Біраз уақыт «жасыл аймақта» болып, вирустан көзімізді ашып, есімізді енді ғана жиған едік. Дегенмен, табан астынан штаммдар таралып, әп-сәтте «қызыл аймақтан» бір-ақ шықтық. Сонымен қатар, індет те інінен қайта шығып, тіршілігімізге тұсау болды. «Тоқтамы болды-ау» дегенімізбен, тосқауылды да талқандап өршіп барады. Көптен бері өңіріміздің өңі кіріп, эпидахуал тұрақталып қалған еді, ол да қазір қалпын жоғалтып, күрт төмендеп кетті. Осыған байланысты жақында ғана Қызылорда облысының Бас мемлекеттік санитариялық дәрігері Динара Жаңабергенова шектеу мен карантиндік шаралар жайында қаулысын жариялады. Тәртіпке қайта бағынып, талаптарды орындау – жалпыға ортақ міндет.
Облыстық денсаулық сақтау басқармасының мәліметі бойынша, 2022 жылы короновирус инфекциясымен Қызылорда облысында тіркелген науқастар саны 1844. Айта кетейік, бір күннің өзінде өңірімізде 270 жағдай тіркелген екен. Күннен-күнге күрт көбейіп жатқан бұл дерт жұрттың дегбірін қашырып, дәрменін де қалдырмады. Сонда да кеселмен қарсы күресті жалғастырып келеміз. Ағымдағы жылдың 17 қаңтарындағы деректерге сүйенсек, облысымызда 1 компонентпен екпе алған адамдар саны – 418290, ал 2 компонентпен екпе алғандар саны – 393444. Ақ халаттылардың айтуынша, әлде де екпеге егілудің екпіні жиілемеуі тиіс. Қысқасы, аурудан айығудың нақ жолы осы болмақ. Құлантаза арылуға немесе ауырмауға кепілдік болмағанымен, бойды тәжді вирус батпандаған уақытта жеңіл өтуіне жәрдемдеседі. Жүйкеміз дәл осы тақырыпқа келгенде сыр беретіні рас. Шынтуайтында, екпе, вирус, карантин, талап деген сөздердің өзінен құлақ жауыр болды. Дей тұрғанмен, амал нешік? Бұған қатысты әңгіме ауаны басқа бағытқа бұрыла қоймас. Тіпті толастамасы да хақ.
Үрейді үдетіп, қорқынышты күшейтіп тұрған омикрон штамының елімізге енгені белгілі болғанымен, өңірімізге әлі дендей қоймады. Тек болуы мүмкін деген болжам бар. Десе де, сол болжамның өзі белең алып кетпесе болғаны. Мамандар айналымда болуы ықтимал омикронның облысымызда әлі анықталмағанын айтады. Десе де, сақтық шараларына салғырт қарамай, сақтанып жүру керектігін жеткізеді. Өйткені, бұл штамм үндістандық «дельта-штаммға» қарағанда 70 есе жылдам тарайды екен. Белгілері де біртіндеп анықталып, көпшілікті алаңдатып қойды. Ең алдымен тамақ аурудан басталып, дене қызуы көтерілетін көрінеді. Оның үстіне, адам тез арада шаршап, жиі әлсіреу пайда болады. Көк жөтелден кейін асқынып кететін штамм әлемді түгелімен дерлік шырқыратып, шырылдатып отыр. Себебі, балалар да қауіпті штаммның құрығына ілінуде. Кей мамандардың айтуынша, омикрон балаларда ауыр өтеді. Оның жұққыштығы жоғары, таралымы жылдам. Сайып келгенде, вирустың иммунитеті әлсіз, күш қуаты төмен адамдарды жағалайтынын, олардың бірден қабылдап алатынын негізге алсақ, қарт адамдар мен балаларда ауру ауыр өтіп, күресте қауқарсыз болуы мүмкін. Сондай-ақ, балалар жайын сөз еткен британдық дәрігерлер де омикро» штамы табылған балалардың 15%-ында бөртпенің белгісіз түрі анықталғанын, сақтанып жүру керектігі жөнінде кеңес берген еді. Сондықтан денсаулыққа бей-жай қарамаған абзал.
Әсте, әсірелеп отырғанымыз жоқ. Тек әлемдік тәжірибелерді айтып, белгілі болған белгілерден хабардар етудеміз. Тоқ етерін айтсақ, медицина мамандары жалғыз қорғаныс вакцина мен ревакцинация деген сөзінен тайқыған жоқ. Сақтық шараларын да сәт сайын еске салып тұр. Не де болса, саулығымыз өзімізге керек. Тәтті тыныштықты бұзған тәжді вирус пен қамсыздығымызға қауіп төндірген штаммдардың дәурені аяқталғанын тілейміз.
Замира ДАСТАНҚЫЗЫ
