Қызылорда қаласының мәдениет және спорт бөлімі үздік атанды

Өңірімізде өнер мен мәдениеттің деңгейі өсіп, жыл басынан бері ауыз толтырып айтарлықтай маңызды жұмыстар атқарылды. Оған дейінгі жүзеге асырылған игілікті істер туралы 2023 жылды қорытындылауға арналған алқа мәжілісі өткен еді. Өткен жылдың жетістіктері мен кемшін тұстары сараланған мәжіліске облыстық мәдениет, архивтер және құжаттама басқармасының бөлім басшысы Ж.Нұржақыпова, облыстық халық шығармашылығын дамыту және мәдени продюсерлік орталығы директорының орынбасары Р.Ділімбетова, сондай-ақ, бірқатар сала ардагерлері арнайы қатысты. Келелі жиынды қорытындылаған бөлім басшысы Ж.Тажмаханов бірқатар өзекті мәселелерді тілге тиек етіп, тиісті сала басшыларына нақты тапсырмалар жүктеген болатын.

Жыл қорытындысынан кейін Қызылорда қалалық мәдениет бөлімінің басшысы Ж.Тажмаханов мәдениет және спорт саласында 2023 жылы атқарылған жұмыстар және алдағы міндеттер туралы баяндап, баспасөз мәслихатын өткізді.

Рас, қала мәдениеті мен спорты үшін өткен жыл жемісті болды. Соның ішінде ерекше тоқталып өтетін бір жаңалық бұған дейін А.Тоқмағамбетов атындағы қалалық мәдениет үйі жанынан үйірме ретінде ашылған Жастар театрының аймақ басшысының қолдауымен өз алдына жеке мекеме болып құрылуы. Бүгінде Теміржолшылар клубына орналасқан аталмыш өнер ұжымы өз жұмысын бастап, алғашқы қойылымын көрермен назарына ұсынып үлгерді. Аталған қойылым белгілі жазушы, қоғам қайраткері Төлен Әбдіковтың әңгімесінің желісі бойынша және театрдың белді әртісі, жас драматург Нұрдәулет Баймаханның «Оң қол» психологиялық драмасы болатын. Премьера барысында Қазақстанның еңбек сіңірген қайраткері, театр саласының майталманы Хұсейін Әмір-Темір, Қызылорда облыстық мәдениет басқармасы басшысының орынбасары Қуаныш Қуантқанұлы және Т.Жүргенов атындағы қоғамдық қордың төрағасы Сәпен Аңсатов қорытынды сөз сөйлеп, ұжымға сәттілік тілеген болатын. Көрермен қауымның қолдау-қошеметіне бөленген туынды алдағы уақытта қайта сахналанатынын бөлім басшысы айтты.

Өткен жылдың жемісі сол, облыстық денешынықтыру, спорт және туризм басқармасының 2023 жылды қорытындылауға арналған алқа мәжілісінде қалалық, аудандық мәдениет және спорт бөлімдері арасында дене шынықтыру-сауықтыру, спорттық бұқаралық жұмыстарды жолға қоюға бағытталған байқау қорытындысымен Қызылорда қаласының мәдениет және спорт бөлімі үздік деп танылды. Бұл – жетістікке жету жолында аянбай еңбек еткен бапкерлер мен сайыпқыран спортшыларды, барша сала мамандарының еңбегі.

Енді биылғы жылдан үміт көп. Аймақ басшысының бастамасы негізінде Сыр елінде биыл «Руханият» жылы болып белгіленді. Осы орайда көптеген істерді жоғары деңгейде атқару жолға қойылды. Қала және қалаға қарасты кенттер мен ауылдық округтерде «Адал адам» мәдени-тәрбие орталығы жобасының 7 бағыты бойынша жұмыс басталып, мәдениет үйі қабырғасындағы үйірмелер қызметі жандануда. 2024 жылғы ақпан айынан бастап А.Тоқмағамбетов атындағы қалалық мәдениет үйінде «Адал адам» мәдени-тәрбие орталығы жобасы аясында оқушылар мен жасөспірімдерге тәрбиелік мәні бар фильмдер ұсыну мақсатында «Кино time» бағыты өз жұмысын бастаған болатын. Кезекті көрсетілімде оқушыларға зиян әдеттерден аулақ болу мақсатында Л.Ерубаеваның режиссерлығымен түсірілген «Менің атым қателік» атты фильм ұсынылды. Көрсетілімнен соң мектеп оқушылары мен қалалық Жастар театрының әртістері, сала мамандары фильмді талқылап, өз түйгендерімен бөлісті.

«Адал адам» мәдени-тәрбие орталығы жобасының «Сұхбат time» бағыты бойынша қонақ болған белгілі журналист, қаламгер, сатирик Нұрлан Көбегенұлы қазіргі қазақ әзілі туралы ойларымен бөлісті. Сұхбат Қызылорда қаласының мәдениет және спорт бөлімінің фейсбуктағы парақшасында жарияланып, көрерменге ұсынылды. Бұл бағыт бойынша да талқылаулар болды, ой-пікірлер айтылды.

Б.Санақұл

Пікір үстеу

Э-пошта мекенжайыңыз жарияланбайды. Міндетті өрістер * таңбаланған