Гүлнұр Айдарқызы – талап пен мейірімділіктің үйлесімін тапқан ұстаз. Ол шәкірттеріне жоғары талап қойса да, әрдайым қамқорлық танытып, олардың жан-жақты дамуына жағдай жасайды. Студенттер арасында өткізілген түрлі шараларға Гүлнұр апайдың белсенді қатысуы мен ұйымдастыруы олардың шығармашылық және ғылыми әлеуетін арттырады. Мәселен, «Алаш деп ұрандаған ұлы ақын» атты облыстық мәнерлеп оқу байқауы және облыстық мүшәйра, «Байтұрсынов – тіл білімінің негізін салушы және қоғам қайраткері» колледжішілік ғылыми жоба байқауы, «Алаш деп ұрандаған ұлы ақын…» ғылыми-практикалық конференция арқылы Гүлнұр Айдарқызы студенттердің білімге деген құштарлығын арттырып, шығармашылық қабілетін ашуға зор үлес қосып келеді.
Г.Айдарқызы жоғары оқу орнын тәмамдап, аймақтық әлеуметтік-инновациялық университетінде «Қазақ тілі мен әдебиеті» мамандығы бойынша педагогика ғылымдарының магистрі дәрежесін иеленді. Бұл жоғары кәсіби білімі оның педагогикалық шеберлігін арттырып, заманауи білім беру талаптарына сай жан-жақты оқытушы болуына мүмкіндік берді. Кәсіби біліктілігін көтеру мақсатында Қ.Мұхамеджанов атындағы №1 мектеп-гимназиясында, №212 мектепте тағылымдамадан, сондай-ақ «Тіл мәдениеті және іскерлік қарым-қатынас тілі» техникалық және кәсіптік білім беру педагогтерінің кәсіби құзыреттіліктерін дамыту курсынан өтті. Үнемі кәсіби шеберлігін арттыруға ерекше көңіл бөлетін ол білім беру процесінде педагогикалық шеберлігін шыңдай түсуде де өндірістік тағылымдамалардан тәжірибе жинақтаған.
Гүлнұр Айдарқызы білім саласындағы белсенділігімен ғана емес, қоғамдық өмірдегі үлгілі қызметімен де ерекшеленеді. Ол облыстық және республикалық деңгейдегі түрлі шараларда әділқазы ретінде танылып, беделді маман ретінде бағаланады. Спорттық салада да белсенділік танытып, ұжыммен бірге волейболдан облыстық турнирлерге қатысып, 2024 және 2025 жылдары 2-орын иеленді. Оның еңбегі мен қызметі бағаланып жүр. Мәселен, техникалық және кәсіптік білім беру ұйымдарының педагогтері арасында өткен А.Ислямов атындағы ІІ республикалық «Үздік педагогикалық эссе» байқауында 2-орынға қол жеткізсе, Қызылорда облысының білім басқармасының Құрмет грамотасына ие болды.
Гүлнұр Айдарқызы өз кәсіби міндеттерінен тыс, облыстық және республикалық деңгейдегі маңызды шараларда әділқазы ретінде белсенді қызмет атқарады. Оның әділдігі мен біліктілігі көптеген шараларда жоғары бағаланған.
Шәкірттің табысы – ұстаздың мәртебесі. Гүлнұр Айдарқызының шәкірттері облыстық, республикалық және халықаралық байқаулар мен ғылыми жобаларда лайықты орындарға ие болды. Олардың жетістіктері – ұстаздың кәсіби шеберлігінің, қажырлы еңбегінің айқын дәлелі. Айтар болсақ, Айару Бақытқызы – ҚР Білім министрлігі мен «Өрлеу» орталығы ұйымдастырған «ІҮ халықаралық студенттік ғылыми ізденіс нәтижелері: талдау және мәселелер» байқауының 3-орын жеңімпазы, Диана Нұрхан – «ҚР 100 үздік студенті» республикалық байқауының жеңімпазы атанса, Нұрару Өмірзақ ІІІ республикалық Қ.Бітібаева атындағы олимпиада Алғыс хат иеленіп, «Жас көшбасшылар жазғы мектебіне» жолдама алды. Көптеген шәкірттері жыр мүшәйралары мен мәнерлеп оқу сайыстарында жүлделі орындарды қанжығаларына байлаған. Солардың ішінде Аружан Сақтағанованы, Аяулым Жолдасованы, Ақмоншақ Берікті, Ақмаржан Нұрлыбекқызын, Ернұр Матығұловты, Шадыман Теміршеқызын ерекше айтуға болады.
Мен де Гүлнұр Айдарқызының шәкірті ретінде, оның маған тек ұстаз ғана емес, сенімді куратор, қолдаушы жан болғанын ерекше атап өткім келеді. Гүлнұр Айдарқызының шәкірттеріне деген ыстық ықыласы мен еңбегі әрқашан зор құрметке лайық.
Шәкіртке жұмсар жігерін,
Орындап ұлы парызды.
Мақтанышымсыз білерім,
Жанары нұрлы, жаны ізгі.
Білімге бастар жолды ұққам,
Жадымда шығар жиі үнің.
Аласармайды сондықтан,
Менің де шығар биігім.
Бексұлтан Санақұл
