Мәдениет – ұлт өмірінің айнасы, ғасырлар бойы үзілмей келе жатқан халықтың рухани келбеті, мейірімі мен парасат-пайымы. Мәдениет – елдің ең басты рухани байлығы, асыл мұрасы. Қай елдің мәдениеті мықты дамыса, сол елдің еңсесі де биік болады. Бүгінде Еуразияның ең бай да бірегей мәдениетінің қатарына қазақ мәдениетінің де кіргендігі біз үшін үлкен мақтаныш. Дана халқымыз: «Өнер – ұлттың жаны» деп бекер түстемесе керек. Өркениетті ұлт, ең алдымен, тарихымен, өнерімен, әлемдік мәдениеттің алтын қорына қосқан үлесімен танылып, бағаланады. Бұл ретте Сыр бойы халқының да мәдениет мәйегіне қосып келе жатқан үлесі орасан. Соның ішінде Қызылорда облыстық филармониясын ерекше айтуға болады.
Қызылорда қаласының орталық алаңында кәсіби өнердің қара шаңырағы Қызылорда облыстық филармониясының 49-шы маусымдық жабылу концертін өткізген болатын. Ақын, әнші, дала композиторы Нартай Бекежановтың концерттік бригадасынан бастау алған өнер ордасы осыдан 50 жыл бұрын қараша айында құрылған екен.
Концертке Тұрмағамбет атындағы халық аспаптар оркестрі, камералық оркестр, «Ақмешіт» фольклорлық ансамблі, «Сыр самалы» вокалды аспапты ансамблі, «Томирис» би ансамблі қатысып, танымал кинофильмдерден саундтректер, әлемдік хиттер және қазақ, орыс композиторларының танымал әндері мен заманауи шығармалар орындады.
Атап айтқанда, «Пираты Карибского моря», «Игра престолов», «Игла», «Махаббат бекеті» фильмдерінен алынған саундтректер әлемдік және отандық киноны сүйіп көретін көрермендер назарына ұсынылды.
Жиналған қауым оркестр мен әншілерге қошемет көрсетіп, ризашылықтарын білдірді. Филармонияның 50 жылдығы осы жылдың күзінде кең көлемде атап өтілетін болады.
Концерттің дирижері халықаралық конкурстардың лауреаты Руслан Балмасов. Ал, концерт жүргізушілері Ақсамал Сағымбаева, Мөлдір Айсауытова және Амандық Жаппарбердиев кешті керемет әрі жоғары деңгейде тізгіндеді.
Ашық аспан астында өткен көңілді кештің сценарийін жазған және қоюшы режиссері «Мәдениет саласының үздігі» төсбелгісінің иегері Азиза Издикулова. Баса айта кету керек, дыбыс режиссерлері Алексей Коваль, Марлен Баймбетов пен дыбыс операторлары Айбек Қуатбаев, Медет Баймановтардың еңбегі де айрықша байқалып тұрды.
Халқымыздың бай мəдени мұрасы мен руханиятының дамуына үлес қосып келе жатқан азаматтардың еңбегі бағаланатын осы бір қорытынды кештегі елеулі күн ел өмірінің ең айшықты сәтіндей ыстық. Себебі қаламға серт еткен ақын-жазушының, өнер мен тарих тағылымымен таныстыратын музей қызметкерінің, білім бұлағымен сусындатқан кітапханашының, мазмұнды қойылыммен көрерменге ізгілік нəрін сыйлайтын театр, кино жəне опера əртісінің, өңірлердегі мəдениет ошақтарында қызмет етіп жүрген өзге де мамандардың еңбегі Қызылорда облыстық филармониясының қорытынды кешінде үйлесім тапты.
Айдар САЙЛАУОВ
