Соңғы күндері әлеуметтік желілерде қызу талқыланып жатқан «Педагогтердің аттестаттаудан өту ережесінің» жобасы туралы бір-біріне қайшы келетін пікірлер де айтылып жатыр.
Жаңа жобадағы басты ерекшелік – педагогтың үздіксіз кәсіби дамуының Ұлттық платформасының құрылуы. Бұл автоматтандырылған жүйеде әрбір педагог өзінің жеке кабинетін ашып, онда біліктілік арттыруға қатысты барлық жұмыстарын орындай алады. Ұлттық платформа елдегі бүкіл электрондық жүйелермен тығыз байланыста болғандықтан, педагогтің бүкіл жетістігі автоматты түрде жинақталады.
Яғни, педагог пен білім алушылардың жетістіктерін растайтын педагогтің жеке кабинетінің деректері және оның кәсіби қызметінің құжаттары, біліктілік арттыру жайлы мәліметтер, тәжірибені жинақтауы толығынан автоматтандырылады. Ендігі жерде педагогтер аттестациядан өту үшін құжаттарын қағаз түрінде жинақтап, портфолио жасап, жинақталған құжаттарын мемлекеттік мекемелерге барып, тапсырып әуре болмайды.
Педагогтердің білімін бағалау – білім беру саласындағы уәкілетті орган әзірлеген тест бойынша жүргізіледі. Бұрынғы жылдары педагогтер пәні және педагогика мен оқыту әдістемесінен тест тапсырып келсе, енді тек өзінің пәні бойынша ғана тест тапсырады.
Жаңа Ереже бойынша педагогтен үздіксіз еңбек ету талап етіледі. Және педагог жұмысының тиімділігі оның оқушыға берген сапалы білімі арқылы анықталады. Аттестациялық комиссия құрамында ұзақ жылдар бері жұмыс жасағанымда байқағаным, мұғалімдер көбінесе аттестация уақыты таяп қалғанда барып құжаттарын жинақтауға кірісетін. Мақалаларын алып, журналдардың редакцияларына жүгіретін. Мұғалім портфолиосын тексергенде, басқа бір әріптестерінің жетістіктерін иеленіп кететін жағдайлар да кездесетін. Енді жаңа жүйе бойынша әр педагогтің нақты жұмыс нәтижелері ғана ескерілмекші.
Педагогтердің аттестаттаудан өту Ережесінің жаңа жобасы ұзақ жылдар бойы мұғалім санаты жөніндегі мәселенің айналасында жүріп келген көптеген теріс әңгімелердің тамырына балта шабады деп ойлаймын. Өйткені, Ережедегі өзгерістер, барлық жұмыстардың толық автоматтандырылуы аттестаттау үрдісінің обьективтілігі мен ашықтығын арттырмақ. Адами фактор әсерінің барынша азаюы бұл маңызды мәселенің айналасындағы барлық сыбайлас жемқорлық тәуекелдерін жоюға оң әсерін тигізбек.
Жаңа Ереже ұзақ жылдар бойы білім саласында тынымсыз тірлік жасап, табысты еңбек етіп жүрген шығармашыл ұстаздар үшін тиімді болатынына кәміл сенемін.
Бауыржан Елеусінов
