ТҰРҒЫНДАР ИГІЛІГІ ҮШІН АУҚЫМДЫ ЖОБАЛАР ҚОЛҒА АЛЫНДЫ

Қызылорда қаласының әкімі Асылбек Шаменовтың 2023 жылдың I тоқсанындағы халықпен кездесуі Белкөл, Тасбөгет кенттері мен Қызылжарма ауылдық округінен басталды. Шаһар басшысы алдымен Белкөл кентіне барды. Бүгінде кенттің әлеуметтік-эконо­микалық тұрғыда өсу қарқыны жоғары. Тұрғындардың тұрмыс-тіршілігі түзу, қоғамдық-саяси ахуал тұрақты.

Өткен жылғы кездесуде белкөлдіктер қала әкіміне елді мекенді бөліп тұрған темір жолдың үстінен жаяу жүргіншілер көпірін салу қажеттігін айтқан болатын. Мәселеге орай, шұғыл шаралар қолға алынып, тиісті қаражат сұралды. Облыстық бюджеттен бөлінген 225,2 миллион теңгеге жұмыстар жүргізіліп, көпір жақында пайдалануға берілді.

Биылғы жылы да кентте айтарлықтай жұмыстар атқары­лады. Облыстық бюджеттен бөлінген 89,5 млн. теңгеге Жерұйық, Путейцева тұйығы, Әбдіқадыров №2,4,6,9 көшелеріне қиыршық тас төселсе, Сарыарқа, Жерұйық көшелеріне орташа жол жөндеу жұмыстары жүргізіледі. Сонымен қатар, кенттің орталығы мен Бірлік көшесінің мектепке дейінгі аралығына жаяу жүргіншілер жолы салынады. Оған қалалық бюджеттен 39,1 млн. теңге бөлінді.

Бірқазан елді мекеніндегі кө­ше­лердің инженерлік инфрақұрылымын дамытуға облыстық бюд­жеттен 34,8 млн. теңге қаралып отыр. Бұдан бөлек, облыстық бюджетке кент пен Бірқазан ауылы­ның жолы мен жарығына, мәдениет үйінің құрылысына 727,7 млн. теңгенің жобалары ұсы­нылды. Алдағы уақытта мәслихат сессиясында сұралған қаржы қолдау тапса, аталған жұмыстар жүзеге асырылмақ.

Кездесуде тұрғындар қоғамдық көлік қатынасына қатысты мәселе көтеріп, қаламен байланыстыратын маршрутты автобустардың жүру интервалын жиілетуді сұрады. Қала әкімі сұранысқа байланысты автобус паркінің директорына қоғамдық көліктердің жүру жиілігін ретке келтіріп, сызбаларды қайта қарауды тапсырды.

Халықпен кездесу Тасбөгет кентінде жалғасты. Қаламен қатар дамыған кентте ауқымды жобалар жүзеге асуда. Солардың бірі – жаңадан салынатын дене шынықтыру-сауықтыру кешенінің құрылысы. Оған облыстық бюджеттен 542,1 млн. теңге бөлініп, қазіргі таңда мемлекеттік сатып алу жұмыстары жүргізіліп жатыр. Биыл кенттегі 41 көшені жөндеуге облыс және қала бюджеттерінен 833,7 млн. теңге қаржы қаралды. Бұл қаражатқа жалпы ұзындығы 28,8 шақырымды құрайтын көшелерге асфальт қабаты мен қиыршық тас төселетін болады. Жергілікті бюджеттен бөлінген 15 млн. теңгеге «Шауқаман бағы» да абаттандырылып, халыққа қолайлы жағдай жасалынбақ.

Тасбөгеттік кәсіпкерлер инвестиция құйып, кенттің кіреберісінен 130 пәтерлі көпқабатты үй салуды бастады. Ал, 2021 жылы жал­пы құны 1 млрд. теңгеге 5 қабатты 53 пәтерлі тұрғын үйдің құрылысын бастаған «Фирма «МТО-Центр» ЖШС нысанды мамыр айында пайдалануға беруді жоспарлап отыр. Бұл жұмыстармен бірге орталық саябақ жанынан 200 миллион теңгеге «Құддыс ишан» мешітінің жаңа ғимараты бой көтеруде. Тағы бір жоба, «AЭS and Limited» ЖШС-нің демеушілігімен 100 млн. теңгеге Сабалақ саяжайына табиғи газ желісін тарту жұмыстарының жоба-сметалық құжаттары әзірленуде.

Жарқын жобалар тасбөгеттік тұрғындардың жүзін жылытты, әкімге ризашылығын білдірді. Кездесуден кейін қала әкімі тұрғындарды жеке мәселелері бойынша қабылдап, ұсыныс-тілектерін тыңдады.

Шаһар басшысы халықпен кездесуін Қызылжарма ауылдық округінде түйіндеді. Соңғы бес жылда бұл елді мекеннің аумағы бір­неше есеге ұлғайып, тұрғындар саны 15 мыңға жеткен. Халық са­нының артуына байланысты инфрақұрылымды дамыту, әлеуметтік нысандар салу секілді мәселелер бой көтерді. Солардың бірі – мектеп құрылысы. Қызылжармадан арнайы орын белгіленіп, биыл «Жайлы мектеп» ұлттық жобасы аясында игілікті іс бастау алады. За­манауи үлгідегі 900 орын­дық білім ұясының құрылысы жүргізіледі.

Соңғы жылдары ауылдардың, шет аймақтың жолдарына айрықша мән берілуде. Ұлттық қордан, облыстық және қалалық бюджеттерден қаражаттар сұралып, берекелі бастамалар жүзеге асуда. Соның дәлелі, өткен жылы облыстық бюджеттен бөлінген 1 млрд. 642 млн. теңгеге ауылдағы 35 көшеге қиыршық тас төсеу жұмыстары басталды. Бүгінде оның 15 көшесі жаңаланды, қалған 20-сы жыл соңына дейін жөнделмек. «Ауыл – ел бесігі» бағдарламасы аясында облыстық бюджеттен бөлінген 591,7 млн. теңгеге ұзындығы 17 шақырым болатын 23 көшеге асфальт төсеу жұмыстары жүргізілу жоспарда.

Тұрғындардың сұранысына сәйкес, қалалық бюджеттен бөлінген 5 млн. теңгеге ұзындығы 900 метрді құрайтын екі көшеге түнгі жарық шамдары орнатыла бастады. Оған қоса, қаралған 11,9 млн. теңгеге Батырбаев және Сексенбаев көшелерінің қиылысына бағдаршам орнатылуда. Ауыл орталығынан өткен жылы іргетасы қаланған заманауи үлгідегі жаңа спорт кешені жақын күндері пайдалануға берілмек. Қай кезде де тұрғындардың талап-тілегі мен ұсыныстарын қаперге алатын қала әкімі кездесулерде тұрғындардың алғысын арқалап қайтты.

З.Қонысжан

Пікір үстеу

Э-пошта мекенжайыңыз жарияланбайды. Міндетті өрістер * таңбаланған