Қызылорда қаласының прокуратурасы мемлекеттік сатып алу саласында заңдылықтың сақталуына талдау жүргізген кезде бұрын-соңды орташа жөндеу жүргізілген көшелерге қаражат бөлінгені белгілі болып, арты ашылып қалыпты. Қалалық прокуратураның араласуынан кейін барып, мемлекеттік сатып алудың күші жойылып, 1,7 млрд. теңге бюджет қаражатының негізсіз жұмсалуына жол берілмеген.
Ал, керек болса! Ендеше нақты айтайық. 2020 жылы Қызылорда қаласы, Қызылжарма ауылдық округі, Батырбаев көшесіне 49 млн. теңгеге орташа жөндеу жұмыстары жүргізілген. Негізі ҚР Инвестициялар және даму министрлігі Автомобиль жолдары комитеті төрағасының 2018 жылғы 21 желтоқсандағы №131 бұйрығы бар. «Автомобиль жолдарының құрылымдық элементтерінің, оның ішінде салу, реконструкциялау, күрделі, орташа және ағымдағы жөндеуден кейінгі жол жағдайының жөндеу аралық мерзімдерін белгілеу жөніндегі ұсынымдар туралы» бұйрықтың 4.1-тармағына сәйкес автокөлік жолдарына күрделі жөндеу аралық мерзімі 6-9 жылды құрайды.
Аталған талаптарға қарамастан, Қызылжарма ауылдық округінің әкімдігі ағымдағы жылы Батырбаев көшесіне күрделі жөндеу жұмыстарын жүргізуге қаражат бөліп, 653,9 млн. теңгеге мемлекеттік сатып алу жариялаған.
Бұл бұл ма, «осыған ұқсас заң бұзушылықтар Әбенов, Досхожин және Сексенбаев көшелеріне күрделі жөндеуге 1 млрд. теңге қаражат бөлу кезінде анықталды. Қабылданған шаралардың нәтижесінде жалпы сомасы 1,7 млрд. теңгені құрайтын 4 сатып алу конкурсының күші жойылды» дейді Қызылорда облысының прокуратурасы.
Осы күні шет аймақтардың жолдарына ақша таппай, тұрғындар зар қақсап жүргенде жергілікті билік заңды белден басып, миллиардтармен ойнағысы келіпті. Прокуратураның араласуымен ойындары осылған. Енді жыл аяғында қаладағы «жөнімен тұрған» жолдарды қопарған және асфальттың үстіне асфальт төсеп «биіктеткен» жерлерді прокуратура бір «шұқып» көрсе, талай адамның тәбетін бұзып, құстырар ма еді, кім білсін?!
Н.Естемес
