Ұлттық жобаның ұлт денсаулығына ықпалы

Сау-саламат тіршілік кешудің, өмір сүрудің басты кепілі – мықты денсаулықта. Адам неғұрлым қайратты, иммунитеті жоғары болған сайын соғұрлым еңбекке қабілетті болады. Сәйкесінше бұл қоғам үшін де пайдалы болмақ. Яғни, халық денсаулығы – әрбір мемлекеттің әлеуметтік-экономикалық даму деңгейі мен жетістіктерінің көрсеткішін айқындап береді. Мемлекет дамуының алғышарты – дені сау ұрпақта болған соң, денсаулық саласы назардан тыс қалмайды. Әсте, өлім-жітім санының азайып, халықтың өмір сүру сапасын жақсарту мақсатында ұлттық жобалардың жоспары жасалып, басшылық тарапынан бекітіліп келеді. Денсаулыққа қатысты әр жобаның бағыттары мен күтілетін нәтижесі, әлеуметтік әсері көңіл көншітеді. Қолжетімді және сапалы медициналық көмекті жүйелі ұйымдастыру, салауатты өмір салтын ұстанатын халықтың үлесін арттыру сынды басым бағыттар ел азаматтарының өмір сапасының жақсаруына ықпал ететіні даусыз. Тіпті, бұқаралық спортты дамытудың өзі тиісті салада тиімді шешімдердің қабылданып жатқанына дәлел іспетті. Әсіресе, халықтың медициналық қызметтер сапасына қанағаттану деңгейін арттыру аталған жобаның денсаулық саласындағы өзекті мәселелерді түгел қамтамасыз етіп отырғандығын білдіреді.

Енді ұлттық жобалардың аясында денсаулық сақтау нысандарын салу көзделіп отыр. Осыған байланысты Үкімет басшысы Әлихан Смайыловтың төрағалығымен ҚР Президенті Қасым-Жомарт Тоқаевтың сайлауалды бағдарламасын іске асыру жөніндегі республикалық штаб отырысы өтті. Онда «Ауылда денсаулық сақтауды жаңғырту» пилоттық ұлттық жобасы аясында жаңа медициналық нысандар ашу және ішкі нарықта отандық дәрі-дәрмек үлесін 50%-ға дейін жеткізу мәселелері қаралды.

ҚР Денсаулық сақтау министрі Ажар Ғиният ауылдарда медициналық нысандар салу және отандық дәрі-дәрмек пен медициналық бұйымдардың өндірісін ұлғайту жайында баяндама жасады. Ведомство басшысы биыл ұлттық жоба аясында еліміз бойынша 309 медициналық нысан салынатынын айтты. Сонымен қатар ішкі нарықта қазақстандық дәрі-дәрмектің үлесін 33%-ға дейін жеткізу жоспарланған.

ҚР Премьер-министрі Әлихан Смайылов нысандардың инфрақұрылымын жеткізу және баратын жолын салуды тапсырды. Оған қоса құрылыс жұмыстары бойынша конкурстың уақытылы өтуі және емдеу мекемелеріне қажетті мамандарды даярлау жіті назарда болуы тиіс екендігін тілге тиек етті.

Республикалық штаб отырысынан соң облыс әкімінің бірінші орынбасары Серік Қожаниязов ҚР Премьер-министрі берген тапсырмаларды пысықтау мақсатында жиын өткізді. Нысандар құрылысын салу және дайындықты тиянақты жүргізуді тапсырды. «Ауылда денсаулық сақтауды жаңғырту» және «Жайлы мектеп» ұлттық жобалары бойынша атқарылатын іс-шаралар өңірлік жобалық кеңес аясында жүзеге асырылуы керектігін ескертті.

Бүгінгі күні «Ауылда денсаулық сақтау­ды жаңғырту» пилоттық ұлттық жобасы аясында Қызылорда облысында жалпы құны 9,7 млрд. теңгені құрайтын 27 нысан құрылысы жоспарлануда. Атап айтқанда, 24 дәрігерлік амбулатория, 2 фельдшерлік-акушерлік бекет, 1 медициналық бекет құрылысының тізімі Үкімет қаулысына енгізілді. Оның ішінде, 15 медициналық амбулатория мен 1 медициналық бекеттің құрылысы биыл салынатын болады.

Замира ДАСТАНҚЫЗЫ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған