Жеті күнде – 61 қылмыс, 5 өлім, 6405 грамм сора!

Өткен апта ішінде Қызылорда облысы бойынша 61 қылмыс тіркеліпті. Сонда күніне Қызылордада 8-9 қылмыс жасалып тұр. Оның 30-ы кезекші тәулікте ашылып үлгірген.

Апта ішінде облыс көлемінде 2681 әкімшілік құқық бұзушылық, оның ішінде 1596 жол қозғалысы ережелерін бұзу деректері анықталған. Ал, жол-көлік оқиғасының 5 дерегі орын алса, салдарынан 5 адам қаза болып, 6 адам жарақаттанған.

Апта көлемінде учаскелік полиция инспекторларымен 9, жедел уәкілдермен 23, тергеу құрылымдарымен 1, патрульді полиция қызметкерлерімен 4 және жедел басқару орталығымен 2 қылмыс ашылыпты.

Облыс көлемінде «Қарасора-2023» жедел-профилактикалық іс-шарасы аясында құқық бұзушылық пен қылмыс­тың алдын алу, орын алған қылмыстарды ашу жұмыстары жүргізілуде. Қызылорда қалалық Полиция басқармасының қызметкерлері арнайы рейдтік жұмыстары нәтижесінде өз үйінің ауласында есірткі тектес сора өсімдігін өсірген 37 жастағы қала тұрғынын ұстапты. Аталған дерек бойынша ҚР ҚК 300-бабы 2-бөлігімен сотқа дейінгі тергеп-тексеру әрекеттері жүргізілуде. Сонымен бірге жедел құрылған полицейлер тобы және Қызылорда қалалық прокуратурасының қызметкерлерімен күдіктінің ауласында өсіп тұрған 24 түп сора өсімдігі айғақ зат ретінде тәркіленіп алынған. Сараптама қорытындысына сәйкес алынған түптер 6405 грамм сора өсімдігі болып шыққан. Күдікті азамат уақытша ұстау изоляторына қамалды.

Республика көлемінде есірткі қылмысының жолын кесуге бағытталған «Қарасора – 2023» шарасы 31 қазанға дейін созылады. 1 маусымнан бері облыс көлемінде барлығы 38 есірткі құқық бұзушылық анықталса, оның ішінде 17 дерегі есірткі өсіру, 2 дерегі есірткі өткізу, 1 дерегі аса ірі мөлшерде сақтау және 18 дерегі есірткіге байланысты қылмыстық теріс қылықтар. Заңсыз айналымнан 7 кг. марихуана және 366 кг. каннабис өсімдігі алынған. Есірткі өсірумен айналысқан 21 адам құрықталса, оның 6-уы қамақта. Қазалы, Сырдария, Шиелі аудандары аумағының далалық аймағынан ірі есірткі алқаптары анықталған.

Қ.Әндеш

Пікір үстеу

Э-пошта мекенжайыңыз жарияланбайды. Міндетті өрістер * таңбаланған