Қоғамдық көлік мәселесі әкімдікті әлекке салды

Бұған дейін қалаішілік қоғамдық көліктің мәселесін қаузап, жергілікті билікті әлденеше рет сын тезіне салдық. Әр жылдардағы салаға жауапты басшылардың қоғамдық көлікке қатысты уәделерін газетке басып, оқырмандардан сүйінші де сұрадық. Әсілінде, сала басшыларының берген уәделері сиырқұйымшақтанып кетеді. Оның ар жағында жауапкершілік жүгі тұрғанын басшылар сезінсе дейміз.

«Ұстаз мәртебесі» газетінің 2021 жылғы 22 қазанындағы санына «Далабаевтан қалған уәдені Оспанов орындай алды ма?» деген тақырыпта мақала жарық көрді. Көлемді мақалада қалалық тұрғын үй-коммуналдық шаруашылығы, жолаушылар көлігі, автомобиль жолдары және тұрғын үй инспекциясы бөлімінің басшысы Бауыржан Оспанов БАҚ өкілдерінің алдында брифинг өткізіп, «қоғамдық көліктегі мәселелерге 2021 жылдың желтоқсан айында нүкте қойылады» деп сендірген-ді. Десе де, жаңа жол сызбасы мен электронды төлем төңірегіндегі түйткілдердің түйіні әлі толық тарқатылмады. Бұл тумаған сиырдың уызына жерік болғанмен тең дүние секілді. Себебі, «түйенің етін» жеген жаңа жол сызбасының дайын болғанына қанша уақыт болсада, электронды төлем секілді әлі де бір ізділікке түспеді. Жауыр болған тақырыптың тиегін тарқатуға тура келеді.

Ғ.Қазантаев қала әкімі болып, тізгін қолына тигелі қоғамдық көлікті тәртіпке келтіру бағытында, күнде жиын өткізгенін білесіздер. Одан қалы «Қызылорда» автобус паркіне» барып, жағдаймен танысты да. Нәтижесінде, қоғамдық көліктегі қордаланған мәселелердің тиегі тарқатылу алдында. Оны қалалық тұрғын үй-коммуналдық шаруашылығы, жолаушылар көлігі, автомобиль жолдары және тұрғын үй инспекциясы бөлімінің басшысы Бауыржан Әліпбайұлының бізге берген жауабынан байқадық.

Қазіргі таңда «Қызылорда» автобус паркі» ЖШС-нің 5 бағытын (1, 11, 14, 17, 18) «SMSBUS» смартфон қосымшасы арқылы нақты уақыт режимінде бақылай алуға болады. Ал, жеке тасымалдаушылар жақын арада жаңа жүйе­мен жұмыс бастамақ.

– Электронды төлем жүйе­сі бойынша айтар болсақ, қазіргі таңда «Қызылорда» автобус паркі» ЖШС-нің 112 дана автобусына аталған жүйе орнатылып пайдалануға берілді. Қаламыздағы 4 жеке тасымалдаушы («Кад Нұр» ЖШС, «Ақмешіт жолаушы тасымалы» ЖШС, «Эм Бывалый» ЖШС, «Арғымақ Орда» ЖШС) серіктестіктердің автобустарына орнату жұмыстары жүргізілуде. Атап айтқанда, қазіргі таңда «Кад Нұр» ЖШС-не қарасты №12 бағыттың 15 автобусына және «Эм Бывалый» ЖШС-не қарасты №21 бағыттың 11 автобусына, «Арғымақ Орда» ЖШС-не қарасты №2 бағыттың 5 автобусына орнатылды, ендігі кезекте «Ақмешіт жолаушы тасымалы» ЖШС-нің бағыттарына орнату жұмыстары жүргізілуде,– дейді сала басшысы Бауыржан Оспанов.

Осы ретте айта кету керек, Қызылорда қаласында 26 жердегі аялдама жанына орнатылған электронды ақпараттық таблолар қазіргі таңда толық іске қосылып, «Қызылорда» автобус паркі» ЖШС-нің қызмет көрсететін 5 бағытын (1, 11, 14, 17, 18) келу уақытын нақты уақыт режимінде ақпаратын аралық уақыт жиілігін экранға беріп отырады. Сонымен қатар, жеке тасымалдаушылардың бағыттарына электронды төлем жүйесінің құрылғылары толық іске қосылғаннан кейін электронды ақпаратты таблоларға қосылмақ.

Сала басшысының сөзіне сенсек, Алматы қаласындағы Көлік және коммуникациялар ғылыми-зерттеу институты серіктестігімен әзірленген жол сызбалары Қызылорда қаласының полиция басқармасына 2022 жылдың 26 қаңтардағы №01-03/47 санды хатына сәйкес келісім алуға жолдаған. Жол сызбалары келісім алынғаннан кейін тасымалдау­шыларға аталған жол сызбамен жүруге тиісті тапсырма беріледі екен. Десе де, екі жылдан бері айтылып келе жатқан жаңа жол сызбасы нақты қай уақытта іске қосылатыны әзірге белгісіз, басы ашық күйінде қалды.

«Жаңа автобус» деп айдар тағып, әлде қандай қылып айтып жүрген «Қызылорда» автобус паркіне» тиесілі автобустардың жаңасы ескіріп, ескісін музейге тапсыратын жағдайға келіп қалды. Олай деуімізе, өткен апта отқа оранған автобус түрткі. Абырой болғанда адам шығыны жоқ. Дәл мұндай жағдай алдағы уақытта қайталануы ғажап емес. Себебі, парктің теңгеріміндегі әлі дәл сондай 135 дана автобус бар. Жауаптылар жағдай ушықпай тұрғанда, қоғамдық көліктердің техникалық жағдайының төмен болуына байланысты жылжымалы құрамды жаңалауды жоспарлап отыр.

Елдос ЕРБОЛҰЛЫ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған