Көлік құралынан келетін қауіп көп

«Құласаң ат жалын тосады, есек тұяғын тосады» деген дана халықтың ұрпақтары көлікке «теміртұлпар» деп айдар тағып айтып жүр. Темірді қанша тұлпарға теңегенімен, жылқы жануары секілді жалын тоспайтыны анық. Керісінше, теміртұлпардың салдарынан адам өміріне қауіп төндіретін жағдайлар жиі орын алуда.

Өңірдің өзінде осы жылдың бес айында 155 жол көлік оқиғасында 47 адам қайтыс болып, 196-сы дене жарақаттарын алып, былтырғы жылдан жол көлік оқиғалары 12%, қайтыс болғандар 68%, жарақат алғандар 12% өскен. Бұл туралы «Балалар арасында жол қауіпсіздігін қамтамасыз ету» тақырыбында өткен брифингте облыстық полиция департаменті бастығының бірінші орынбасары Шамшидин Амитов айтып берді.

Сала маманының келтірген дерегіне сүйенсек, жол көлік оқиғаларының басты себептері жүргізушілер мен жаяу жүргіншілердің жол ережесін сақтамаандықтан болған. Сонымен қатар, ауырлығы жоғары жол апаттары жылдамдықты шамадан тыс асырудан, жолдың қарсы бағытына шығудан, жаяу жүргіншілер өткелінде оларға басымдық бермеу, маневр ережесін бұзу салдарынан болуда.

– Осы жылдың қаңтар айында «Самара-Шымкент» жолында «Мазда» минивен автокөлігі жол жағдайын ескермей, басқару жүйесіне ие бола алмай, жолдың қарсы бағытына шығып, жүк көлігімен соқтығысып, мазда минивен автокөлігіндегі 8 адам оқиға орнында көз жұмды. 4 сәуірде балабақша тәрбиешілері қауіпсіздік ережесін сақтамай, балалар тасымалдауға арналған көліктен түскен 3 жасар баланы қадағалаусыз қалдыру салдарынан, бүлдіршін көлік астында қайтыс болды. Облыс орталығында 25 мамырда жаяу жүргіншілер өткелінде «Камаз» жүк автокөлігінің жүргізушісі жеті жасар баланы қағып, баланың оң аяғын ампутация жасады. Бұндай қайғылы жағдайлар өте көптеп орын алуда, – дейді Шамшидин Егембердіұлы.

Желмен жарысып, жүйіткіп жүретін жүргізушілерді тәртіп тезгісіне салу мақсатында тәртіп сақшылары 16-22 мамыр аралығында «Қауіпсіз жол», 10-30 мамыр аралығында «Заңсыз жолаушы тасымалдаушы» профилактикалық іс-шарасын ұйымдастырған.

– Жалпы жыл басынан жол апаттылығының алдын алу бағытында 38702 жол ережесін бұзу деректері анықталды, оның ішінде жол көлік оқиғасына тікелей әсер ететін 15892 өрескел бұзушылықтар тіркелді. Тарқатып айтсақ, көлік құралын алкогольдік мас күйінде басқарған 324, қауіпсіздік белдіксіз 3137, ұялы телефонмен сөйлескен 866, жолдың қарсы бағытына шыққан 133, жаяу жүргіншіге жол бермеген 920, жылдамдық асырған 9890 жүргізуші және жол ережелерін бұзған 622 жаяу жүргіншіге әкімшілік шара көрілді. Жылдамдықты асырған 9890 дерегі қалада орнатылған автоматтандырылған жүйелермен анықталған,– дейді облыстық полиция департаменті бастығының бірінші орынбасары.

Профилактикалық іс-шара жиі жасалғанымен, жүйесіз кеткен жүргізушілер қала орталығында жылдамдықты шамадан тыс асыру дерегі азаймай тұр. Сала маманының айтуынша, осы себепті қала орталығында болған 69 жол көлік оқиғасынан 8 адам көз жұмып, 73-і дене жарақатын алған. Өкінішке орай оның ішінде 15 жол көлік оқиғасында 1 кәмелет жасқа толмаған жасөспірім қайтыс болып, 16-сы дене жарақатын алған.

– Адам өліміне әкелген жол көлік оқиғалары облыстың ішкі жолдары, яғни ауыл аралық жолдарда да тіркелген. Мысалы, осы жылдың 1 қаңтарында Әбдіғаппар ауылы мен Жаңақорған кенті аралығындағы жолда екі «Ваз» автокөлігі қарама-қарсы соқтығысып, 4 адам көз жұмды. Осыған байланысты жүргізушілер, жаяу жүргіншілер қала орталығында, ішкі жолдарда, республикалық трассада жолда жүру ережесін қатаң сақтайық. Жылдамдықты асыру, жолдың қарсы бағытына шығу, көлікті масаң күйде басқару адамдардың өміріне қауіпті екендігін естен шығармайық,– дейді Шамшидин Амитов.

Е.БАЛТАБАЙ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған