«2024 жылдың 1 қаңтарынан бастап 18 жасқа толмаған әрбір балаға арнайы шот ашылып, Ұлттық қордан ақша аударылады» деген хабар ата-аналарды елең еткізді. Ал, есепшотқа түсетін қаржыны Бірыңғай жинақтаушы зейнетақы қоры қадағалап отырмақ екен. Демек, зейнетақы қоры бірыңғай оператор болып бекітілмек. Президент бастамасымен іске асырылғалы отырған игі жоба 6,5 миллионнан астам баланы қамтитын көрінеді.
Ел президенті Қасым-Жомарт Тоқаевтың ұсынысы негізінде қолға алынған «Ұлттық қор — балаларға» жобасы төрт айдан соң іске қосылады. Демек, енді Ұлттық қор инвестициялық табысының тең жартысын автоматты түрде ашылған шоттарға аударады. Сәйкесінше, игі бастама аясында жыл сайын миллиондаған баланың шоты шамамен 90 мың теңгеге толығады. Ал, жинаққа инфляцияның әсері болмауы үшін қаржы шетелдік валютада сақталады. Яғни, 18 жыл ішінде әр баланың есепшотында кемі 3,5 мың АҚШ доллары жиналуы тиіс. Бірақ қордағы ақшаны мерзімінен бұрын шығарып алуға болмайды. Әрі кәмелет жасына толған азамат жинағын не тұрғын үй жағдайын жақсартуға, не білімін жетілдіруге жұмсауы тиіс. Ал, жоба аясында алғашқы һәм соңғы рет ақша алатын жеткіншектер жыл қорытындысына сай түскен қаржыны өзінен кейінгі іні-қарындастарына аударуына болады. Болмаса, банкке алғашқы жарна ретінде салып, жинауға мүмкіндігі бар.
З.Ахмет
