Қызылорда қалалық Жастар театры қала күні қарсаңында жаңа маусымды жаңа қойылыммен ашып, ә дегеннен көрермен жүрегін жаулап алды. Иә, «Неге жаным шығарып сала алмадың?» атты лирикалық драма театр сүйер қауымға ұсынылды.
Тақырып бекер таңдалмағаны көрінеді. Қазақ әдебиетінің көрнекті өкілі, ақын-жазушы Зейнолла Шүкіровтің өмірі мен шығармашылығына арналған бұл қойылымның авторлары ақын, журналист Толыбай Абылаев пен Оңталап Нұрмаханов. Оңталап Дүйсенәліұлы драманың әрі режиссері, әрі сценаристі.
Спектакль желісінде сегіз жасар бала Зейнолла атан түйеден құлап, белін зақымдап алады. Қос аяғы сал болып қалса да, ол өз бетінше білім алып, кітап құмар болып өседі. Өмірге, өлеңге, өнерге деген құштарлық оны теңіздей терең ақынға айналдырады.
Режиссерлік шешімдермен жасалған азамат ақын Зейнолланың Мұқағали Мақатаев, Шәмші Қалдаяқовтармен кездесу сахналары суреттелген. Оқиға барысында ақын, Әйкерім есімді қызға ғашық болады. Оның ішкі жан-дүниесі лирикалық әндермен қатар махаббат сюжеттерімен бейнеленеді.
Қойылымның негізгі идеясы қоғамдағы шиеленістердің шешімін табу. Жастарды жігерлендіріп, өмірге деген құлшынысын арттыру. Жастардың өмір қиындықтарынан мойымай, қаншама ауыртпашылық болса да, армандарына қол жеткізуге болатынын түсіндіру.
Бала Зейнолла рөлінде Жастар театры жанынан құрылған драма үйірмесінің өнерпазы, Тәкей Есетов атындағы №264 мектеп-лицейдің 8 сынып оқушысы Ержігіт Сармырзаев шебер ойнап, көпшіліктің ықыласына бөленді. Ал, Азамат Зейнолла рөлінде Мұхаммедхан Алихановтың арба үстіндегі ролі сәтті шықты.
Жастар театрының бір ерекшелігі, дарынды оқушыларды театр өнеріне тартып, оларға сенім арта біледі. Бұл қойылымда үш бірдей оқушы сахнаға шықты. Ержігіт Сармырзаевпен қатар Жалғас рөлінде Темірбек Жүргенов атындағы №136 мектеп лицейдің 10 сынып оқушысы Ерәли Жақсығұлов, ал Әбілмәзін рөлінде Жанәбіл Нұрманов атындағы №198 орта мектептің 11 сынып оқушысы Асқар Ерасыл ойнады.
Қойылымда Нұрдәулет Баймахан Мұқағали рөлін, Әлмұхаммед Алдажаров Шәмші рөлін шебер сахналай білді.
Зал толы жастар қойылымды жоғары бағалады, әрбір қозғалысын бағып отырды. Соған сай өз реакцияларын байқатты: жылады, күлді, аямай қол соқты.
Кеш соңында театр ұжымына қала әкімінің ықылас гүлі табысталып, қалалық мәдениет және тілдерді дамыту бөлімінің басшысы Жағыпар Тажмаханов жастар театры ұжымының жаңа маусымына сәттілік тіледі.
Б.Бек
