Үкіметте көтерілген мәселелер мен тапсырмалар Қызылорда облысында жүйелі жүзеге асып жатыр

Бүгінде елімізде қай салада болсын, оң өзгерістер орын алуда. Алға жүйелі жоспар құру, қатаң талап қою, ел игілігі үшін жасалатын жұмыстардың нәтижелі болуын қадағалау бүгінгі күннің режиміне енді. Үкіметтен бастап жергілікті облыс әкімдері әрбір тапсырманың орындалуын бақылауда.

ҚР Премьер-министрі Әлихан Смайлов­тың төрағалығымен өткен кезекті Үкімет отырысында бірқатар проблемалар талқыланды. Облысымызда Үкімет басшысы берген тапсыр­малар мен өзекті мәселелерді шешу жұмыстары жүктелді. Үкіметте көтерілген мәселелерге сай Қызылорда облысында атқарылып жатқан жұмыстарды рет-ретімен баяндаймыз.

Мектеп маусымы аяқталғаннан кейін оқушылардың жазғы демалыстары басталып, келесі оқу жылына тың серпіліспен келетіні белгілі. Білім нәрімен 9 айдан аса уақыт сусындаған балалардың жазғы каникулдарын есте қаларлықтай өткізгісі келетіні анық. Бірі отбасымен шетел асып, ауыл баласы қалаға, қала баласы ауылға демалуға аттанады. Мемлекет тарапынан да оқушылардың жазғы демалысын өткізуге жағдай жасалған. Жыл сайынғы дәстүрмен биылғы жаз мезгілінде балалардың демалысына көңіл бөлінуде.

Осы тақырып ҚР Премьер-министрі Әлихан Смайловтың төрағалығымен өткен Үкімет отырысында қозғалды. Балалардың жазғы демалысының тиімді әрі пайдалы ұйымдастыру, оқу жылының аяқталуы, қатты тұрмыстық қалдықтарды жинақтау мәселелері қаралды. Абай облысының Бородулиха ауданында болған өртті ауыздықтау бойынша баяндаманы Үкімет басшысы тыңдап, қауіпсіздікті үнемі назарда ұстап, бақылап отыру керектігін өңір әкімдеріне тапсырды.

Оқушыларды толыққанды, қауіпсіз демалыспен қамтамасыз ету туралы, мәдени-спорттық іс-шаралар ұйымдастырудың жұ­мыстары да талқыға түсті. Атқарылған жұмыстарды, алдағы жоспарлар жайлы ведомство басшылары баяндама жасады.

Күн тәртібіндегі екінші мәселе бойынша өңірлерде санк­цияланбаған қатты тұрмыстық қалдықтар полигондарына жүр­гізілген мониторинг нәтижелері таныстырылып, қалдықтарды өңдеу бағдарламасын бекіту тура­лы ұсыныстар айтылды.

Үкімет отырысынан кейін облыс әкімінің міндетін атқарушы Серік Қожаниязов облыстық білім басқармасы басшысына 2022-2023 оқу жылының аяқ­талуын Оқу-ағарту министрлігі бекіткен алгоритмге сәйкес ұйым­дастыруды тапсырды. Премьер-министр бекіткен өкімге сәйкес каникул кезіндегі балаларды сауық­тырудың, бос уақытын өт­кізудің, еңбекпен қамтудың жос­пары жасалуы керектігі айтылды.

Сонымен қатар, балалардың сауықтыру демалысын ұйым­дастыру бойынша өткізілетін мемлекеттік сатып алу кон­курс­тарына қойылатын талаптарды күшейту қажеттігі баса айтылды. Конкурс заң аясында өткізіліп, бірінші кезекте ата-анасының қамқорлығынсыз қалған, тұрмысы төмен деңгейдегі, жетім және көпбалалы отбасылардың, даму мүмкіндігі шектеулі балаларды, мүгедектігі бар балалар, сондай-ақ жалпы білім беретін мектептердің үздік оқушылары қамтылуы тиістігі ескертілді.

Тұрмыстық қалдықтарды өң­деу бағдарламасының жұмысын әзірлеу, жаңа полигондар салу, бұрынғыларды рекультивациялау бойынша іс-шараларды қарас­тыру жұмыстары жауапты тұлға­ларға тапсырылды.

Балаларға лайықты, ыңғайлы жазғы демалыс уақытын тиімді өткізу үшін арнайы орта­лық­тардың жұмыс жасағаны керек. Бастысы, оқушылардың қауіпсіздігіне толық жауап беріп, сақтық шараларына баса назар аударған жөн.

Инвестиция тарту мәселелері талқыланды

Өткен 4 айдағы негізгі капи­талға салынған инвести­ция­лар бо­йынша нысаналы инди­ка­­­торлардың орындалуы, ҚР Премь­ер-министрі Әлихан Сма­йылов­тың төрағалығымен өт­­кен инвестициялық штаб оты­­ры­­­сында талқыланды. Был­­­тырғы тікелей шетелдік инвес­тицияларды тартудың, ат­қа­рылатын жұмыстардың, шетел­дік инвесторлармен бірлесіп ірі жобаларды жүзеге асырудың жай-күйі қаралды. Жобалар тура­лы, алдағы міндеттер жайлы министрлер мен өңір әкімдері баяндап, таныстырды.

Облыс әкімінің міндетін атқарушы Серік Қожаниязов штаб отырысынан кейін мәжіліс өткізіп, биылға 424,2 млрд. теңге инвестиция тарту индикаторы бекітілгені туралы хабардар етті. Қаңтар-сәуір айларындағы меже 136,8 пайызға орындалғанын және Сыр өңірі республика бойынша алдыңғы қатарда екендігін айтты. Өткен жылғы оң тәжірибені қайтадан жүзеге асыру керек екендігін де тілге тиек етті.

— Премьер-министр өткен жылы өңірге іссапары кезінде құны 1 млрд. теңгеден асатын 5-6 жобаны іске асыруды тап­сыр­ды. Сәуір айындағы актив оты­рысында облыс әкімі Қы­зыл­орда қаласының әкіміне 1 млрд теңгеден асатын 1 жобаны, әр ауданның әкіміне 500 млн. тең­геден асатын 2 жобаны биыл іске қосуды тапсырған болатын. Оның орындалуы Мемлекет басшысының тапсырмасымен әзірленген жалпыұлттық жобалар пулы аясында бақыланады, — деп ескертті Серік Салауатұлы.

Облыстық энергетика және тұрғын үй-коммуналдық шаруа­шылық басқармасы Қызылорда қаласы және Шиелі ауданы әкімдіктерімен бірлесіп, биылғы жылы жаңа жылу электр орталығының құрылысын бастау, Шиелі ауданындағы күн электр станциясына қажетті жер телімін алуға сүйемелдеу жасау жүктелді.

Әуе қатынастары қызметін жақсарту жолдары қаралды

ҚР Премьер-министрі Әлихан Смайыловтың төрағалығымен өткен Үкімет отырысында аза­маттық авиацияны дамыту мәселелері қаралды. Жауапты сала басшылары баяндама жасап, тиісті тапсырма алды.

Облыс әкімі Нұрлыбек Нәлібаев Үкімет отырысынан кейін мәжіліс өткізіп, берілген тапсырмаларды өңірде орындау мәселелері талқыланды. Жер­гілікті әуежайда орындалатын рейстер санын ұлғайтып, қызмет сапасына мән беру керектігін облыс әкімі айтып, тапсырма берді.

— Өздеріңіз білесіздер, «Болат Өтемұратов қоры» «Қорқыт ата» әуежайының жаңа жолаушылар терминалын салуда. Құрылыс жұмыстарын жоспарланған мерзімнен 4 ай бұрын, яғни 2024 жылдың мамыр айында аяқтау көзделген. Қызылорда қаласы әкімдігіне әуежайдың сыртқы инженерлік-коммуникациялық инфрақұрылымдарын жеткізу және аумағын абаттандыру жүк­­телген. Бұл жұмыстарды мерзі­мінде аяқтауды қатаң тап­сырамын, — деді Нұрлыбек Машбекұлы.

2023 жылдың 22 мамырынан бастап аптасына 24 тұрақты рейс Қызылорда қаласының «Қорқыт ата» әуежайы арқылы орындалады. Астана қаласына 12, Алматыға 12 рейс қатынауда. Осы себепті облыс халқының сұранысына қарай әуе рейстерінің санын көбейту мақсатында облыс­тық жолаушылар көлігі және автомобиль жолдары басқар­масына жазғы мезгілде жұмыстар жүргізу тапсырылды. «Ашық аспан» режиміне қосылу арқылы бәсекелестік орта қалыптастыру үшін шетелдік компанияларды тарту, чартерлік рейстерді көбейту мүмкіндігін қарастыру керек.

«Қорқыт ата» әуежайына жақын орналасқан тұрғын үйлер, ауылшаруашылық мақсатындағы жер учаскелеріне қатысты әуе кемелерінің ұшу қауіпсіздігін сақтау мәселелері көптен бері көтеріліп келеді.

Қазақбай ӘНДЕШ