңкеде жұртшылық наурыз көжеден дәм татты. Сонымен қатар, Ұлыстың ұлы күні қарсаңында тұрғындардың көңіл-күйін көтеру үшін концерттік бағдарлама ұйымдастырылды.

Жыл басынан бері Қызылорда облысында 40 рет жәрмеңке өткізіліп, азық-түлік өнімдері тұрғындарға нарықтағыдан төмен бағамен сатылды.

ЖАППАЙ ТАЗАЛЫҚ АКЦИЯСЫ ӨТТІ

Көктем мезгілі келісімен табиғат та жандана бастайды. Жер бусанып, қуарған талдарға жан бітеді. Қыстан қалған қоқысты тазарту жұмыстары да қыза түседі. Себебі, қоршаған ортаның тазалығына жауапкершілікпен қарау – әрбір азаматтың міндеті.

Санитарлық тазалық және көркейту-көгалдандыру айлығы аясында Қызылорда қаласы көлемінде жаппай тазалық акциясы өтіп, оған барлық мекеме қызметкерлері қатысты.

Сенбілікке әр мекемеден 1705 қызметкер және 37 арнайы техника жұмылдырылып, қала аумағын қоқыстан тазарту жұмыстарын жүргізді. Шөп шауып, арық арналарын тазартты, көшет отырғызды.

Қала тұрғындары да қалыс қалмай, таза қала үшін сенбілік жұмыстарына жұмыла атсалысып, тұрғын үйлердің, аулалардың және көшелердің аумағында тазалық іс-шараларына өз үлестерін қосты.

Қ.Әндешұлы

Пікір үстеу

Э-пошта мекенжайыңыз жарияланбайды. Міндетті өрістер * таңбаланған