Жеткіншектің жұлдызын жағып, тағылымын қалыптастырып, танымын кеңейтуде білім-ғылым мен тәлім-тәрбиенің ықпалы ерекше. Себебі бүгінгі дамыған заманда өркениеттің өлшемі, елдің кемел келешегі оқу-ағарту саласындағы оңды бастамалар арқылы жүзеге асуда. Ал, оның қайнар көзі – мектеп пен ұстаз дейтін егіз ұғымнан бастау алады. Шәкірт жүрегіне нұр құйып, жан-жақтылыққа баулитын киелі шаңырақ қоғам үшін қай кезде де маңызды. Осындай талап үдесінен шығып, адам бойындағы ізгілік атаулыны қалыптастыруда өлшеусіз үлес қосып келе жатқан Қызылорда облысы, Шиелі ауданындағы №270 Ғ.Мұхамеджанов атындағы мектептің орны бөлек. Мемлекет басшысының «100 мектеп, 100 аурухана» бағдарламасы аясында бой көтерген қуаттылығы 600 орын ғимарат қазіргі заман талабына сай соғылған.
10 жыл уақытты артта қалдырған мектептің ең алғашқы директоры Мұқаш Пернеев. Ал, 2018-2022 жылдары білім ордасына Мұрат Тұрабаев басшылық етті. Бүгінгі таңда Шиелі ауданындағы №252 Г.Ковтунов және №127 Ш.Уәлиханов атындағы орта мектептерінде физика және математика пәнінің мұғалімі болған, кейін осы білім ордаларында басшылық қызмет атқарып, тәжірибе жинаған Гүлзира Есенгелдіқызы Жанабаева №270 Ғ.Мұхамеджанов атындағы орта мектебінде директоры қызметінде.
«Мектеп – кеме, білім – теңіз» дер болсақ, кеменің бағытынан таймай дұрыс жүзе білуі басшыға байланысты. 105 педагогтың білім білігін бақылап, шәкірттердің тәлім-тәрбиесіне қатаң талап қоя білген Гүлзира Есенгелдіқызы басқарған оқу ордасы білім бәсекесінде алдыңғы орыннан көрініп келеді.
Ғафур Мұхамеджанов атындағы №270 орта мектепте оқушыларға арналған бірнеше жоба қолға алынған. Киелі шаңырақ өрендерді тереңдете оқытып қана қоймай, олардың шығармашылық қабілетін шыңдау, қоғамға бейімдеу, түрлі деңгейдегі мәдени-рухани іс-шараларға белсене атсалысу істеріне де дағдыландырады. Өйткені әрбір көзі қарақты ата-ана баласының толыққанды білім алуымен қатар, олардың ой-өрісі, дүниетанымының кеңеюін де қалайды. Осы орайда аталған білім ордасында ғылыми-шығармашылық бағытта ізденімпаз, жаңашыл оқушы тәрбиелеуге айрықша көңіл бөлінген. Бүгінде «Робототехника», «Оқуға құштар мектеп», «Мектеп театры», «Парламент», «Ұшқыр ой» дебат алаңы, «Жас қаламгер» атты жобалар бар.
— Қай мектепке де бұл жобалар керек. Біз үшін әр бала бір жұлдыз. Олардың бейіміне, арман мақсатына орай түрлі жобаларды жүзеге асыру педагогтардың ізденімпаз екендігін, білім биігін көрсетері анық,– дейді Гүлзира Есенгелдіқызы.
Ұстаздық – ұлы қасиет. Шәкірт ұстазға қарап өседі. Ұлағатты ұстаздан тәрбие алған адам жақсы қоғам қайраткері, ұлы тұлға болып өседі, өмірін дұрыс бағытқа бейімдеп, көркейеді. Алайда оқушыны білімге қызықтырып, өз әлеміне баурап алу үшін ұстазға дариядай терең білім, биік парасаттылық, талмас еңбекқорлық, таза ниет керек.
Шәкірт бойындағы табиғи дарын ұшқындарын сөндіріп алмай, шығармашылық еңбек үстінде оған қанат бітіру, білімге шексіз құштарлық дәнін себу ұстаздың басты парызы. Ұстаз болу үшін үлкен жүрек, жайдарлы мінез, адами қасиет керек. Бойында осының барлығы табылған адам ғана шәкірттің шырағын жағатын, білімде де, ғылымда да ұшпаққа шығаратын нағыз ұстаз бола алады. Ғафур Мұхамеджанов атындағы №270 мектептің ұстаздары оқушы бойындағы дарынды байқап, оларға жол көрсетіп жүрген бірден-бір бағдар. Бүгінде білім ошағының оқушылары түрлі сайыстардан жүлделі орындардан көрініп жүр.
