Бала әрбір отбасыға жарық алып келетін нұр секілді. «Балалы үй базар» деген секілді, әрбір отбасында сәбидің сыңғырлаған күлкісінің шығуы ата-ананың көңіліне қуаныш сыйлайды. Балаларды қорғап, оларға көңіл бөлу – әрбір азаматтың парызы. Бүлдіршіндердің баянды болашағын қалыптастыру мақсатында балаларға арналған түрлі жобалар жүзеге асырылып жатыр. Баланың қауіпсіздігі, сапалы білім алуы, денсаулық жағдайларының бірқалыпты болуы мемлекеттің бақылауында. Баланың мемлекет капиталы болуы сол себепті. Жергілікті әкімдік балаларға қажетті тиісті шаралар жасауын тоқтатқан емес. Жыл сайын балалардың шығармашылығын арттыру үшін қолдап, көмек көрсетіп келеді. Биылғы 1 маусымда халықаралық балаларды қорғау күні Президент паркінде ұйымдастырылды. Мерекелік іс-шараға аймақ басшысы Нұрлыбек Нәлібаев қатысып, балаларды құттықтады. Паркте арнайы «Мен бақытты баламын» музыкалық би композициясы мен дрон шоу балаларға мерекелік көңіл-күй сыйлау үшін ұйымдастырылды.
— Біз ел болашағы – білікті де білімді ұрпақ қалыптастыруда барлық мүмкіндіктерге жол ашамыз. Мемлекет басшысы Қасым-Жомарт Кемелұлы Тоқаев 2022 жылды балалар жылы деп жариялағаны белгілі. Атаулы жылда сырбойылық балалардың игілігі үшін 80 спорт-ойын алаңы пайдалануға берілді. Сонымен қатар Жалағаш ауданында 200 орынға арналған Оқушылар үйі, 50 орындық Өнер мектебі ашылды. Осы кезге дейін қаламызда бір ғана Оқушылар үйі болса, биыл сол жағалаудан «ҚазГерМұнай» компаниясының демеушілігімен 350 орынға арналған заманауи үлгідегі Оқушылар сарайының құрылысы басталды. Мемлекет басшысының қолдауымен «Жайлы мектеп» ұлттық жобасы аясында алдағы 3 жылда біздің өңірде 15100 орынға арналған 21 заманауи мектеп құрылысы жүргізіледі. Биыл 10 мектептің құрылысы басталады, оның 5-еуі облыс орталығынан салынады. Осы жоба аясында апатты мектептер мәселесі шешіледі,– деді аймақ басшысы.
Қаладағы 4 мектепке үш ауысым мәселесін шешу үшін қосымша ғимараттар салынуда. 5000-ға жуық орын тапшылығы аталған ғимараттардың арқасында жойылады деп күтілуде. Инвесторлардың қаражаты есебінен салынған мектептер бүгінгі таңда 24-ке жетіп отыр. 8 жеке мектеп ашу жұмыстары алдағы жылдарға жоспарланған. 5 жаңа мектеп жыл соңына таман оқушылардың игілігіне табысталмақ.
Қызылорда қаласындағы «Сабалақ» елді мекенінде жуырда ғана дарынды балаларға арналған 150 орындық мектеп-лицей-интернаты пайдалануға берілді. Қармақшы ауданында да жаңа оқу жылында 150 орындықтан тұратын мектеп-инернат ашылмақ. 300 орындық жатақханасы бар 400 орынға арналған «Физика-математика» бағытындағы мектеп-интернат салу жобасы Үкімет басшысының Сыр еліне сапары кезінде қолдау тапты. Мектеп құрылысы бүгіндері қарқынды түрде басталып, жасалуда. Тағы бір жаңалық, биыл 5 жаңа мектеп жыл аяғына дейін ел игілігіне табысталатын болса, алдағы 3 жылда 64 балабақша ашу жоспарға қойылған.
