Қорқыт ата атындағы Қызылорда университетінде Білім күніне арналған «Жаңа халықтық Конституция: білім беру жүйесі арқылы адам капиталын дамыту» атты салтанатты іс-шара өтті. Мерекелік жиынға ардагер ұстаздар, профессор-оқытушылар құрамы, қызметкерлер мен студенттер қатысты.
2026-2027 оқу жылында университет қатарына 3411 жаңа білім алушы қабылданған. Нәтижесінде оқу орнының жалпы білім алушылар контингенті 12 мыңға жуықтапты.
Салтанатты шарада Қорқыт ата университетінің Басқарма төрағасы – ректор Наурызбай Байқадамов сөз сөйлеп, барша қауымды жаңа 2026-2027 оқу жылымен құттықтады. Ректор жаңа оқу жылында білім алушыларға сәттілік, ұжымға ізденіс пен жоғары жетістіктер тіледі.
— Биылғы жыл еліміз үшін тарихи маңызы зор кезең ретінде есте қалмақ. Елімізде жаңа Конституцияның қабылдануы, алғашқы Құрылтай сайлауының өтуі және қоғамдық-саяси дамудағы маңызды өзгерістер – мемлекетіміздің жаңа даму кезеңіне қадам басқанын айғақтайды. Осындай жаңғырулар мен өзгерістер кезеңінде білім мен ғылым мемлекет дамуының басты басымдықтарының бірі болып белгіленді. Себебі елдің ертеңі – сапалы білім алған, бәсекеге қабілетті, жаңашыл ойлайтын ұрпақтың қолында,- деді Наурызбай Сейтқалиұлы.
Жиын барысында университеттің дамуына елеулі үлес қосқан қызметкерлер мен профессор-оқытушылар құрамы марапатталды. Атап айтқанда, бірқатар азаматтарға Қазақстан Республикасы Ғылым және жоғары білім министрлігінің «Құрмет грамотасы» мен «Алғыс хаты», облыс әкімінің «Құрмет грамотасы» мен «Алғыс хаты», сондай-ақ Қорқыт ата атындағы Қызылорда университетінің Басқарма төрағасы – ректорының «Құрмет грамотасы» және «Алғыс хаты» табысталды. Сонымен қатар, университеттің дамуына үлес қосқан түлектерге «Үздік түлек» медалі берілді.
Жиын барысында Қазақстан Республикасы Президентінің стипендиясына ие болған, білім мен ғылымда жоғары нәтижелер көрсетіп дараланған үздік 22 студент марапатталды.
Мерекелік шара өнерпаздардың ән-шашуымен жалғасып, жаңа оқу жылына көтеріңкі көңіл-күй сыйлады.
