Әрбір ата-ана өз перзентінің әдепті, саналы, иманды да ибалы, Отанының сүйікті және кішпейіл азаматы болып жетілуін қалайды. Сол жолда бар жиған-терген үлгі-өнегесін, жақсы қасиеттерін ұрпағының бойына дарытып, болашағының жарқын болуын көксейді. Бала тәрбиесінің түпқазығы отбасы болса, оның таным-білім ортасы – мектеп. Қазіргі қоғамда ата-ана мен мектеп байланысы қай деңгейде? Бала тәрбиесінде нендей жайттарды ескеру өте маңызды? Жақсы бала тәрбиелеудегі жақсы мектеп алгоритмі қандай?
«Сенімен Болашақ» республикалық ата-аналар қоғамдық бірлестігі мен облыстық білім басқармасының ұйымдастыруымен өткен «Ата-ана, ұстаз, оқушы: Болашаққа бағытталған ынтымақтастық» атты аймақтық ата-аналар форумында осы сауалдар кеңінен талқыланып, мәселелерді шешуде тиімді әрекеттер туралы айтылды.
Бала болашығының жарқын болуы үшін үштік одақтың тиімділігі зор екені айтпаса да түсінікті. Мұғалім, оқушы, ата-ана. Бұл үш тұлғаны біріктірген – мектеп. Ұлы Абай «Баламды медресеге біл деп бердім, қызмет қылсын, шен алсын деп бермедім» деп, өзі өмір сүрген дәуірде-ақ, халықтың баласының сауатты, адал, білімді, ғылымға жақын болғанын көкседі. Шен, атақ үшін атойлап, дүние-мансапты емес, ақыл-білімді серік еткенін қалады. Қазір де бұл аксиома өзгерген жоқ деген ойдамын. Әрбір ата-ана бауыр еті баласының мектепке сауатын ашып, білімді, тәртіпті болып, қоғам талабына сай зияткер ұрпақ болуын мақсат етеді. Қазіргі уақытта бұл мақсатқа жетуде ата-ана педагогпен ынтымақтастықта, тығыз байланыста болуы шарт. Себебі, өскелең ұрпақтың түзу жолды таңдап, оң бағытпен жүруіне тек ата-ана емес, мұғалімнің де қосар үлесі қомақты.
Форум еркін форматта өтті. Спикерлер ұрпақ тәрбиесіне, келешегіне қатысты ортақ мәселеге байланысты ойларын бүкпесіз жеткізіп, жан-жақты пікірлерін білдірді. Оның ішінде ата-ана мен мектеп байланысын онан әрі нығайтудың тиімді тетіктері, отбасы мәселелері, бала тәрбиесіне қатысты орамды ойлар айтылып, ұсыныстар жеткізілді.
Бала тәрбиесі туралы сөз болғанда «баланы жастан» деген халық даналығы бүгінгі күнге дейін өз өміршеңдігін жойған емес. Сондықтан «бала жас, әлі ешнәрсені білмейді, өсе келер бәрі түсінеді»,- деп қарау – барып тұрған қателік. Бала тәрбиесі – әр сағат, әр күн сайын тынымсыз жүргізіле беретін аса жауапты, күрделі процесс. Тәрбие отбасынан басталады, оны қоғамдық тәрбиенің қандай саласы болса да алмастыра алмайтыны тағы бар. Десек те, мұғалімдер бұл ретте өз біліктілігі мен тәжірибесін жұмсаудан аянып қалмайды деп ойлаймын.
Жалпы, форумда мұғалім, оқушы, ата-ана үштігінің өзара байланысын, арақатынасын нығайтуға қатысты ойлар көптеп айтылды. Расында, бұл бағытта ауқымды жобаларды қолға алып, ірі бастамаларды іске асырса, нәтижелі болатынына сенім мол. Республикалық деңгейде өткен форумның педагогтар қауымы мен ата-аналарға бергені мол болды. Жергілікті биліктің қолдауымен ұйымдастырылған игілігі зор шарадан көрген-түйгенімізді өз тәжірибемізде ескеріп, білімді, саналы ұрпақ тәрбиелеу жолындағы үздіксіз процесті жаңа қырынан жалғастыруға әзірміз.
Айгүл ӨТКЕЛБАЕВА,
Ә.Мүсілімов атындағы №101 мектеп-лицейдің директоры
