Ұстаз атты ұлағатты мамандық иесі болуды арман етпеген бала кемде-кем! Бала қиялының алғашқы беттерінде «мұғалім боламын» деген асыл арман алтын әріптермен жазылатындай. Өзгенің баласын өз баласынан кем көрмей, білім атты ізгілікті көкейіне қондыра алатын, әріп танымай келген оқушының көкірегіне ғылым сәулесін ұялататын, адамдықтың алғашқы көзқарастарын қалыптастыратын, жаманды ұғындырып, жақсыны қадірлеуді үйрететін мұғалімді адам жанының инженері дерсіз. Қазақ халқының данқты батыры Бауыржан Момышұлының «Ұстаз болу – ұлық емес, ұлы қызмет» дегені бекер емес. Расында да, ұстаздық жолына тек жаратылысы бөлек, ұстанымы нық, қажыр-қуаты жоғары ұлы адамдар ғана бара алады. Бұл қасиетті мамандық білімді игеруге, алған білімін жұртқа бөлісуге шақыратын ерекше құбылыс. Бүгінгі кейіпкеріміз – Ұлжан Алибайқызы Есмаханова ұстаздықты ұстанымы етіп, өмір сүру миссиясын шәкірт тәрбиелеумен ұштастырған ұстаз. Қазірде Қызылорда қаласында орналасқан іргелі оқу орны – Мәншүк Мәметова атындағы Қызылорда педагогикалық жоғары колледжінің оқытушысы. Нарықтық уақытта бәсекеге қабілетті маман даярлауда өзіндік қолтаңбасы қалыптасқан үздік педагог.
2022-2023 оқу жылы Ұлжан Алибайқызы үшін жеңісті де жемісті жыл ретінде басталды деуге толық негіз бар. Ұлжан Есмаханова жыл сайын кәсіби білігі жоғары «сен тұр, мен атайын» дейтін оқытушылар арасында өтетін республикалық «Үздік педагог – 2022» байқауында жеңімпаз атанды. Білім бағытында жұмыс істейтін мамандар біледі, бұл салада кіші сайыстардың өзінде топ жару оңай емес. Бәсеке қатты, талап күшті. Ал, ол бәйге республикалық деңгейде болса тіпті қиын. Топ ішінен көш бастап, жүзден жүйрік болу үшін үлкен тәжірибе мен қажырлы еңбек және тыңғылықты дайындық керек. Жеңілдің үстімен, ауырдың астымен амалдап жеңіс төрінен көріну мүлде мүмкін емес. Бұл жеңістің бәсі һәм салмағы бөлек. Өңірлік іріктеуде ел аумағы бойынша 600-ден аса ұстаз қатысқан кәсіби сайыста 100-ден астамы ғана республикалық кезеңге жолдама алды. Ішінен іріктеліп, кәсібибілігі жоғары, білімі биік, тәжірибесі толысқан 64 педагогты ғана «Үздік педагог – 2022» аталымына лайық көрді. ҚР Оқу ағарту министрлігінің мұрындық болуымен арнайы комиссия құрылып, әр мұғалімнің жұмысын майшаммен қарады, үміткерлердің әр айтқан сөзін саралап, ұсынған білім беру методикасына мән берді. Осынша сүзгіден сүрінбей өтіп, топ ішінен өзінің атаулы номинацияға лайық екенін дәлелдеген ұстаздарды, тек «үздік» деп ғана емес, «үздіктердің үздігі» деп атасақ та жарасатындай. Әр кез қарапайымдылық қалыбынан айнымаған Ұлжан ханым бұл белесті де ұжымдастарымен бірге, командалық жұмыстың нәтижесінде алып шыққанын және «бұл тек менің ғана емес, жалпы Сыр ұстаздарының ортақ абыройы» дейді. Ол өз сөзінде, «Бұл жеңіс арқылы өңірлердегі білім беру ісінің жүйелілігі көрінеді. Ұлт ұстазы Ахмет Байтұрсынұлының «Мектептің жаны – мұғалім. Мұғалім қандай болса, мектеп сондай болмақшы. Яғни, мұғалім білімді болса, ол мектептен балалар көбірек білім алып шықпақшы. Солай болған соң, ең әуелі мектепке керегі – білімді, педагогика, методикадан хабардар, жақсы оқыта білетін мұғалім» деген сөзі бар. Ендеше Сыр ұстаздары үздік атанып жатса, ол біздің өңіріміздегі білім беру сапасы жоғары екендігінің, даярлап жатқан мамандарымыздың кәсібибілігі биік екендігінің көрінісі. Барша қолдау көрсетіп, сенім артқан ұжымдас әріптестеріме, арнайы колледж директоры Жақсыгүл Қоханқызына алғысымды білдіремін»,- дейді. Өткенінен ой алып, бүгінінен тәжірибе түйген педагог ойымен келісе отыра, кейіпкеріміздің ұлағатқа толы еңбек жолын газетіміздің барша оқырмандары назарына ұсынғымыз келеді.
