Өткен жылы Қызылордаға министрлер бірінен соң бірі келді. Президент пәрмен бергеннен соң ағылды. Бірі уәде берді, екіншісі ақша жоғын алға тартты, енді бірі өзімізге ақыл үйретіп кетті. Дегенмен Сыр еліне келмей, орынбасарларын жібергендер де болды. Солардың бірі ҚР Оқу-ағарту министрі болған Асхат Аймағамбетов. Орнына орынбасары Ғани Бейсембаев келді. Тамыз мәслихатында да ордаға осы жерлесіміз келген.
Ғани Бектайұлының сұхбаттарын көріп отырсақ, әңгімесінің түйіні мүмкінге саяды екен. Бізге келгенде де «мүмкінін» естідік. Содан жақсыға жорып, «қасиетті Сыр еліне екі рет келіп еді, үшінші келгенде министр болып келуі мүмкін» дегенбіз. Айтқанымыз айдай келді, Оқу-ағарту министрі орынтағына отырды. «Мүмкін» министрге «Жайлы мектеп» ұлттық жобасын сапалы іске асыру, оқу орындарының қауіпсіздігін қамтамасыз ету, саланы оқыту мен цифрландырудың озық әдістермелерін енгізу тапсырылды.
Екінші министр экологиялық аймақ саналатын бізге аса қажет. Бұрынғы Серікқали Брекешовтің орнын Зүлфия Сүлейменова ауыстырды. Су жаңа әрі жас Экология және табиғи ресурстар министрі бұған дейін журналистерге «Ет жемеймін, жануар терісінен тігілген киім кимеймін» деп сұхбат беріпті. Жас принципшіл «вегетариан» министрге Премьер-министр Арал теңізі мен Семей өңіріне қатысты мәселелерді шешу, су ресурстарын басқару және табиғат пен жануарлар әлемін қорғау жөніндегі міндеттерге қол жеткізу бойынша жұмыстарды жандандыру тиіс екенін тапсырды.
Көптің есінде «үңгір» және «пульт ауыстыру» әңгімесімен таныс Дәурен Абаевтың қызметін енді Асхат Оралов қолға алатын болды. Жас министрдің өткен жолына қарасаңыз, әр орында 1-2 жылдан қызмет жасапты. ҚР Мәдениет және спорт министрі атанған «жылдам» министрге Үкімет басшысы Қазақстанның тарихи-мәдени мұрасын сақтау және дәріптеу, республиканың халықаралық аренадағы беделін арттыру, сондай-ақ спортты дамыту тәсілдерін өзгерту екенін назарына салды. «Бұқаралық спортты дамытуға баса назар аударып, кәсіби спортшылардың жаңа буынын даярлау деңгейін көтеруіміз керек. Барлық күш-жігер осыған жұмсалуы тиіс», — деді Әлихан Смайылов.
Дегенмен қызылордалық Садық Мұстафаев Раздықұлына разы емес. «Осымен Қазақстан спортының шаруасы тынды десек болатын шығар. Қазақта «шымшық сойсаң да қасапшыға бер» деуші еді. Спортты түсінбейтіндерді қайта-қайта ауыстырады береді, ауыстыра береді. Жетістігіміз төмен қарай кетіп барады, кетіп барады. Ешкімнің шаруасы жоқ. Судың да сұрауы бар емес пе? Әлде спортты басқаратын маман жоқ дейді ме? Жаңа Қазақстанды алға сүйрейтін азаматтарды не қолдамайды?» деп, бұл шешімге фейсбук әлеуметтік желісі арқылы қарсылығын танытты.
Айтпақшы, шынымен де, соңғы айтқан екі министрдің бірі эколог яки сушы, бірі мәдениеттанушы яки спорт шебері деп қалмаңыз, Асхат филология факультетінің бакалавриатын, халықаралық қатынастар факультетінің магистратурасын бітірсе, Зүльфия халықаралық қатынастар мамандығының бакалавриатын да, магистратурасын да тәмамдаған. Зүлфия бірер жыл Экология, геология және табиғи ресурстар министрлігінде отыз жасында басшылық қызметтер атқарыпты.
Содан кейінгі министрлер де белгілі болды. Қайырбек Өскенбаевты Марат Қарабаев ауыстырып, ҚР Индустрия және инфрақұрылымдық даму министрі болса, Қанат Мусинның орнына Әділет министрі қызметіне Азамат Есқараев тағайындалды.
Елдің аузында бір-ақ сұрақ: жаңа министрлер саланың көсегесін көгерте ала ма? «Аузы күйген үрлеп ішеді» деген осы болар, бәлкім?..
К.Масин
