8 наурыз – халықаралық әйелдер күніне арналған жылдағы дәстүрлі құттықтау шараларының ішінде білім саласы ерекше көрінді. Бұл жолы отбасы мен қоғамда ерен еңбегімен еленіп, сый-құрметке бөленіп жүрген білім саласының ардагерлері мен ұстаздарына көрсетілген құрмет Нартай Бекежанов атындағы қазақ академиялық музыкалық драма театрында өтті.
Расында, «Анаға тағзым, анаға құрмет» деген аталған салтанатты кездесу аналар қауымына деген ақ тілек, риясыз пейіл, жылы лебіздерге толы болды. Шара басталарда барлық жердегі жарық өшіріліп, экраннан кимешегі ағарып ана шығып:
Мен — Анамын!
Ұрпағына қамқорлықпен алаңдар,
Аналардан өсіп-өніп,
гүл жайнаған ғалам бар!
Барын беріп бойындағы, қамқор болар жаныңда,
Әйел-ана, аруларды құрмет теңдер, адамдар! – деп, тебірене үн қатқаны көрерменді ерекше әсерге бөледі.
Мерекелік салтанатты ашқан басқарма басшысы Асқарбек Есжанов кешке қатысушыларды және білім саласындағы нәзік жандыларды халықаралық әйелдер күнімен құттықтап, ұрпақты тәрбиелеу ісіндегі әйелдердің айрықша рөл атқаратынын айтты.
Мұнымен бірге қарқыны күшті әрі жаңашылдыққа толы білім саласында сан жылдар еңбек етіп, бүгінде бейнеттің зейнетін көріп отырған Қармақшы ауданы, С.Есқараев атындағы №27 мектеп-лицейінің физика пәнінің мұғалімі, ардагер-ұстаз Талмаш Жұмабаева, Қызылорда қаласы, Қ.Мұхамеджанов атындағы №1 мектеп-гимназиясының орыс тілі және әдебиеті пәнінің мұғалімі, ардагер-ұстаз Рсалды Ительгиева, Қызылорда қаласы, №1 мектеп-лицейінің физика-математика пәнінің мұғалімі, ардагер-ұстаз Фарида Дәуітбаева және Сырдария ауданы, №37 мектеп-лицейінің бастауыш сынып мұғалімі, ардагер-ұстаз Гүлзифа Ташеноваға Оқу-ағарту министрлігінің «Еңбек ардагері» төсбелгісін тағып, сый-сияпат жасады. Ал, Оқу-ағарту министрлігінің алғыс хатымен Қызылорда қаласындағы А.Байтұрсынов атындағы №211 орта мектебінің директоры қызметін жасап, зейнет жасына шыққан ұлағатты ұстаз Алия Көшкенбаеваны марапаттады. Сонымен бірге ұлт игілігі жолына өз әлеуеті мен қарым-қабілетін арнаған ұстаздар мен білім саласы қызметкерлері де облыс әкімі, облыс әкімінің орынбасарының, басқарма басшысының алғыс хаттарымен марапатына ие болды.
Мерекелік шара әдеби-сазды, хореографиялық-театрландырылған композиция мен концерттік бағдарламаға ұласты. Мерекеде ұлағатты ұстаздар құрметіне Д.Нұрпейсованың «8 март» күйі, Шәмші Қалдаяқовтың «Ана туралы жыр», Марат Омаровтың «Анашым», Т.Мұхамеджановтың «Аққуым» әндері орындалды.
Б.Бағдатұлы
