Ұшқан шатыр, қисайған мұржа, сынған бөрене…

Сырдың желі сапаның сиқын көрсетті

Қауіпсіздік – адам баласы үшін басты міндет. Қоғамда өмір сүріп жатқан адамдардың барлығы да тыныш ұйқыға лайықты. Табиғаттың тосын мінезі ешкімді аяп қалмақ емес, бірақ барлық жауапкершілікті табиғатқа артып қойып, негізгі тікелей жауапты адамдардың үнсіз қалмағаны жөн. Соңғы күндері облысы­мызда дауылдың күші басылмай тұр. Шатырлардың үймен бірлігін ажыратып, көтеріп алып жерге тас­тай салған дауылды кінәлаймыз ба әлде тұрғын үйдің сапасына салғырт­тық танытқан мердігер компанияларды ма? Мүмкін ескертусіз келген желдің «қуаттылығын» айыптасақ па екен? Не десек те біткен іске сыншы көп дегендей, келесіде болатын жағдайлардың алдын алып, қауіпсіздік деңгейді күшейту абзал.

Сыр өңіріндегі табиғат тосынының әсеріне байланысты Қызылорда облысы өңірлік коммуникациялар орталығында ауа-райының қолайсыздығына байланысты орын алған жағдай туралы брифинг болып өтті. Брифинг барысында сала мамандары ақпарат беріп өтті.

– Ауа райының күрт өзгеріп, қатты желдің әсерінен қала, аудан және бірқатар ауылдарда электр жарығы ажыратылды. Сәйкесінше, КРЭК АҚ қоғамы ақау орын алған электр желілерін қалпына келтіру мақсатында барлық аудандарға 260 адамнан тұратын 64 бригада жұмылдырды. 54 техника жұмыс істеді,- деді Қызылорда облысының энергетика және тұрғын үй-коммуналдық шаруашылық басқармасы басшысының орынбасары Қайсар Мақсұтұлы.

– «Қазалы-Теміржолжылу» филиалының бу қазандығының темірден жасалынған ұзындығы 40 метр түтін мұржасы құлап, авариялық жағдай орын алған болатын. Адам шығыны және бу қазандығы ғимаратына зақым келген жоқ. 40 метр мұржаның жарамсыз 31 метрі қиылып алынды. Авариялық жағдайды жою мақсатында 2 кран, 1 жылжымалы дәнекерлеу агрегаты, филиалдың 15 жұмысшы қызметкерінен құралған авариялық тобы жұмыс жасады. Бүгінде 9 метр мұржамен №2,4 қазандықтар іске қосылып, жылу энергиясы өндірілуде,-деді Қызылорда жылуэлектр орталығының директоры Усаин Медет.

Осы жылдың 1-2 сәуірінде облыс аумағында қалыптасқан метеорологиялық қауіпті құбылыс салдарынан барлығы 24 нысанға зақым келтірілген. Оның ішінде, 22 үйдің шатыры ұшып, біреуінің сыртқы келбетіне зақым келтірілсе, 1 жылу беру нысанында мұржаның құлауы жағдайы орын алған. Шатыры ұшқан нысандардың барлығы дерлік жартылай немесе ішінара зақымдалған. Қазірде қала және аудандарда келтірілген шығын көлемін есептеп жатыр. Бұл жөнінде облыстық ТЖД бастығының орынбасары Бекболат Әбдіқадыров:

– Ауа райының қолайсыздығы­нан орын алған апаттық жағдайлар қалпына келтірілуде. Зардап шеккен адамдар жоқ. Комиссия құрылып, келтірілген шығындар бойынша жұмыстар жүргізілетін болады,- деді.

Брифингте «Қазгидромет» РМК Қызылорда облысы бойынша филиалының бөлім басшысы облыстағы ауа райынының жағдайын баяндады. «1-3 сәуір күндері облыстың басым аумағында суық антициклонның әсерінен салқын ауа райы байқалып, жел күшейіп, шаңды дауыл тұрғаны баршамызға белгілі. Ал алдағы күндері желдің екпіні төмендейді. Ауа температурасы түнде +7+12 болса, күндіз 15+20 жылыға дейін ақырындап көтеріледі. Жалпы облыс бойынша өткінші жаңбыр, найзағай  күтіледі, – деді Әйгерім Болатбекқызы.

Облысымызда алдағы уақыттарда болатын төтенше жағдайларға дайын болуы үшін жоғарыдағы мекемелер тынбай еңбек етулері керек. Себебі, табиғат тосыны ескертусіз келетіндіктен, алдағы мезгілдерге де сақадай сай болуымыз шарт. Тұрғын үйлердің шатыры ұшпауы үшін жауапты мекемелер «бармақ басты, көз қыстылыққа» салынбай, сапалы жұмысты құрылыс компанияларынан талап еткені жөн. Халықтың қауіпсіздігін ойлаған билік ғана халыққа жақын болады.

Қазақбай ӘНДЕШҰЛЫ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған