Соңғы уақытта Сыр елінің білім саласында біршама ауқымды істер мен көлемді шаралар өтті. Ауыз толтырып айтарлықтай оқушылардың жетістіктері мен жеңістері де ұстаздар мен ата-аналарды қуантып тастады. Иә, сәуір айы біздегі білім саласы үшін тәуір ай болған секілді. Сондықтан да осы жолғы «Білім бағдаршамы» айдарында осы жетістіктерге жеке-жеке тоқталып өтпекпіз.
Жеңіс жалауы «мың балада»
«Мың бала» Ұлттық зияткерлік олимпиадасының І кезеңі 4-13 сәуір аралығында онлайн форматта өткізілді. Білім бәсекесінде облыс бойынша 10661 оқушы қатысып, байқау нәтижесінде 903 оқушы финалист атанды. Осылайша аймағымыздың дарынды оқушылары еліміз бойынша жоғары нәтиже көрсетіп, облыстар арасында көш бастады.
«Мың бала» олимпиадасы үшінші жыл қатарынан қабілетті ауыл оқушыларын анықтап келеді. Жеңімпаздар дарынды балаларға арналған мамандандырылған мектептерінде оқуға мүмкіндік алады. «Мың бала» олимпиадасын Елбасы Академиясы Қазақстан Республикасы Білім және ғылым министрлігімен бірлесіп өткізеді.
Жыл сайын ауыл мектептеріне арналған «Мың бала» олимпиадасының бірінші кезеңі онлайн форматта арнайы әзірленген платформада өткізіледі, оның ерекшелігі – олимпиаданың барлық процестері, яғни өтінім беруден бастап, бір сәтте 20 мың адамды онлайн тестілеуден өткізуге дейін автоматтандырылған. Бірінші кезеңге қатысқан оқушылар интернетке қосылған барлық құрылғылар мен компьютерлер арқылы кіруге мүмкіндігі болды.
Ал, II кезең 2022 жылдың 27-29 сәуірінде өңірлік тестілеу орталықтары базасында өтіп жатыр. Финалистер математикалық сауаттылық, (қазақ тілінде білім алатын оқушыларға) қазақ тілі, (орыс тілінде білім алатын оқушыларға) орыс тілі, ағылшын тілі және жаратылыстану ғылымдары бойынша академиялық білімдерін бағалау үшін компьютерлік тестілеуден өтеді.
Олимпиада жеңімпаздары еліміздің дарынды балаларға арналған жетекші мектептерінде: республикалық физика-математика мектебінде, «Білім-инновация» лицейлерінде, «Дарын» мамандандырылған мектептерінде оқуға мүмкіндік алады.
Татулықты ту еткен тұрғындар
1 мамыр – Қазақстан халқының бірлігі күні мерекесіне орай облыстық білім басқармасының ұйымдастыруымен «Сыр елі – татулық тірегі» атты мерекелік шара өтті. Мәдени шараға облыстық білім басқармасының басшысы Ақзира Қасымова, қалалық білім бөлімінің басшысы Динара Баймурзаева және этномәдени бірлестік өкілдері, қала мектептерінің ұстаздары, оқушылар мен ата-аналар қатысты.
Өнерлі өрендердің мерекелік шарасын облыстық білім басқармасының басшысы Ақзира Қасымова ашып, барша қызылордалықтарды мерекемен құттықтап, егемен еліміздің ертеңі үшін ынтымақ пен бірлікте болуға шақырды.
— Қазақ халқында «Бірлік болмай – тірлік болмас» деген мақал бар. Тәуелсіздігіміз тұғырлы, елдігіміз мәңгі болуы үшін ең алдымен мықты татулық және тұрақтылық керек. Мемлекет басшысы Қасым-Жомарт Кемелұлы «Біз туған елімізді бейбітшіліктің алтын бесігіне айналдыра білдік. Тұрақтылық пен татулық арқылы бейбітшілік төрімізге озды» деген болатын. Шын мәнінде, туған ел игілігі жолындағы ырысты ынтымақ әрбір адам үшін аса қымбат құндылық. Өткен тарихтан белгілі, қиын-қыстау кезеңде күшпен қоныс аударылған барша ұлыстар үшін осы ретте Сыр елі де құтты мекенге айналды. Ендеше бірлікті ту етіп, елімізді, тұғырлы тәуелсіздігімізді асқақтатуға үлес қосайық!»- деді Ақзира Бақтыбайқызы.
Татулық пен бірлікті, достық пен тұрақтылықты насихаттап, өскелең ұрпақтың бойында туған жерге, елге деген сүйіспеншілікті, патриоттық тәрбиені қалыптастыруды мақсат еткен шарада өнерлі оқушылар сан ұлттың тілінде әндерін айтып, билерін билеп, ерекше мерекелік көңіл-күй сыйлады.
Телевизиялық сайыстың сайыпқырандары
Облыстық білім басқармасы және Қорқыт ата атындағы Қызылорда университеті, облыстық «Qyzylorda» телеарнасы мен Жастар ресурстық орталығының бірлесіп ұйымдастырған «Интеллектуалды ұлт» облыстық телевизиялық білім бәйгесінің финалдық кезеңі өтті.
Өңіріміздегі білімді жастарды даралайтын телевизиялық білім сайысының қорытынды кезеңіне Арал, Қазалы, Жалағаш аудандары мен Қызылорда қаласынан командалар қатысып, бақ сынасты. Тапқырлығы мен білімі арқылы дараланған оқушыларға ақтық мәреде түрлі сала бойынша, логикалық, тарихи бағыттағы сұрақтар қойылды. Сайыстың нәтижесі бойынша І орынды Қазалы ауданынан құралған команда жеңіп алса, ІІ орын Арал ауданының командасына бұйырды. Ал, Жалағаш ауданынан құралған команда ІІІ орынды иеленсе, Қызылорда қаласының командасына арнайы алғыс хат табысталды.
Ұшқыр ойлы ұрпақ тәрбиелеу мақсатында ұйымдастырылған жобаның финалдық бәсекесіне облыстық білім басқармасының басшысы Ақзира Қасымова, Қорқыт ата атындағы Қызылорда университетінің ректоры Бейбіткүл Кәрімова мен облыстық «Qyzylorda» телеарнасының орынбасары Айсұлу Қасымова қатысып, жеңімпаздарды марапаттады. Жеңімпаз болып танылған үш команданың үш үздік қатысушысына Қорқыт ата атындағы Қызылорда университетінің тегін білім гранты табысталды.
Ағарту саласының ақсақалы
Асқар Тоқмағамбетов атындағы мәдениет үйінде ұзақ жылдар білім саласында қажырлы еңбек еткен математик, ғасыр ұстазы Қадыр Әмзеевтің 85 жас мерейтойы аталып өтілді. Салтанатты шараға Қызылорда облыстық мәслихат хатшысы Наурызбай Байқадамов пен облыстық білім басқармасының басшысы Ақзира Қасымова қатысты. Мерейтой кешінде Наурызбай Сейітқалиұлы ардагер ұстазға Қызылорда облысының Құрмет грамотасын табыстады.
Қадыр Әмзеұлы 1961 жылы Қызылорда пединститутының физмат бөлімін бітіріп, Ақмола облысының «Сабынды» орта мектебінде мұғалім болған. 1963 жылы Сыр еліне келіп, А.С.Пушкин атындағы орталау мектепте және №143, №147 мектептерде мұғалім және директордың оқу істері жөніндегі орынбасары қызметтерін атқарған. Оның оқыту әдістерін, педагогикалық жұмыстарды басқару тәжірибелерін үлгі етіп, бірнеше рет аудандық, облыстық семинарлар өткізілген.
Озат тәжірибелері облыстық кадрлар біліктілігін арттыру институты тарапынан зерттеліп, оның 1965 жылы «Озат тәжірибе көпке ортақ», 1972 жылы «Толық үлгірімге жету жолында», 1987 жылы «Сабақтарға ЭВМ қолдану – өмір талабы» деген плакаттары, 1990 жылы «Компьютерлік сауаттылық – білімділіктің негізгі шарты» тақырыбымен екі тілде жарық көрген кітапшасы облыс мектептеріне таратылған. Оқыту-әдістері жайлы зерттеу мақалалары «Қазақстан мектебі» журналының 1986, 1988, 1989 жылдардағы, «ИФМ» журналының 1992, 1995, 1996 жылдардағы бірнеше сандарында жарық көрген.
