Аттестат тапсыру кеші қатаң бақылауда болады

Оқу жылы аяқталды. 9-сынып білім алушыларының қорытынды бітіру емтихандары 28 мамыр мен 6 маусым аралығында, ал 11-сынып білім алушыларының мемлекеттік бітіру емтихандары 27 мамыр мен 10 маусым аралығында болды. Бүгін аттестат тапсыру салтанатты іс-шарасы облыс көлемінде бір мезетте барлық білім беру ұйымдарында өткізілді. Арал, Қазалы, Қармақшы ауданы мен Қызылорда қаласында аттестат тапсыру іс-шарасы таңертең сағат тоғызда, Жалағаш, Сырдария, Шиелі, Жаңақорған аудандарында сағат кешкі бесте салтанатты түрде өтті.

Негізгі орта білім туралы аттестатты алатын, яғни 9-сыныпты бітірушілер саны – 14543. Оның ішінде «Үздік аттестат» иегерлер саны – 1765 немесе 12,1 % құрайды. 11-сыныпты бітіруші түлектер саны – 7506, «Алтын белгі» белгісінің иегерлері – 415 (5,5 %), «Үздік аттестат» иегерлері – 804 (10,7 %).

– 2021-2022 оқу жылының мектеп бітіру кештерін ұйымшылдықпен өткізу, бітірушілердің өмірі мен денсаулығын қорғау, құқық бұзушылықты болдырмау және сыбайлас жемқорлық тәуекелдерін жою мақсатында білім басқармасының арнайы бұйрығы шығарылып, барлық білім беру ұйымдарына жолданды. Аталған бұйрыққа сәйкес, оқу жылын аяқтау шараларын ұйымдастыруға және мектепке жөндеу жұмыстарын жүргізуге оқушылар мен ата-аналардан, педагогтардан ақша жинауға қатаң тыйым салынды. Сонымен бірге, барлық білім бөлімдерінің басшылары мен мектеп директорларына мектеп бітіру кештерін өткізу барысында бітірушілер мен қызметкерлердің өмірі мен денсаулығына қауіпсіз жағдай жасалуын қамтамасыз етуге, бітіру кештерін міндетті түрде мектеп қабырғасында және ауласында өткізуге, шараға бітірушілердің мектеп формасымен қатысуын және барынша қарапайым түрде өткізілуін қамтамасыз етуге, үйлер мен ресторандарда, басқа да ойын-сауық орындарында мектеп бітіру кештерін өткізу және бітірушілердің автокөліктермен кортежге шығуына жол бермеуге, бітірушілердің өмір қауіпсіздігі мен құқық бұзушылықты болдырмау және алдын алу бағытында медициналық, өрт қызметтері, ішкі істер органдарымен бірлесіп шаралар қабылдауға, мектеп бітіру кештерін ұйымдастыру үшін ана-аналардан ақша жинамауды, ата-аналар тарапынан мектеп әкімшілігі мен мұғалімдерге сыйлықтар берілуіне жол бермеуді және шараларды мектептің қолда бар мүмкіндігімен ұйымдастыруға, табиғат аясына серуендеуге, өзен, көлдерге, шағын су алаптарына суға түсуіне тыйым салуға және төтенше жағдай бөлімдерімен бірлесіп кезекшілік ұйымдастыруға, сонымен бірге бітірушілер, ата-аналар және педагогтар арасында ақпараттық-түсіндірме жұмыстарын қамқоршылық кеңес мүшелерімен бірлесіп белсенді түрде жүргізу тапсырылды,- деді облыстық білім басқармасының бөлім басшысы Нұрлан Дәулетәлиев.

Облыс көлемінде жалпы білім беретін оқу орындарында мектеп бітірушілер кеші жылда үлкен дайындықпен өтеді. Биыл облыс бойынша 295 мектеп және гимназия, лицейлерде 7506 мектеп бітіруші түлектері аттестатқа қол жеткізді. Мектеп бітіруші түлектің он бір жыл білім алған ұясынан ұшып шығып, үлкен өмірге қадам басар маңызды сәтінде олардың өмір қауіпсіздігі басты назарда болуы тиіс. Адамдар көп шоғырланатын демалыс орындары мен ойын-сауық мекемелеріне мектеп әкімшілігінен құралған кезекшілік топ рейдтік жұмыстар жүргізді.

Қалалық Полиция басқармасы және барлық аудандық полиция бөлімдері облыс көлеміндегі оқу орындарында және оларға іргелес аумақтарда қоғамдық тәртіпті және жол қауіпсіздігін қамтамасыз ету жөнінде жан-жақты шаралар қабылданып, іс-шараларды өткізу кезінде әрбір мектепке кемінде 2 қызметкер бекітіледі.

– Полицияның кешенді күштерінің патрульдеу бағыттары оқу мекемелеріне барынша жақындатылды, балалар көп жүретін жаяу жүргіншілер өтпелеріне патрульдік полиция қызметкерлерін қою және сол күні кезекші бөлімшелерде күшейтілген түрдегі оперативтік-тергеу топтарын құру жөнінде арнайы жоспарлар жасалып бекітілді. Өткізілетін іс-шараларға барлығы 516 қызметкер, 136 қызметтік автокөліктер жұмылдырылды. Аттестат тапсыру кеші күні автошеру өткізуіне болмайтындығын қатаң ескерттік. Әлеуметтік желі арқылы 25 мамырда, яғни соңғы қоңырау күні республикамыздың кейбір облыстарында автошеруге шығып, жол көлік оқиғалары салдарынан түлектердің түрлі дене жарақаттарын алғандарын көрген боларсыздар. Сондықтан осындай келеңсіз оқиғалардың алдын алу мақсатында автошеруді өткізбеуге шақырамыз. Сонымен қатар, қазіргі таңда облысымызда күннің қатты ысуына орай белгіленбеген орындарға суға түсуге болмайтындығын ескертеміз. Әсіресе таңды қарсы алу барысында су жағалауларында, көпірлерде қарсы алу үрдіске айналған. Сондықтан келеңсіз жағдайлардың алдын алу мақсатында балалардың суға түспеулерін сұраймыз, – дейді Қызылорда облысы Полиция департаментінің Жергілікті полиция қызметi басқармасы бастығының орынбасары Бахыт Молдабеков.

З.Қонысжан

Пікір үстеу

Э-пошта мекенжайыңыз жарияланбайды. Міндетті өрістер * таңбаланған