Кез келген жан мұғалім мамандығын оқи алады, бірақ нағыз ұстаз болып қалыптасу ең қиынның қиыны. Ұлтым деген ұлағатты ұстаз алдындағы талап қай кезде де күшті болған, бірақ бүгінгі күні ұстаз – жаңалыққа жол бағыттаушы бағдаршам болуы қажет. Сән салтанаты келіскен кезеңде заңғар заманның бәсекеге қабілетті азаматын тәрбиелеп шығару – ұстаз шарапаты мен шапағаты екені әмбеген аян. Қай кезде болмасын, ұстазды ұлықтаған ұлы халықпыз. Шыбық тіксе, шынар болатын, таяқ тіксе, тал болатын, қыран ұшса, қанаты талатын кең байтақ қазақ даласының небір дарынды дарабоздарын дана еткен де сол ұстаз. Текті тегі түркі әлеміне мәшһүр Мағжан Жұмабаев: «Алты алаштың басы қосылса, төрдегі орын – ұстаздікі» дегендей, ұстазға деген құрметті осы бір сөздің өзінен-ақ аңғаруға болады. Осындай ұлы істің, қызығы мен шыжығы мол мамандықтың иесі болу – үлкен бақыт. Өйткені, аузынан ана сүті кеппеген, оңы мен солын білмейтін бүлдіршін баладан, еліміздің келер күнгі келбетін, бүгінгі заман талап етіп отырған маманды дайындап шығару ар алдындағы абыройлы жұмыс.
Басымызды көтеріп, еңсемізді тіктеп тұрып, өзінің уақытын аямайтын, өзгенің бақытын аялайтын, Қызылорда өңірінде педагог қауымға көрсетілер сый-құрмет жоғары деп нық сеніммен айта аламыз. Жыл сайын құрмет көрсету, шипажайларға жолдама беру, үздіктерге төсбелгі тағу, қаржылай сыйақы тағайындау өңірдегі мұғалімдердің мәртебесін арттырып келеді. Ал, биыл өңірде алғаш рет шәкірт тәрбиелеуде ұлттық ұстанымды биік қойып, ұстаздық қызметте табанды тер төккен 2 ардагер ұстазға Қызылорда облысының Құрметті азаматы атағы берілді.
Мерейлі мереке қарсаңында Қызылорда облысының әкімі Нұрлыбек Нәлібаев ұстаздарды төл мерекесімен құттықтап, аймақ дамуына қосқан үлестері үшін алғысын білдіріп, ыстық ықыласын жеткізді.
— Біз әрдайым Отанымыздың адал әрі абзал азаматтарын, шынайы патриоттарын тәрбиелейтін, Әділетті Қазақстанның жаңа буынын білім бәйгесіне қосатын ұстаздар қауымын ерекше қадірлейміз. Сәт сайын жаңарып, беталысы күнде өзгерген алмағайып дүниеде адамзат үшін ешқашан өзгермейтін құндылықтар бар. Ол – білім! Ол – еңбек! Бұл қос құндылықты да ұштастыра білген ұстаздардың қоғам алдындағы орны ерек, мәртебесі мерейлі!
Мұғалімдерді әлеуметтік көтермелеу мәселесін назардан тыс қалдырмаймыз. Ел Президенті халықаралық пән олимпиадаларының жеңімпаздарына бір реттік қаржылай сыйақы тағайындады. Балалардың ұстаздарын да моральдық және материалдық тұрғыдан ынталандырды. Біз де өз тарапымыздан дарынды балаларды қолдау саясатын лайықты деңгейде жалғастыратын боламыз,- деді Н.Нәлібаев.
Әкім биыл алғаш рет саналы ғұмырын шәкірт тәрбиелеуге арнаған Төлепберген Қасымов пен Марк Подольский ұстаздарымызға облыстың «Құрметті азаматы» атағын табыстады. Облыс басшысы бұл үрдісті дәстүрге айналдыратынын да жеткізді.
— Төл мерекеде еңбегімен елге танылған, абырой арқалап, шәкіртімен мерейі артқан бірқатар ұстаздарға марапат табыстадық. Ал, жыл қорытындысымен үздік нәтиже көрсеткен 10 мұғалімге 900 мың теңгеге жуық қаржылай сыйақы беру рәсімін өткіземіз.
