Қымбатшылық күн сайын қалтаны қағып барады. Соған қарамастан тосқауылдың қойылатын түрі жоқ. Қанттың қымбат құнынан кейін азық-түлікті айтып жақ аша алмай қалдық. Қант қымбаттағаннан кейін, көкөністің де, жеміс-жидектің де бағасы шарықтамай тұрсын ба? Тасымалда тосылу болғандықтан тапшылықтың да орын алғаны белгілі. Көпшілік «қанттан құр қалмайық» деп дүкендерді жағалап жүрді. Бірақ, шекердің шегінен асқан бағасы бәрінің ызасын тудырғаны да жасырын емес. Тіпті соңғы күндері базардан да көпшілік қантты таба алмай қалды. Шынымен жоқ па әлде тағы да қымбаттауды күтіп отыр ма, ол жағы белгісіз. Дүкен мен базарда да төмен бағада өнім алудың өзі мұң болды. Тапшылық бір бүйірден қысса, қымбатшылық алқымнан алып жатыр. Екі ортада сенделген жұрттың сергелдеңін кім сезінеді? Көптің сенім артатын әлеуметтік дүкені де қант құнын көтеріп жіберіп, жарты жолда қалдырды. Сонда, «бағаны тұрақтандырамыз» деген билік басшыларының бірсөзді болмағаны ма? Ал, Үкіметте республика бойынша Қызылорда облысы әлеуметтік-экономикалық даму жағынан үшінші орынға шығыппыз. Қайсысына сенеміз: көзіміз көрген базар бағасына ма әлде Үкімет отырысының айтқанына ма?
Қантқа келгенде қиналып қалатынымызды кім білген? Қыстың қамын жазда ойлайтындар тосап қайнатуды бастап-ақ кеткен еді. Енді, міне, еншілеген қантын шайға яки тосапқа қосарын білмей дал. Тосапқа келгенде тәттінің де тапшы болғаны қиын соғып тұр. Шекерге келгенде шиқылдап қалатынын жұрт қайдан білсін? Әйтпесе, әуелгіден қантты қабымен алып қоятын еді. Базардағы бағаны естіп аңтарыла аузын ашқандар қазір таңқалмайтын да болған-ау. Енді қайтсін? Таңдана-таңдана тақылдап, ішек те үзілуге шақ қалды емес пе? Сонымен, дүкендердегі қант бағасы өткенде қозғағанымыздан да күрт өсіп кетті. Базардағы бас айналдырар бағаны айтпай-ақ қоялық. Қиналғанда көмек көрсетеді деп ашылған әлеуметтік дүкеннен де қайыр жоқ. Сонда халық кімге үміт артуы тиіс? Көпті алаңдатқан мәселенің барысын байқау үшін облыстық ауыл шаруашылығы басқармасымен байланыстық. Қазіргі таңдағы ахуалды, қымбаттаған қантқа қатысты ақпарат пен баға тұрақтылығына сәйкес қандай шаралар жүргізіліп жатқандығы бойынша сауал қойдық. Дегенмен, қант өніміне жетіспеушілік жоқ екендігін жеткізіп, «тапшылық жоқ» деген сөзден арыға бармады. Тіпті «Алтын Қамба» Агроөнеркәсіп комбинаты» ЖШС директоры Талғат Бекішов те жауап беруден қашқақтады. Сонда бұл әлеуметтік дүкендер де бақылау жүргізілмейтіндігін білдіре ме? Тиісінше, бір-біріне сілтеп қойып қарап отыру жауапсыздықты көрсетеді емес пе? Жүргізілген жұмыстың жай-жапсарын айтқанда жұрт жақын арада бәрінің оңалатынына сенімді болар еді. Егер шын жағдайды Үкіметке айтқанда, үшінші орынға көтерілмес пе едік, кім білсін?!.
Шаһар басшысы Асылбек Шаменов мәжіліс отырысын өткізіп, қымбатшылықты қолдан жасамауды, мониторинг жұмыстарын күнделікті жүргізіп отыруды тапсырған. Енді берілген тапсырманың нәтижесі қандай? Басты талап халықты қолжетімді бағада сапалы азық-түлікпен қамтамасыз ету керектігі айтылғанымен, жүргізілген жұмыстың жөн-жобасы қане? Осы уақытқа дейін тұрақтандыру қорында тапшылық сезіліп, қымбатшылық үдей түскенімен, әлеуметтік дүкеннің барына шүкірлік ететін жұрт. Ендігі жағдай басқаша. Бүйте берсе бұлқынатындар көбейіп, халық мұңы асқынып кетер. Алдағы уақытта бұл мәселенің барысын тағы бақылап көреміз. Базардың шарықтаған бағасына тұсау, әлеуметтік дүкеннің әуселесіне тосқауыл қойылар. Қазір қымбатшылықты ойлап қамыққандар арзаншылықты әзір орнамайтындай көреді. Әлбетте, оған себеп көп. Әйтпесе, күзден бері күйттеп келе жатқанымыз қымбатшылықтың қысымы болса да, нақты назар аударылмай келеді. Ендігі мәселеге мойын бұратын кез келген сияқты. Үкіметтің де құлағы ашылып қалар…
З.қонысжан
