Жазғы тынығу лагерьлері балалардың тынысын ашады

Мектеп табалдырығын ат­таған әрбір бала білім ұясы­нан сапалы білім алып, өмір жо­лындағы алғашқы баспалдақтарын сәтті қадаммен басады. Ұстаздардың берген білімі, шәкірттің білім алуға деген құштарлығы арқасында үздік оқушыға айналары сөзсіз. Жасөспірім кезеңнің де шегі бар екендігі, соңғы сынып­та әрбір оқушы білім алған орда­сымен қоштасары анық. Биыл­ғы оқу жылы да соңына жетіп, түлектер мектеппен қоштасып жатса, төменгі сынып оқушылары жазғы демалысқа шықты.

ҚР Оқу-ағарту министрінің 2023 жылғы 10 сәуірдегі №88 бұйрығына сәйкес, орта білім беру ұйымдарында 2022-2023 оқу жылы меншік нысанына және ведомстволық бағыныс­тылығына қарамастан оқу сабақтарының аяқталуы 2023 жылдың 31 мамыр күніне бекітілген болатын. 2022-2023 оқу жылы облысымызда 15546 оқушы 9-сыныпты, 8210 оқушы 11-сыныпты аяқтап, мектеппен қоштасты. 2-13 маусым аралы­ғында 9-сынып бітірушілер үшін, 5-19 маусым аралығында 11-сынып бітірушілер үшін қоры­тынды аттестациялау болады.

– Биыл соңғы қоңырау шарасы 1 маусымда Балаларды қорғау күніне орайластырып өткізілді. Салтанатты шараны өткізу туралы шешімді мектептер өздері дербес қабылдады. Техникалық және кәсіптік білім беру ұйымдарында дип­ломдарды салтанатты түрде тапсыру рәсімі 28 маусым мен 1 шілде аралығында өткізіледі. Ал 11-сынып түлектеріне аттес­тат тапсыру шарасы мектеп қабырғаларында 20-22 маусымда өткізілетін болады. Сынып сағаттары мен салтанатты жиын ұйымдастыру кезінде дипломдар мен сертификаттарды салтанатты түрде табыстау болады. Педагогикалық этиканы сақтау және сыбайлас жемқорлық құқық бұзушылықтардың алдын алу мақсатында іс-шараларды өткізуге, аниматорларды, демалыс агенттіктерін, жеке студияларды тарту үшін ата-аналардан қаражат жинау­ға жол берілмейді. Сонымен қатар, мектеп әкімшілігі мен мұғалімдерге сыйлық ретінде қаражат жинауға тыйым салынады. Бұл мақсатта облыс­тық білім басқармасы арнайы бұйрық шығарып, қалалық және аудандық білім бөлімдері арқылы барлық білім беру ұйымдарына тыйым салу жөнінде ескертілді. Ата-аналар мен оқушыларға түсіндірме жұмыстары жүргізілді,- деді облыстық білім басқармасының басшысы Мейрамбек Шермағанбет.

Жас түлектер өмірдің жаңа кезеңіне қадам басу үшін ҰБТ тапсырып бақтарын сынайды. Мемлекеттік грант жеңіп алу үшін облысымыздың барлық түлектері білімдерін ҰБТ тексереді. Биылғы оқу жылының қорытындысымен 7421 мектеп бітіруші түлек ҰБТ-ға қатысады деп жоспарланған. Арал, Қармақшы, Жалағаш, Сырдария, Шиелі ауданындағы бітіруші түлектер ҰБТ-ны мамыр-шілде айларында тестілеу пункті орналасқан аудандарға барып тапсырады. Облысымыз­да 3 Ұлттық біріңғай тестілеу орталығы жұмыс жасауда. Олар Қызылорда қаласында, Қазалы ауданындағы Әйтеке би кентінде, Жаңақорған кентінде орналасқан.

Сонымен қатар, балалардың жазғы демалысы да басталмақ. Облыс бойынша биылғы жылы 10 лагерь жұмыс жасамақ. 7 лагерь мемлекеттік, қалған 3 жеке жазғы тынығу лагері. Облыс бойынша лагерьлерде 8890 бала 7 ауысымда тынығып демалатын болады.

– Қала сыртындағы жазғы тынығу лагерьлерін қалпына келтіру бойынша тиісті жұмыс­тар 15 мамырға дейін аяқталып, бүгінде балаларды қабылдауға толық дайын. Сонымен қатар, облыс бойынша мектептердің барлығында мектеп жанынан күндізгі тынығу лагерьлерінің жұмысы ұйымдастырылады. Онда 98 мыңға жуық оқушы демалады. Жазғы тынығу лагерьлеріне бірінші кезекте ата-анасының қамқорлығынсыз қалған, көп балалы және аз қамтылған отбасылардан шыққан балалар жазғы демалыспен қамтылады. Бұдан басқа, 1326 бала жергілікті жердегі меценаттар мен кәсіпкерлердің демеушілігімен облыстан тыс жердегі лагерьлерде тынығады. ҚР Оқу-ағарту министрлігі «Қазақстан халқына» қоғамдық қорымен бірлесіп, дарынды ауыл балаларының интеллектуалдық, шығармашылық қабілеттерін жетілдіру және қолдау көрсету мақсатында 2023 жылғы жаз мезгілінде «Жаздық жолдама» әлеуметтік жобасы аясында облысқа 600 орынға квота бөлді. Оның 320 оқушысы Алматы қаласындағы «Спутник» балалар сауықтыру лагеріне, 280 оқушысы басқармаға қарасты Жаңақорған ауданындағы облыстық олимпиадалар және қосымша білім беру орталығында демалады,- деді Мейрамбек Зинабдинұлы.

Сондай-ақ, оқушыларға жазғы тынығу уақытында Сыр өңірінің тарихи орындарына, еліміздегі қалаларға Астана қаласы, Байқоңыр ғарыш айлағы, Шымкент қаласы (Ақмешіт үңгірі, Қазығұрт, Домалақ Ана), Тараз қаласы (Айша бибі, Қарахан кесенесі), Сауран, Сығанақ қалашығы мен Түркістан аумағының киелі жерлері (Отырар, Арыстанбаб кесенесі, Қожа Ахмет Яссауи, Гау­хар ана кесенесі), Қорқыт ата ескерткіш, экскурсиялар мен турлар, музейлерге 17300 бала саяхаттайды.

Мектеп жанынан балалардың жазғы уақыттағы бос уақытын тиімді пайдалану үшін аулалық клубтар, бұқаралық спорт пен салауатты өмір салтын қалыптастыру (волейбол, футбол, баскетбол, қол добы, стол теннисі, қазақша күрес, таэквондо), зияткерлік, дебаттық (тоғызқұмалақ, шахмат, дойбы, компьютерлік сауаттылық), техникалық (робототахника 3Д), өнер, тіл шеберлігін дамыту(би, ән айту, домбыра, «Шебер қолдар», сурет салу, бисер, кілем тоқу) бағыттарында оқушылар жазғы демалысын өткізетін болады.

Балалардың жазғы демалысын жоғары деңгейде өткізу үшін жергілікті басшылықтың көмегімен көптеген жобалар қолға алынып отыр. Балалардың жаңа оқу жылына жаңа шабытпен келуі үшін түрлі жағдайлар қарастырылған. Мектеп түлектері де ҰБТ-дан мүдірмей өтіп, еліміздің маңдайалды оқу орындарының студенті атанады деп сенеміз.

Қазақбай ӘНДЕШҰЛЫ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған