бұл сөз қаншалықты шындыққа жанасады?
Кәсіптің көлеңкелі тұстары көп. Қант тапшылығын қолдан жасап, нарықтағы бағаны күрт көтеріп, кәсіпкерлердің қантты жоғары бағада сатуы – соның дәлелі.
Соңғы уақытта Қазақстанның көптеген аймағындағы барлық дүкендерден қант өнімдері түрлерін жаппай сатып алу жағдайлары орын алуда. Осының салдарынан кіші дүкендердің сөрелерінде қант өнімі қалмауда. Ірі супермаркеттер қанты тәулігіне шектелген мөлшерде шығаруға мәжбүр. Бұл жағдай біздің өңірде де кездесуде. Алайда, брифингте облыстық ауыл шаруашылығы басқармасы басшысының орынбасары Айнұр Тлеулеева:
– Елімізде қалыптасып, халықты дүрліктіріп отырған ақпараттың шығуының басты себебі – әлеуметтік желілерде бірнеше күн қатарынан кейбір азық-түлік өнімдерінің, соның ішінде қанттың тапшылығы орын алуы мүмкін деген дүрбелең туралы хабарламалардың таралғаны. Нәтижесінде, бұл дүрбелеңге әкеп соқтырып, қант өнімінің сұранысың артуына және жеке сатушылар тарапынан алыпсатарлықтың көбеюі орын алуда. Бүгінгі күні елімізде қант тапшылығы жоқ. Қазақстанның қант өндірісі күнделікті өндірілуде. Ал, сырттан алып келінетін қант көлемі өз деңгейінде жүргізілуде. Қант қоры үнемі жүйелі түрде толықтырылып отыр, – деп, негізгі ойын шегелей түсті.
Айнұр Маратқызының айтуынша, қазіргі таңда облыс бойынша 334,2 тонна шамасында қант қоры бар. Оның ішінде, сауда үйлерінде 106,6 тонна, ал тұрақтандыру қорында 100 тонна өнім сақталуда. Бұдан бөлек тұрақтандыру қорының сауда әріптестерімен 125 тонна қантпен қамтамасыз ету жөнінде келісім-шарт бойынша міндеттемелері бар. Сондай-ақ, тұрақтандыру қорына наурыз айында «Азық-түлік келісім шарт корпорациясы» ҰК» АҚ арқылы қосымша 136 тонна қант өнімін сатып алу бойынша жұмыстар жүргізілуде. Жыл соңына дейін «Азық-түлік келісім шарт корпорациясы» ҰК» АҚ арқылы 3314,8 тонна қант көлемін жеткізу көзделуде.
Облыс бойынша тұрақтандыру қорының қант өнімі 36 әлеуметтік дүкенде және ірі сауда орындарының әлеуметтік бұрыштарында 263 теңгеден сатылуда.
Сала маманының сөзіне сенгің-ақ келеді, әсілінде қант таппай жүрген тұрғындар мен қанттың сөредегі сатылу бағасын көргенде облыстық ауыл шаруашылығы басқармасы басшысының орынбасарының сөзі санаға сыймайды.
Хош, халыққа қолдау ретінде өнімдерді нарықтағы бағадан төмен сататын өңірдегі 36 әлеуметтік дүкен мен 15 әлеуметтік бұрышта 1 күнде 1300 кило қант сатылады дейік. Десе де, бұл өнім өңір халқына толық жетпейтіні түсінікті.
Азық-түлік дүкендерін аралап көрдік. Қант бағасы қалтаны қағып тұр. Құны – 460 теңге. Халық қанттың қымбаттағанына қарамастан сөредегі қанттарды түгелдей сатып алып кеткен. Ал, әлеуметтік дүкенде қант жан басына екі килодан берілуде. Тек, саудагерден қанттың келер уақытын біліп, сол сәтке түссеңіз 263 теңгеден алуыңызға мүмкіндік бар.
Елдос АСАН
