Қазақтың ұлы ақыны, поэзия зергері және жас ақындардың ұстазы Сағи Жиенбаев шығармашылығына зер салсақ, таң тамаша күй кешесің. Ақынның жырлаған тақырыбы мейлінше кең. Қазақ аталатын ұлы халықтың ұлттық қасиеттері мен бүгінгі күнге дейін бастан кешкен қасіреттерін өзіндік өрнекпен өрнектеп, айрықша сюжет құрып, ерекше байланыспен халыққа жеткізе білген. Ақын адалдық, азаматтық, кісілік, тазалық, ұғымдарының қай-қайсысын да балалық бейнесінде береді.
«Оқитын өлке» акциясы аясында 2024 жыл Сағи Жиенбаев шығармашылығына арналды. Осыған орай Д.Қонаев атындағы жалпы білім беретін орта мектеп-гимназиясында кітапханашы Аңсат Қайратұлының ұйымдастыруымен «Даламның исі бұрқырап» атты танымдық шара өткізілді.
Танымдық шараға мектебіміздің қоғамдық-гуманитарлық бағыттағы 10 «Г» сынып оқушылары қатысты. Алдымен оқушыларға Сағидың өмірі мен шығармашылығы туралы ақпарат беріліп, әрі қарай Сағидың жырлары жырланды. Оқушылардың білімдерін тексеру мақсатында «Бинго» ойыны арқылы кері байланыс алынды.
Қорытындылай келе, Сағи шығармашылығы балғын бөбектерден бастап өлең сүйер өрендердің қай-қайсысын да бейтарап қалдырмайды, елітеді, ерітеді, тербейді, тебірентеді.
А.Берегенов,
Д.Қонаев атындағы жалпы білім беретін орта мектеп-гимназиясының кітапханашысы
Ақтөбе қаласы
