Білім саласы – сан түрлі шындалуды, әр уақытта маман білімінің дамытып, жаңа ізденістер үстінде жүруді талап ететін бағыт. Қырық жыл бұрынғы иеленген қатырма қағазыңызды құшақтап іс қылатын сала емесі де белгілі. Соңғы уақыттағы ақпарат ағынының тым қарқындылығы да тұралап қалуды тәуір көрмейді. Бүгінгі игергеніңіз ертең-ақ ескінің қалыбын киетін қоғамда жаңашыл, тұрақты білім алушы, кәсіби біліктілігін арттырып отыратын маман сұраныс биігінде болмақ. «Заманың түлкі болса, тазы болып шал» деген ұстанымды ұстанған білім саласының мамандары бұл межеден де мүдірмей шығып келеді. Түрлі білім бәйгелері мен оқытулар, әдістемелік көмек секілді жұмыстар жүйелі ұйымдастырылуда. Осындай бағытта берер нәтижесі жоғары, күтілер үміті биік, өміршең жобалардың бірі — «Worldskills Kazakhstan» ұлттық чемпионаты.
Жыл сайын өз шымылдырығын түретін жарыс «сен тұр, мен атайын» дейтін кіл мықтыларға ғана жеңіс тұғырын көрсететін биіктік, білім өлшемі. Сондай-ақ, техникалық және кәсіптік білім беру мамандықтарын даярлаудағы үлкен қозғалыс. Жұмысшы мамандықтарының мәртебесін арттыру және кәсіби біліктілігін жоғарылатудағы таптырмас құрал. Айта кетейік, атаулы чемпионат 2014 жылдың тамыз айында Қазақстан мемлекетінің халықаралық Worldskills қозғалысының мүшесі болуынан бастау алған болатын. Осы бастамалар негізінде келесі жылы Білім және ғылым министрлігінің бастамасымен «Worldskills Kazakhstan» ұлттық чемпионаты өткізілген. Міне, сол жылдардан бастап білім бәйгесі жыл сайын тұрақты ұйымдастырылып, жаңа есімдермен, жаңа білімді жастармен толықтырылып келеді. Сол уақыттағы Білім және ғылым министрі болған Ерлан Сағадиев «Worldskills Kazakhstan» ұлттық чемпионатының негізгі идеясы туралы: «WorldSkills – жұмысшы кәсібінің мәртебесін арттырып қана қоймай, кәсібилікті насихаттауды мақсат ететін коммерциялық емес қозғалыс. Бүгінде техникалық және кәсіптік білім беру сапасын арттыру – министрлік алға қойып отырған басты мақсаттардың бірі. Жас мамандардың кәсіптік шеберлігіне қолдау көрсетуге кәсіпорындардың өкілдері, жұмыс беруші компаниялар, сондай-ақ колледж бен ЖОО студенттері және мектеп оқушылары қатысуда. Мен барлығына алғысымды айтқым келеді. Жыл сайын ұлттық чемпионатқа қатысушылардың саны артып келеді. Біз қазір осы WorldSkills бағдарламасын негізге ала отырып барлық колледжде білім беретін бағдарламаларды өзгертіп, 500 оқулықты қазақ, орыс тілдеріне аударып, аталған бағдарлама арқылы студенттерге білім береміз»,- деген болатын. Қазірде де чемпионат өз мазмұнынан айнымай, тұрақты қозғалысқа айналып отыр.
«Worldskills Kazakhstan» ұлттық чемпионатының өңірлік қозғалысы да қарқынды дамып келе жатыр деуге әбден болады. Жыл сайын қатысушылар саны артып, жаңа құзіреттіліктер қатары көбеюде. Бәсеке бағамы да тым мықты. Сыр Алаштың анасы атанған облыстың орталығы Қызылорда қаласында орналасқан М.Мәметова атындағы Қызылорда педагогикалық жоғары колледжінде де атаулы чемпионаттың орны ерекше. Апта басында «WorldSkills College-2023» чемпионатының колледжішілік кезеңінің ашылу салтанаты өтті. «Worldskills Kazakhstan» ұлттық чемпионаты білікті кадрларды даярлауға, жаңа идеялар мен трендтер жасауға, кәсіби білім сапасы мен кәсіби шеберлік дағдыларын арттыруға мүмкіндік береді. Байқауға қатысушылар «Мектепке дейінгі тәрбие», «Кіші сыныптарда оқыту», «Web дизайн және әзірлеу» құзыреттілігі, «Сән технологиясы» құзіреттіліктері бойынша 51 білім алушы бақ сынасады. Чемпионат 13 ақпан – 17 ақпан аралығында өткізіледі. Кәсіби шеберлік байқауын ашу үшін сөз кезегі колледж директоры Жақсыгүл Қоханқызы Тоғановаға беріліп, өз сөзінде WorldSkills халықаралық қозғалысының тарихына тоқталып, елімізді дамытуда жұмысшы мамандығының маңызды рөлі атқаратынын атап өтіп, чемпионатқа қатысушыларға сәттілік тіледі.
Колледждік кезеңнен оқ бойы озық шығып, білімімен дараланған білімгерлер облыстық кезеңге жолдама алады. Ұлттық чемпионаттың республикалық кезеңінде де Мәншүк ізбасарлары өңір намысын жоғары деңгейде қорғап жүр. Өткен жылдың желтоқсан айында Елорда төрінде өткен «Worldskills Kazakhstan 2022» VII республикалық кәсіби шеберлік чемпионатында облыс намысын қорғаған М.Мәметова атындағы Қызылорда педагогикалық жоғары колледжінен «Мектепке дейінгі тәрбие» құзіреттілігі бойынша Сәуле Нұрымбетова «Алтын жүлде» иегері атанса, «Кіші сыныптарда оқыту» құзіреттілігі бойынша Аружан Сьездқызы «Үздік маман» номинациясының иеленген-ді. «WorldSkills Kazakhstan-2022» кәсіби шеберліктің VII республикалық чемпионатының ашылу салтанаты өткен дүбірлі додаға еліміздің барлық өңірлерінен 500-ден астам жас маман, WorldSkills өңірлік турларының жеңімпаздары 30 ресми құзырет бойынша сайысқа түскен болатын.
Кәсіби білікті маман даярлауда сан тараулы жол тауып, жүйелі жұмыс өрнегін көрсетіп отырған білім мекемесіне де, колледж басшысы мен ұжымына сәттілік тілейміз. Биылғы білім бәйгесінде де Мәншүк жастарының мәртебесі биік, олжасы салымды болсын.
Ш.ЖАЛҒАСБЕКҰЛЫ