Берекелі күздегі қазан айының алғашқы жексенбісінде ұстаздар күнін атап өтіп, ұлағатты мамандық иелеріне арналған салтанатты шараға қатысып, Сыр жұртшылығы атынан ілтипатымды білдірдім. Оқушы жүрегіне ізгілік дәнін сепкен ұлағатты, парасатты жандарды құттықтау – азаматтық және шәкірттік парызымыз.
Мерейлі сәтте барша Сыр ұстаздарын кәсіби мерекесімен құттықтай отырып, терең білімді ерен еңбекпен ұштастырып, әділетті Қазақстанның перзенттерін жаңашыл, жаңғырған болмыста тәрбиелеуде мықты денсаулық, қажырлы күш-қайрат, отбастарыңызға құт-береке, амандық тілеймін,- деді Н.Машбекұлы.
Салтанатты жиында облыс әкімі жыл қорытындысымен еңбегімен көзге түсіп, шәкіртімен білім бәсекесінде топ жарған ұстаздардың сый алатынын айтты. Иә, құлағына ақжолтай жаңалық жеткен ұстаздар өздерін одан әрі қамшылай түсері хақ.
Сонымен қатар шарада Сыр елінің үлгілі ұстаздарына ҚР Оқу-ағарту министрлігі мен облыс әкімінің атынан марапат табысталды. Бірқатар ұстазға «Алтынсарин» төсбелгісі, «Қазақстан Республикасы Оқу-ағарту министрлігінің «Білім беру ісінің құрметті қызметкері» құрметті атағы, «Қызылорда облысының білім беру саласын дамытудағы еңбегі үшін жергілікті ерекшілік белгісі» мен облыс әкімінің Құрмет грамотасы және Алғыс хаты табысталды. Ал, Ұлттық бірыңғай тестілеу көрсеткіші бойынша республика көлемінде «Үздік 100 мектеп» қатарына енген және үздік білім беру ұйымдарының педагогтарына ноутбук берілді.
Осы аталған марапат иелерін аты-жөндерін толықтай тарқатып айтып кеткенді жөн санап отырмыз. Қазақстан Республикасы Оқу-ағарту министрлігінің «Алтынсарин» төсбелгісімен Жалағаш ауданы, №202 З.Жарқынбаев атындағы орта мектебінің бастауыш сынып мұғалімі Ботакоз Азаматова, Қазалы ауданы Ы.Алтынсарин атындағы №204 орта мектебінің физика пән мұғалімі Ләззат Ізбасқан, Қызылорда қаласы, Абай атындағы үш тілде оқытатын дарынды балаларға арналған мамандандырылған сыныптары бар мектебінің директоры Жанат Садвакасова, Қармақшы ауданы, №121 орта мектебінің орыс тілі мен әдебиеті пән мұғалімі Болат Жұмабаев, Қызылорда музыкалық жоғары колледжі директордың оқу ісі жөніндегі орынбасары Марат Ахметовтер марапатталады.
Ал, Қазақстан Республикасы Оқу-ағарту министрлігінің «Білім беру ісінің құрметті қызметкері» төсбелгісімен Қазалы ауданы Б.К.Мергенбаев атындағы №226 мектеп-гимназиясы Информатика пән мұғалімі Нургуль Балгараева, Арал ауданы білім білім бөлімінің әдістемелік кабинет меңгерушісі Айбек Курманалиев марапатталады.
Ал, Қазақстан Республикасы Оқу-ағарту министрлігінің «Еңбек ардагері» медалі Сырдария ауданы №36 Ә.Тәжібаев атындағы мектеп-лицейінің ардагері Сәбит Отызбаев, қалалық ардагерлер кеңесінің төрағасы Мылтықбай Баймбетов, Жаңақорған ауданы Н.Илялетдинов атындағы №169 орта мектебінің ардагері Аллаберген Ахметовтерге табыс етілді.
Облыс әкімінің Құрмет грамотасымен Қазалы ауданы, «Рауан» инклюзивті жеке балабақшасының меңгерушісі Қуанышкүл Дәулетиярқызы, Қызылорда қаласы, қосымша білім беру оқу-әдістемелік орталығының үйірме жетекшісі Бахытбек Досмаилов, Қызылорда қаласы, №5 мектеп-лицейі бастауыш сынып мұғалімі Надежда Ющенко, Жаңақорған ауданы, №239 орта мектебі бастауыш сынып мұғалімі Гульзира Ауешовалар марапатталса, облыс әкімінің Алғысы Сырдария ауданы, №210 орта мектебі көркем еңбек пән мұғалімі Күлзада Досмағанбет, Қызылорда қаласының №1 психологиялық-медициналық-педагогикалық консультациясының сурдопедагогы Гүлнар Молдабекова, Абылай хан атындағы жоғары колледжінің арнайы пән оқытушысы Бейбіт Маржанов, №6 есту қабілеті бұзылған балалардың арнайы мектеп-интернатының математика пән мұғалімі Алтынай Баймаханова, Қызылорда қаласы, «ORDA SCHOOL» жеке мектебі бастауыш сынып мұғалімі Рая Мырзағалиева марапат төрінен көрінді.
