Жаңа 2026 жылдың алғашқы жұмыс күні облыс әкімі Нұрлыбек Нәлібаев «Өнер орталығында» Қызылорда қаласының тұрғындарын жеке мәселелері бойынша қабылдады. Қабылдауға келгендердің басым бөлігі тұрғын үй, несие, денсаулық, әлеуметтік көмек, жер мәселелерін көтерді.
Жеке қабылдауға тек алдын ала жазылушылар ғана емес, әлеуметтік желіден хабардар болған көпшілік те келуге мүмкіндігі бар. Қабылданатын адам санына немесе уақытқа шектеу жоқ, ең соңғы келушіге дейін күтіп, ой-пікірін айтуға мүмкіндік ұсынылады. Негізінен тұрғындардың мәселелерін сол жерде шешуге басымдық беріледі. Кейбір сұрақтардың жауабы түсіндіріледі, бірқатарының шешу жолдары көрсетіледі. Егер орындалуы белгілі бір уақытты талап ететін болса, жауапты тұлғаларға міндет жүктеледі. Ұсыныс-пікірін, өтінішін жеткізушілердің сауалдары назардан тыс қалмайды. Қабылдауда қозғалған мәселелердің барлығы облыс әкімінің ұдайы бақылауында болады. Енді соның бірқатарына тоқталып өтейік.
Көпбалалы ана Асфендияров көшесіне газ желісін жүргізіп және жарықтандырып беруді сұрады. Аймақ басшысы қала әкіміне «ҚазТрансгазаймақ» мекемесінің басшылығымен бірге барып, жағдайды зерделеуді, табиғи газға қолы жетпеген тұрғындар мәселесін шешуді тапсырды. Жақын күндері Асфендияров көшесіне газ тартылып, оған қоса демеушілік есебінен жарықтандырылатын болды. Ал, Жарқынбаев көшесінің тұрғыны көше бойына жылдамдық бәсеңдеткіш орнату туралы өтініш білдірді. Бұл жерге белгі орнатпас бұрын жол қозғалысы қауіпсіздігі мен кептелістің алдын алу үшін жан-жақты зерделенуі керек. Қалалық полиция басқармасымен бірлесіп, тиісті жұмыс жүргізіліп, бір шешімін таппақ.
Ашықтық қағидатына негізделген қабылдау барысында 130-дан астам азаматтың өтініші қаралыпты. Оның ішінде облыс әкіміне 60 тұрғын жеке сұрақтарын қойған.
Қабылдауға барғандардың арасында қала тұрғыны, қолданбалы хронобиология маманы Болат Нұрхожаев та болды. Ол алдын ала хабарсыз болғанын, қабылдауға фейсбук әлеуметтік желісінен көріп барғанын айтады. «Қабылдауда облыстағы 200 мыңдай оқушының сабақ кестесін таңертең 8:30-дан бастау, заң талаптарына сай үлкен үзіліс болуын қамтамасыз ету мәселесімен болдым. Облыс әкімі мәселенің мән-жайын тыңдап, толық түсініп, «Бала – болашағымыз, оның денсаулығының қорғалуы, сауаттылығының артуына сеп болатын болса, неге шешпейміз?» деп, тиісті басқарма басшысы мен аппарат басшысына жақын күндері барлық қатысты құзырлы органдарды, атап айтқанда, Қызылорда облысының санитариялық-эпидемиологиялық бақылау департаменті, білім саласындағы сапаны бақылау департаменті білім басқармасымен бірлесе жиын өткізіп, жан-жақты талқылап, шешу жолын ұсынуды тапсырды. Сонымен қатар қажет болса тиісті министрлікпен де шешуге ықпал ететінін айтты. Бұл мәселені мен 4 жылдан бері бес күндік сабақ болғалы көтеріп келемін. Себебі 2018 жылы Қызылорда облысы уақытын балалар үшін 1 сағат кейін шегерсек, ол кезде күзден сабақ 8:30 басталатын. Алайда бес күндік енгізгелі сабақ 8:00 басталатын болған соң балалар үшін күн уақытымен ешқандай өзгеріс болмай қалды. Осы себепті бұл мәселені шешу маңызды, таңертеңгі 30 минуттың өзі әлі жүйке жүйесі толық қалыптаспаған бала, әсіресе жасөспірімдердің таңғы тез ұйқы, ал ол ми, ойлау, сауаттылық, есте сақтау қабілетінің артуына маңызды фазасын жоятын. Баланың таңертеңгілік жылап, шала ұйқы сабақта отыруы тек біз көретін сыртқы жағдайы, ал ішкі психикасында болатын салдарлар оң мінез-құлқының қалыптасуы, ашушаңдық, жүйке жүйесі мен созылмалы шаршау синдромына ұшырау қаупін арттыратын фактор екені ғылыми дәлелденген. Ал, баланың сабақ арасында сергуі, дұрыс тамақтануына қажетті үлкен үзіліс болуы сабақ үлгерімі ғана емес, балалардың өзара және ұстазымен оң қарым-қатынасын, сабақ үлгерімі артуына да сеп болатын фактор екені дәлелденген факт. Сонымен қатар 30 минут сабақты кеш бастау мұғалімдерге, балабақша мен мектеп жасындағы баланы жеткізуге, қызметкерлердің баласын апарып тастап, әрі қарай жұмысына баруына да қолайлы болады. Ал, кешке қайтатын балалар кеш қалмас үшін сабақ ұзақтығын 5 минутқа қысқартумен оңай шешіледі. Бұл жөнінде мен жақында тағайындалған Оқу-ағарту министрі Жұлдыз Сүлейменовамен де, вице-министрмен де тілдескенмін. Жергілікті атқарушы билік өңірдің табиғи уақыт жағдайына байланысты шешуге заңмен ешқандай шектеу жоқтығы туралы ресми хаттары да бар. Міне, осы мәселелерге қанық болған облыс әкімі балаларға тек оң әсері болатынына толық көзі жетіп барып, шешілуіне ықпал ететінін білдірді»,- дейді Болат Нұрхожаев.
Н.Бек