Мерекелік шарада басқарма басшысы Ақзира Бақтыбайқызы ғасыр ұстазына құрмет көрсетіп, шапан жауып, мерейтойымен құттықтады.
Мерекелік шарада Қадыр Әмзеұлының сөзіне жазылған әсем әндер шырқалды. Сонымен қатар эстрада жұлдызы Қыдырәлі Болманов ардагер ұстазды мерейтойымен құттықтап арнайы келді. Шара жергілікті өнерпаздардың ән шашуымен жалғасын тапты.
Сыр дарындары дараланды
18-23 сәуір күндері «USTUDY» тестілеу орталығының базасында «Дарын» РҒПО жауапты өкілінің қатысуымен жалпы білім беретін пәндер бойынша республикалық олимпиаданың қорытынды кезеңі өткізілді.
«Бір қатысушы – бір компьютер – бір камера» қағидасы бойынша өткен олимпиаданың қорытынды кезеңіне Қызылорда облысынан жалпы 83 оқушы қатысып, бақтарын сынады.
Білім бәсекесінің нәтижесімен аймақ абыройын республика деңгейінде жоғары көрсеткіш көрсеткен оқушылардың 38-і үздіктер қатарынан көрініп, жүлделі орындарға ие болды.
Талантты да талапты балалардың арасынан оқ бойы озық шыққан 4 оқушы республикалық олимпиаданың алтын медаліне, 10 оқушы күміс медаліне, 24 оқушы қола медаліне ие болып, Сыр ұстаздарының мерейін тасытты. Жүлде қоржынына түскен бұл медальдар саны олимпиада көрсеткіштерінің өткен жылдарға қарағанда едәуір өскен.
Кітап – рухани байлық көзі
Сөздің майын тамызып әңгіме айту үшін көздің майын тамызып кітап оқу қажет. Иә, өткен аптада дүниежүзілік кітап және авторлық құқықты қорғау күні мерекесіне орай қалалық білім бөлімінің ұйымдастыруымен «Кітап – рухани байлық бастауы» тақырыбындағы қалалық семинар өтті. Семинар Ә.Тәжібаев атындағы Қызылорда облыстық әмбебап ғылыми кітапханасында болды. Семинарды ұстаз Данабек Жақсылықұлы ашып, күн тәртібіндегі іс-шара мазмұнымен таныстырды.
Семинардың мақсаты – 100 жылдық тарихы бар Қалтай Мұхамеджанов атындағы №1 мектеп-гимназиясында «Оқуға құштар мектеп» жобасы аясында озық тәжірибелі кітапханалық жұмыстармен бөлісу. Кітап – адам баласының сан ғасырлық ақыл ойының жемісі, тарихы мен тағылымының алтын сандығы. Жақсы кітап – рухани азық. Рухани толысудың таптырмас дәрісі. Кітап оқыған адам ақыл-парасат, таным, білім, жұртпен қарым-қатынас, тіл байлығы, сыпайылығы мен мәдениеттілігі сияқты ізгі қасиеттерімен ерекше болып тұрады.
2022 жыл елімізде «Балалар жылы» деп жарияланғаны белгілі. Балалар жылы қарсаңында мемлекет басшысының қолдауымен қазіргі таңда 4 бағыт жүзеге асырылуда. Атап айтар болсақ, Мемлекет басшысы Қасым-Жомарт Тоқаевтың Ұлттық қоғамдық сенім кеңесінде берген тапсырмасына сәйкес, Білім және ғылым министрлігі «Оқуға құштар мектеп» жобасын бекіткен болатын. Мектебіміз «Оқуға құштар мектеп» жобасы аясында Ә.Тәжібаев атындағы облыстық кітапханасымен және №1 қалалық кітапханамен байланысып, оқушы мен ата-ана арасында байланыстар жүргізіліп, жоба өз нәтижесін беруде. «Оқуға құштар мектеп» аясында 100 оқулықты оқу жобасы да жүзеге асырылып, оқушылардың оқуға деген құлшынысы арта түсуде. «Оқуға құштар мектеп» жобасы бойынша «Кітап оқуға құштарлықты ояту» тақырыбында әдіс тәсілдер мен «Қалтай Мұхамеджанов шығармалары» талданып, «READx» жобасы арқылы оқушылар шығармашылық қабілеттерін арттырды. А.СЫРЛЫБАЙ
