ҚОСЫМША ҒИМАРАТ ЖАҢА ОҚУ ЖЫЛЫНА ДАЙЫН

Қызылорда қаласындағы іргелі оқу орындарының бірі – Әли Мүсілімов атындағы №101 мектеп-лицейі. Жасыл мектеп атанған білім ордасының білім деңгейіне қызыққан ата-аналар балаларын осы жерге әкелуге құштар. Соған байланысты оқушы саны жылдан жылға көбейіп, орын санынан таршылық көріп келе жатыр еді. Бұл мәселе енді шешімін тапты. Мектеп жанынан қосымша ғимарат салынып, биыл пайдалануға берілетін болды.

Жақында облыс әкімі Нұрлыбек Нәлібаев мектеп-лицейі жанындағы қосымша ғимарат құрылысына барды. 600 орындық бұл мектепте қазір 2275 оқушы білім алуда. Сондықтан білім ордасын кеңейту мәселесі күн тәртібіне енгізіліп, қараша айында 375 орындық қосымша ғимараттың құрылысы басталған еді.

«Оқушы саны көп білім ошақтарының мәселесін тағы бір мектеп салып шешкеннен гөрі қасына осындай қосымша ғимараттар салған тиімді. Қазір қала орталығында бос жер жоқ болғандықтан, жаңа мектеп шет жаққа түседі. Оған балаларын қатынату ата-аналарға қиындық туғызады. Балалардың өз үйіне жақын, үйренген мектебінде оқығаны екі жаққа да қолайлы», -деді аймақ басшысы мәселені екінші қырынан қарап.

Жаңа оқу жылына қарай мектептің қосымша ғимараты оқушыларды қабылдауға дайын. Педагог мамандар да жеткілікті. Осы күні мектеп-лицейдің бастауыш сыныптарында мыңның үстінде оқушы оқыса, биыл 250 бала қабылданғалы жатыр екен.

Қызылорда қаласында қосымша ғимараттар №3, №264 мектеп-лицейлері мен Абай мектебінің жанынан да бой көтеруде. Ал, «Жайлы мектеп» ұлттық жобасы аясында Сыр өңірінде құны 100 млрд. теңгеден асатын 21 мектеп салынбақшы.

А.Әділжанұлы

Пікір үстеу

Э-пошта мекенжайыңыз жарияланбайды. Міндетті өрістер * таңбаланған