Әр оқу жылы сайын «Алтын белгі», «Үздік аттестат» иегерлерінің қатары көбеюде. Оқушылар республикалық, облыстық олимпиадаларға, байқауларға қатысып жүлделі орындар иеленіп жүр. Мәселен, Темірбек Жүргеновтың 125 жылдық мерейтойына орай, Шиелі аудандық білім беру ұйымдарының арасында өткен «Темірбек Жүргенов –тарихи тұлға, ұлт жанашыры» атты театрлар байқауында 3 дәрежелі дипломмен ұстаз Несібелі Омарова марапатталды. Сондай-ақ, халықаралық педагогикалық журналының ұйымдастыруымен «Ұлы даланың ұлағатты ұрпақтары» атты республикалық ғылыми жобалар байқауында қазақ тілі секциясы бойынша 9-сынып оқушысы Сабина Алтынбек үздік нәтиже көрсетіп, 1-орынды иеленді. «Ұлы дала баласы» ұлттық білім сайысының республикалық кезеңінде 1-дәрежелі дипломмен 5-сынып оқушысы Гүлім Талғат марапатталды. Сонымен қатар оқушыларды өнер әлемінде өрге шығарып жүрген ұстаз Айнұр Үркінбаеваның да жетістіктері жетерлік. Оны шәкірті Мирас Шаменнің «Дарындар Alemi» ІХ Халықаралық балалар, жасөспірімдер және жастарға арналған «Әр бала – жұлдыз» өнер байқауында бас жүлдемен оралуынан-ақ байқай беруге болады. Осы секілді жыл сайын қаншама шәкірттер мен ұстаздар білім бәсекесінде бақ сынап, жүлделі орындардан бой көрсетіп жүр. Спорт, тіл, әдебиет, өнер сынды сан салада шәкірттері асуларды бағындырып жүрген мектептің беделі бұдан биіктей түспесе кеміген емес.
Адам өз еңбегінің аз да болса жемісін көрсе, қуанышқа бөленері анық. Себебі әрбір жетістік бақыттың қайнар көзі. Шәкірті биікке көтерілсе, ұстаз еңбегінің еш кетпегені. Бар білгенін балаға үйретуден жалықпаған мұғалімдер қандай марапатқа да лайық. Осы тұста аталған білім ордасының тәлімгерлері біраз асуларды бағындырған. Облыстық, республикалық, халықаралық деңгейде білім білігін көрсетіп жүрген З.Ермекбаева, Г.Қылышбаева, А.Байдраманова, А.Үркімбаева, Ш.Шоханова, Ш.Бекбай, Г.Есенова, Г.Нақыпбекова, М.Бердімұрат, Ғ.Тәжібаев, Қ.Үдербаев, Л.Шадинова сынды ұстаздар мектептің мақтаулы мамандары.
Ізгіліктің жолын негізгі бағыт етіп алған, ерінбей, жалықпай, өз бақытын аямай, өзгенің бақытын аялау үшін күрескен, алдына батыл мақсаттар қойып, соған жетуге табанды түрде нық қадамдар жасаған қаншама мұғалімдердің өмірі осы мектепте өрілді. Бар өмірін, уақытын, білімін, тәжірибесін сол жолға, сол талапқа жұмсап, биік белестерді бағындыруда адал еңбегі мен маңдай терін төккен ұстаздар орны қашанда ерекше.
Ұлттың рухани байлығы – білімінде болса, ұстанар бағыты – тәрбиесінде. Ал, білімнің сарқылмас көзі – мектепте. Ұстаздық жолын таңдаған әрбір жан өз шәкіртінің өзінен оза шауып, әлдеқайда биіктерден көрінуін тілейді. Өркениет биігіне батыл қанат қаққан талантты шәкірттердің әлемде, республикада, облыста, ауданда алдыңғы қатарлы азамат болуы, ел құрметіне бөленуі – кез келгеннің маңдайына бұйыра бермейтін бақыт.
Білімнің биік мінберінен ойып орын алған №270 Ғ.Мұхамеджанов атындағы мектеп ұжымы осылайша өркениетті заманның талап үдесінен шығу жолында әр кез талмай еңбек етуде. Жаңа оқу жылы басталғалы бері қаншама шаралардың ұйытқысы болды. 5-15 қыркүйек аралығында қазақ тілі мен әдебиеті, орыс тілі мен әдебиеті және ағылшын тілі пән бірлестіктері «Тіл мерейі – ел мерейі» атты онкүндік ұйымдастырып, оқушылардың тынысын ашты. Білім бәсекесінде алға ұмтылған мектепте өз ісіне адал майталман мамандар мен кемел келешегім – білімде деп ұғынатын ынталы шәкірттер бар.
Қ.Әндешұлы,
Шиелі ауданы