Олимпиада және ғылыми жоба жеңімпаздарын аймақ басшысы іс-шара барысында марапаттады. 9 жаңа автобустың кілтін, балаларға лагерьге жолдама, BILIMBOOK құрылғыларын білім беру ұйымдарына табыстады. «Қазақстан – бақытты балалық мекені» тақырыбындағы апаталықтар бүгіннен бастап тамыз айына дейін өткізілмек. Мәдени-рухани, спорттық, зияткерлік іс-шаралар, қайырымдылық акциялар бүлдіршіндерге арналып ұйымдастырылмақ.
Халықаралық, республикалық ғылыми-жобалар мен олимпиадалардан, спорттық турнирлерден, өнер конкурстарынан 400-ге жуық сырбойылық өрендер үздік болып, жеңімпаз атанды. Сыр өрендері лайықты қолдау нәтижесінде білім бәсекесінде топ жарып, облысымыздың абыройын арттыруда. Жалпы білім беретін пәндер бойынша республикалық олимпиадада командалық есепте оқушыларымыз жаратылыстану бағытында ІІ, гуманитарлық пәндер бойынша ІІІ орынды иеленді. Өңіріміз республикада 4 және 9-сынып оқушылары арасындағы білім жетістіктерін бағалау мониторингі бойынша үздік үштіктер қатарына кірді. 1-10 сынып оқушыларының 98 пайызы жазғы демалыс кезінде тынығу лагерьлерімен, әр түрлі сауықтыру, жұмыспен қамту, үйірме, экскурсиямен қамтылмақ.
Сондай-ақ, бүгінгі күн 8 мыңнан астам жас түлек үшін толқынысты әрі қимас шақ. Ұлттық бірыңғай тестілеуге 7421 түлек қатысады. Түлектердің 537-і «Алтын белгіге», 915-і «Үздік аттестатқа» үміткер. Сонымен қатар жалпы білім беретін пәндер бойынша халықаралық, республикалық олимпиадалар мен ғылыми жобалардан Қызылорда облысының дарынды оқушылары 103 медальге ие болды.
Бүгінде аймағымызда 280 мыңға жуық бала бар. 60 мыңнан астам бала облыстағы 686 мектепке дейінгі ұйымда тәрбиеленуде. 2-6 жастағы бүлдіршіндердің 88,8 пайызы, ал 3-6 жас аралығындағы балалар 100 пайыз балабақшамен «Білімді ұлт» ұлттық жобасы аясында қамтылып отыр. Жыл басынан қазірге дейін 1561 орындық 13 жеке балабақша балаларды қабылдады.
Облыс әкімі халықаралық балалар күніне орай облыстағы мамандандырылған Сәби үйіне де барып, жұмыстарымен танысты. «Бар мейріміміз – балаларға» атты ертеңгілік шараға аймақ басшысы қатысып, балалардың өнерін тамашалады. Балаларға мерекелік сыйлық табыстап, естелікке суретке түсті. Аймақ басшысы Нұрлыбек Машбекұлы іс-шара барысында мекеме тәрбиеленушісі Әділбек Санжардың тұсауын кесіп, алғашқы қадамына ақ жол тіледі.
Сонымен қатар, облыс әкімі Сәби үйінде 2022 жылы демеушілік арқылы салынған тұзды шахта бөлмесін, 2020 жылы іске қосылған сенсорлық бөлмені, егу, емдік-денешынықтыру, физиотерапия кабинеттерін аралады. Мекемеге үш жыл бұрын қондырылған цифрлы бейнебақылау жүйесін, ән-күй, Монтессори кабинеттерін, ата-ана мен баланың кездесу бөлмесін көріп, ұжымға сәттілік тілеп, мерекелік сыйлықтар тарту етті.
Сәби үйі 2012 жылы «Сәби» қайырымдылық қорының гуманитарлық көмегімен ашылған болатын. 60 орынға арналған нысанда, қазіргі таңда 45 бала тәрбиеленуде.
Облысымызда балалардың игілігі үшін сан алуан жұмыстар күн тәртібіне қойылған. Мемлекет тарапынан, облыстық әкімдік қолдауымен түрлі шаралар алдағы уақытта жасалатын болады. 1 маусымда қызық пен танымға толы түрлі бағдарламалар балалар үшін облыс орталығында да, барлық ауданда да өткізілді.
Қ.ӨТЕБАЙ