Ұлжан Алибайқызы – 32 жыл бойы білім беру саласына адал еңбек етіп келе жатқан маман. 1994-1997 жылдар аралығында Е.Бөкетов атындағы Қарағанды мемлекеттік университетін «Мектепке дейінгі педагогика және психология пәндерінің оқытушысы», «Мектепке дейінгі тәрбие жөніндегі методист» біліктілігі бойынша білім алған. Оқуын аяқтай саласымен алғашқы еңбек жолын М.Мәметова атындағы Қызылорда педагогикалық жоғары колледжінде оқытушылық қызметінен бастаған. Әр уақытта «Мектепке дейінгі педагогика» ПЦК-ның меңгерушісі жауапты қызметінде де абыройлы еңбек еткен. Сонымен қатар, білім эскперті ретінде ғылымға ден қойып, мектепке дейінгі білім беру ісін іргерілету үшін 2014-2016 жылдар аралығында «Ертегілер елінде», «Көңілді сабақтар», «Компьютер балалар өмірінде» атауларымен көмекші құралдар жазып шығарған. «Күн тәртібін құру және дамытушы ойындар» мен «Мектепке дейінгі педагогика» атты оқу құралдары бар. «Эффективность применения инновационных технологии в дошкольном обучении», «Мектеп жасына дейінгі балаларға патриоттық тәрбие беруде Н.Құлжанованың педагогикалық мұраларын қолданудың тиімділігі», «Білім алушылардың ізденісі артты», «Worldskills – кәсіби шеберлікті дамыту чемпионаты» тақырыптарында жергілікті, республикалық басылымдарда зерттеу материалдары жарық көрген. Оның ішінде «Ұстаз мәртебесі» газетімен де етене байланыста.
Педагогика қызметінде еткен еңбегі үшін 2017 жылы ҚР Білім және ғылым министрінің Құрмет грамотасымен, 2019 жылы колледжішілік «Үздік педагог» номинациясымен, 2020 жылы Білім және ғылым қызметкерлері кәсіподағының облыстық комитеті мен Қызылорда облыстық білім басқармасының Құрмет грамотасымен, 2020 жылы «Worldskills Kazakhstan-2020» VІ аймақтық кәсіби шеберлік чемпионатында бас сарапшылық жасағаны үшін ұйымдастыру алқасының Алғыс хатымен, облысымыздағы 2020 жылдың қорытындысы бойынша «Креативті оқытушы» номинациясымен, 2021 жылы колледж директорының Алғыс хатымен марапатталды. Өткен жылдың қорытындысы бойынша облыстық білім басқармасының марапаттауымен «Жыл үздігі» номинациясына ие болды.
Ғылым жолындағы қажырлы ізденіске толы жұмыстарына да ерекше тоқталсақ болады. Тараз қаласындағы Абай атындағы Жамбыл гуманитарлық колледжінде өткен «Мектепке дейінгі тәрбие мен оқытудың жаңартылған мазмұнын іске асырудың негізгі бағыттары» атты республикалық ғылыми-педагогикалық конференциясына, Көкшетау қаласындағы Азаматтық қорғаныс жоғары көпсалалы колледжінде өткен «Қолданбалы бакалавриатты енгізу: мәселелері мен шешу жолдары» тақырыбындағы республикалық конференциясына, Тараз қаласындағы «Абай атындағы Жамбыл гуманитарлық колледжінде» өткен «Модульдік құзыреттілік бағдарламаларының проблемалары және келешегі» атты онлайн конференциясына, Тараз қаласындағы Абай атындағы Жамбыл гуманитарлық жоғары колледжінде ұйымдастырылған «Абай және адамзаттық құндылықтар» атты халықаралық ғылыми-практикалық конференциясына, М.Мәметова атындағы Қызылорда педагогикалық жоғары колледжінде «Әл-Фарабидің рухани әлемі» тақырыбындағы өткен облыстық ғылыми-теориялық конференциясына, Ж.Мусин атындағы қазақ педагогтық жоғары колледжінде өткен «Ахмет Байтұрсынұлы тағылымы: ізденіс, тәжірибе және перспектива» тақырыбындағы ғылыми конференциясына қатысушы, баяндамашы ретінде қатынасқан. Ғылыми ізденіске толы құнды баяндамалары арнайы жинаққа еніп, бұқаралық ақпараттық құралдары арқылы көпшілікке таралған.
Сондай-ақ, әр уақыттарда Алматы облысы, Саркан ауданына қарасты Саркан гуманитарлық колледжінде мамандандырылған аккредиттеудің сарапшылық құрамында, Шымкент қаласындағы ЖШС «Анвар Исмаилов атындағы кәсіптік колледжіне» мамандандырылған аккредиттеу құрамында, Алматы қаласы МКҚК «№1 Алматы қазақ мемлекеттік гуманитарлық-педагогтік колледжі» мамандандырылған аккредиттеудің тексеру құрамында, Тараз гуманитарлық-техникалық колледжінде өткен мамандандырылған аккредиттеуде сыртқы сараптау тобында жетекшісі және сарапшылық қызметтінде еңбек еткен.
Қоғамдық жұмыстар мен білім саласындағы қызметімен қатар отбасындағы ана, жар, келін секілді міндеттерінің де межесінен шығып жүрген аяулы жан. Бұл жайлы «Бала тәрбиесіне келгенде тәжірибем көп көмектеседі. Халықтың баласы, өзімнің балам деген түсінік жоқ. Барлығы да бір қоғамда, бір ортада өмір сүріп, бір қазанда қайнап жатқандықтан өз балаларыма қалай болыссам, ұстаз ретінде өз шәкірттеріме соншалықты мейірімділік танытамын. Тіпті кейде өз балаларымды екінші орынға қалдыратын сәттер де кездеседі»,- дейді.
Міне, бүгінгі кейіпкеріміз Ұлжан Алибайқызы Есмаханова – аяулы жар, ардақты ана, ұлағатты ұстаз. Ұлжан ханым секілді қазақ әйелінің бейнесін абыроймен сомдап, үйде де, түзде де айтулы еңбек етіп жүрген ғұмыр иесінің өмір иірімдері көпшілікке үлгі болу керек.
Ш.ЖАЛҒАСБЕКҰЛЫ