Сонымен қатар, «Қызылорда облысының білім беру саласын дамытудағы еңбегі үшін жергілікті ерекшілік белгісімен» С.Шаухаманов атындағы №9 дарынды балаларға арналған облыстық Білім-инновация лицей-интернатының география пән мұғалімі Ләззат Құлымбетова, №270 орта мектебінің директоры Гүлзира Жаңабаева, И.Әбдікәрімов атындағы Қызылорда аграрлық техникалық жоғары колледжінің қоғамдық пәндер бірлестігінің жетекшісі Әлия Нұрпейсова марапатталды.
Ұлттық бірыңғай тестілеу көрсеткіші бойынша республика көлемінде «Үздік 100 мектеп» қатарына енген және «Үздік білім беру» ұйымдарының педагогтарына ноутбук табыс етілді. Олардың қатарында Е.Әуелбеков атындағы №4 облыстық мамандандырылған мектеп-лицей-интернатының физика пәні мұғалімі Шахизат Бейсенова, Қызылорда қаласындағы №15 мектеп-лицейінің тарих пәні мұғалімі Мұхтар Ысқақов, Қызылорда қаласы Қызылорда қаласындағы Абай атындағы үш тілде оқытатын дарынды балаларға арналған мамандандырылған сыныптары бар мектебінің ағылшын тілі пәні мұғалімі Балдырған Баймағамбетова, С.Шаухаманов атындағы №9 дарынды балаларға арналған облыстық Білім-инновация лицей-интернатының математика пәні мұғалімі Ермек Мақсұтханов, №10 дарынды балаларға арналған облыстық Білім-инновация лицей-интернатының физика пәні мұғалімі Майра Мантенова, Қармақшы ауданындағы №279 мектеп-лицейінің тарих пәні мұғалімі Перуза Жүгінісова, №277 мектеп-лицейінің химия пән мұғалімі Гүлім Рсалиева, №274 орта мектебінің физика пәні мұғалімі Ұлмекен Кукелекова, Қызылорда қаласындағы «Алтын ұя» бөбекжай балабақшасының тәрбиешісі Гүлсім Сағындықова, М.Мәметова атындағы Қызылорда педагогикалық жоғары колледжінің мектепке дейінгі педагогика және психология пәндерінің оқытушысы Ұлжан Есмахановалар бар.
Н.Бекежанов атындағы мемлекеттік қазақ академиялық драма театрында өткен мерекелік іс-шарада ұстаз тағылымын театрландырылған қойылым аша түсті. Салтанатты кеш жергілікті өнер қайраткерлерінің концертімен түйінделді.
Асылында, ұлт тәрбиесімен айналысқан адамның бойынан ізгі қасиеттер табыла білу абзал. Ұстаз болған адам өз алдына мемлкеттен не аламын деп емес, мемлекетке не беремін деп мақсат қойып қызмет ететінін сезеді. Халықтың баласын тәрбиелеген адам халықтың анасына, әкесіне айналады. Екі аяққа тар етік киген заманда қоғам көшінен қалмасын деп қазаққа қызмет етіп, білім ордаларын ашып, алашқа ардақты бола білген, жас ұрпақты білімнің сырынан ғылымның шыңына шығуға шақырып, не нәрседен қашық болып, не нәрсеге жақын болу керектігінің сара жолын салып, тура жолмен жүруді анықтап берген ағартушы-ғалымдарымыз Абай, Ыбырай, Шоқан сынды даналарымыздың дара жолы – қазіргі ұшқыр ойлы ұлтты қалыптастыратын ұстаздарымызға өлмес мұра болып қала бермек.
Мейірім мерекесіне айналған мұғалімдер мерекесінде аяулы да ардақты ұстаздарға қандай құрмет көрсетілсе де жарасады. Сыр өңіріндегі ұлағатты ұстаздар әр кез жетістіктерге жетіп, абырой биігінен көріне бергей.
Айдар САЙЛАУОВ
