Қызылорда қаласының әкімі Серік Қожаниязов әр кезде халықтың сөзіне ден қойып, пікірлері мен ұсыныстарын тыңдап жүреді. Қалаға қарасты ауылдарға да барып, жергілікті тұрғындардың өтініштеріне құлақ асып, олардың орындалуы үшін аянып қалған емес. Жақында қала тұрғындарын жеке қабылдады. Қала әкімінің қабылдауына egov порталы арқылы, е-otinish бірыңғай базасы немесе әкімдікке келіп жазбаша өтініш тастау арқылы жазылған тұрғындар келді.
Қабылдауға келген азаматтар тарапынан 16 мәселе көтерілді. Қабылдау барысында 4-не түсіндірме берілді. Бақылауға 12 мәселе қойылды, оның 4-уі қатаң бақылауға алынды. Дәлірек айтсақ, қабылдауға келгендер әлеуметтік бағытта көмек сұрап, денсаулық сақтау саласына, тұрғын үй, коммуналдық-шаруашылық, кәсіпкерлікті қолдауға қатысты уәждерін жеткізді. Бірқатар мәселе қабылдау барысында шешімін тапты. Ал, уақыт талап ететін сауалдар бойынша түсіндірме жасалып, жауапты сала басшыларына тапсырмалар берілді.
Мәселен, жер мәселесімен келген тұрғын Қызылорда қаласынан жер учаскесін алуға өтініш білдірмеген. Қабылдау барысында оған түсіндірме берілді. Ал, Жаппасбай батыр көшесі, 78 в үйдің газ мәселесі мен сол үйге өтетін жолды асфальттау мәселесіне орай газды қысқа мерзімде қосып беру мүмкіндіктерін қарастыруға газ мамандарын шақыртып, қазіргі таңда қанша тұрғын қоныстанғанын, жақын арада нешеуі көшіп келетінін, барлығын анықтау қажеттігі айтылды. Нәтижесін баяндауға тиісті орынбасарына жүктеді. Ал, Жаппасбай батыр,78 в үйге өтетін көшені арнайы барып қарап, асфальт төсеу мәселесімен ұсыныс енгізетін болды.
Қызылорда қаласы, Жетікөл 30 мекенжайындағы көп қабатты тұрғын үйді күрделі жөндеу жұмыстарын жүргізуге 2024 жылға тізімге енгізілді. Жоба-сметалық құжаттар әзірленіп, республикалық бюджетке өтінім ұсынылды. Бюджеттен оң шешімін тапқан жағдайда тиісті жұмыстар кезең кезеңімен атқарылатын болады. Мәселені айтып келген осы көшенің тұрғыны рақметін жеткізді. Мердігер мекемелермен сөйлесіп, әзірге өз қаражаты есебінен мүмкіндіктеріне қарай жұмысты жалғастыра беретіні айтылды.
Ендігі бір мәселе, Титов №31 үй тұрғындары күрделі жөндеу жұмысын жүргізуді сұрады. 2025 жылға бұл мекенжайындағы көпқабатты тұрғын үйге күрделі жөндеу жұмыстары жүргізілетін тізімге енгізілген. Қазіргі таңда жоба-сметалық құжаттар әзірленіп, бюджеттік өтінім ұсынылуда екен. Бюджеттен оң шешімін тапқан жағдайда тиісті жұмыстар кезең-кезеңімен атқарылатын болады.
Ойын алаңы салу туралы қозғаған тұрғынға 2024 жылға Жанқожа батыр көшесіне ойын алаңын салу жұмыстарын жүргізу үшін жоба-сметалық құжаттары әзірленуде, қажетті қаражат қарастыру мақсатында бюджеттік өтінім жолданатын болды.
Ендігі бір тұрғын әлеуметтік магазин ашатын жер сұрап келіпті. Сырдария өзенінің сол жағалауында №32 үйдің жанындағы бос жатқан жерге әлеуметтік дүкен ашқысы келген тұрғынға «Байқоңыр» әлеуметтік-кәсіпкерлік корпорациясы» АҚ-ның мәліметіне сәйкес, қазіргі таңда сол жағалауда №22 тұрғын үйдің алдында корпорация есебіндегі әлеуметтік дүкен жұмыс жасап жатқаны айтылды. Әлеуметтік дүкендер бойынша жер учаскесін аукционмен алу мүмкіндіктерін заңға сәйкес түсіндіріп берді.
Е.АСАН
