Ұстаз деген бір ғана сөздің астарында қаншама еңбек, қаншама тер жатыр…
Мен бала күнімнен ұстаз болуды армандадым. Өсе келе арманым орындалып, жоғарғы оқу орнына түстім. Оқуды бітіріп, мектепке мұғалім болып қадам бастым.
Мұғалімдік жолына қадам басқаннан бастап менің алға қойған мақсатым — ұстаз болу, жас ұрпаққа сапалы білім беру, артымнан мақтан ететіндей шәкірттерді тәрбиелеу.
Қазіргі дамыған ХХІ ғасырда заман талабына сай білім беру өзекті мәселе. Оқушылармен тіл табысу, заман талабына сай жаңашылдықпен білім беру, білім мен тәрбиені қатар ұстау ол біздің мұғалімдердің міндеті деп білемін.
Мектеп жұмысы мен оқушы жетістіктерін өрістетудегі негізгі тұлға – мұғалім деп Стронг айтқандай, қазіргі таңда оқушыларға қалай оқу керектігін үйретіп жол ашатын, оқушы үніне назар қойып, ішкі уәжін тыңдай алатын, алға нақты мақсат қоя білетін жаңашыл ұстаз болу – ол біздің көшбасшы мұғалім екенімізді айқындайды деп ойлаймын.
«Жаңа мектепке — жаңашыл ұстаз» бола білу үшін психологтер «ұстаным» ұғымын адамның іс-әрекетке тұлғалық бейімділігімен тығыз байланыстырып отыр, ал әлеуметтанушылар оны жеке тұлғаның негізгі құндылығы деп есептейді. Осы айтылған тәмсілден түйетін негізгі ой, мұғалімнің ұстанымы оның көзқарасының қалыптасуына зор ықпал етеді, ал көзқарасы оның белгілі бір шешімдер қабылдауына, соның нәтижесіндегі сыныптағы іс-әрекеттеріне негіз болады деп ойлаймын.
Ал, мұғалім ұстанымын нақтылай түсу үшін Пажарестің оқыту сызбаларымен байланыстырып өтсем деп отырмын. Ол оқыту сызбасында ұстаным, көзқарас, шешім, іс-әрекетті нақты атап көрсетті. Бұл айтылған деректен түйетін ой, мұғалімде ұстаным болмаса, көзқарасы дұрыс бола алмақ емес, ал көзқарасы болмаса шешім қабылдай алмайды, ал шешім болмаса дұрыс іс-әрекет жасай алмайды деген нақты тоқтамға келіп отырмын.
Заман ағымына қарасаңыз, бүгінгі болып жатқан жаңалық оқушылар үшін мүлдем қызықсыз болуы мүмкін, ал біз оқушыларды қалай таңдандыра аламыз, жаңашыл ұстаз ретінде баланың таланты мен дарынын қалай аша білеміз деген ой санаға сұрақ болып тұрғаны бәрімізге мәлім. Ол үшін ең басты мақсат мұғалім өзін-өзі өзгертуі қажет деп ойлаймын. Өзін өзгерте алған мұғалім мектептің даму үдерісіне де, сапалы білім алуға оқу мен оқытуда нақты мақсат қоя алады деген сенімдемін.
Жаңашыл ұстаз болуға апаратын тағы бір қадам дәстүрлі оқытуды сабақта қолданбау, дайын білім беруге негізделген «дәстүрлі» әдіс арқылы алынған білімнің оқушылардың жинақтаған өзге білімдерімен тиімді сіңісе алмайды, біздің оқушыларымыздың жады механикалық есте сақтауға қалыптасқанын ескерсек, осылай жалғастыру оқушының үстірт білім алу жағдайларына алып келеді деп ойлап отырмын.
Сол себептен жаңашыл ұстаз ретінде айтарым, оқушыларға барлық жағдаяттарды өмірмен салыстыра отырып үйрету және өмірде пайдаға асыра алатын дүниелермен байланыстырып оқыту оқушының жадында мәңгі сақталады деген педагогикалық идея ұсынып отырмын.
«Өзіңе сен, өзіңді алып шығар, еңбегіңмен ақылың екі жақтап» деп, Абай атамыз айтқандай, алдыма қойған мақсатқа жету үшін білімімді шыңдап, мектептің даму үдерісіне өз үлесімді қосып келемін.
Мен өзіме, өзімнің алға қойған мақсаттарыма жететініме сенемін және әрекет етемін. Болашақ жас ұрпаққа сапалы білім беру – мұғалімдердің қолында.
Аида Абдиева,
№14 мектеп-лицейінің мұғалімі.
Арал қаласы.
