Құлшылық пен қайырымдылыққа ұласатын ұлық мереке – Құрбан айт та келіп жетті. Қасиетімен қадірі артқан мерекенің мезеті таянғанда жамағат жақсылық жасауға жарысып, арадағы арыздықты ұмытып, бауырмалдыққа бой береді. Құрбан айттың басты мақсаты – Алла разылығы үшін құрбандыққа мал шалу. Оны теңдей бөліп қажет деген жандарға үлестіріп беру. Бірлік бекемделіп, ырыс-құт таситын күні ұрысқа орын жоқ. Құндылығы дәріптелген мерекені шариғат шеңберінде тойлау шарт.
«Қазақстан Мұсылмандары Діни басқармасының мәліметіне сәйкес, Құрбан айт мерекесі 9-11 шілде аралығында атап өтіледі. Мереке қарсаңында жергілікті атқарушы органдар тарапынан дайындықтар басталды. Бұл бағытта облыс әкімінің орынбасарымен іс-шаралар жоспары бекітіліп, шаралар Қазақстан иұсылмандары діни басқармасының Қызылорда облысындағы өкілдігімен бірлесе жүргізіледі. Шараға дайындық барысында облыстағы аз қамтылған отбасылар мен мұқтаж отбасылардың базасы жасақталды. Биылғы жылы құрбандық шалуға ниетті халыққа оңтайлы болу үшін құрбан шалу оффлайн және онлайн форматтарда жүзеге асады. Онлайн форматта жүргізу үшін Қазақстан Мұсылмандар діни басқармасының qurban2022.kz сайты іске қосылды»,- деді облыстық қоғамдық даму басқармасының басшысы Мира Қазбекова.
Айт күндері облыс тұрғындары тарапынан мал сатып алуға сұранысының артуына орай мал құнын шарықтатпау, күнделікті тұтынатын әлеуметтік маңызы бар азық-түлік бағасын көтермеу, құрбан шалу орындарында санитарлық талаптардың сақталуы бойынша тиісті мемлекеттік органдарға тапсырмалар беріліпті. Сондай-ақ, тазалық пен тәртіптің жүйесін сақтап, таласушылықтың алдын-алу үшін бекітілмеген орындарда, оның ішінде мешіттердің аумағында құрбан шалуға әрекет жасаған жандар, тосқауыл қойылып, түсіндірме жұмыстары жүргізіледі. Соның негізінде құрбандыққа шалатын малдарды союға арналған арнайы орындар әзірленген. Қызылорда қаласында Белкөл кентінде мал союға арналған 2 қасапхана қызмет көрсететін болады.
Замира ДАСТАНҚЫЗЫ
