Ана мен бала денсаулығы мемлекеттің терең мән беріп, ерекше назар аударатын салмақты саласы десек, артық айтқандық болмас. Себебі ұрпақтың сапасы мен ұлттың санына тікелей әсер ететін жандардың аман-саулығы – қоғам үшін қашан да маңызын жоймайтын құндылық. Жер жаһанды жайлаған пандемия кезінде де ана мен бала денсаулығын қорғау тіптен де кезек күттірмейтін мәселе екеніне мән бердік. Әркім әулеті түгілі жеке басының қамын күйттеген күрделі шақта сынаққа толы сын сағатта ана мен баланың саулығын алдыңғы қатарға шығарып, олардың амандығы мен алаңсыздығы үшін әрекет еткен әлдеқайда сауапты һәм ар алдындағы борышымыз болды.
Өскелең ұрпақтың дені сау болсын десек, болашақ аналардың денсаулығына үлкен жауапкершілікпен қарауымыз керек. Бүгінгі күнгі жас қыз-келіншектер өз денсаулығына салғырттық танытпай, қайта ертеңгі өміріміздің жалғасы ұрпақтарына жауапкершілікпен қарауы қажет. Себебі егер ана денсаулығы дұрыс болмаса, одан туар бала қандай болмақ? Әйел заты инабатты, тәрбиелі әрі нәзіктігімен ерекшеленетінін бәріміз білеміз. Сондықтан өсіп келе жатқан ұрпағымыз, еліміздің ертеңін әлемге паш етер жас жеткіншектеріміздің денсаулығын ана құрсағында жатқан кезден бастап ойлау керектігін ұмытпаған жөн. Сол себепті болашақ ана денсаулығына дұрыс қарау керектігін білген артық болмайды. Бүгінгі күні әйел затының шылым шегіп, сыра, арақ, шарап ішіп, мас болып жүргенін көрген кезімізде ішіміз удай ашитыны сөзсіз. Әйел затының одан қалды ашық-шашық жүргенін көрген кезде, қай анамыз осындай үлгі берген еді деп таң қалатынымыз сөзсіз? Тізе берсек мәселе көп. Қолдап, қорғап тұрған соң аналар да өз денсаулығына қараса нұр үстіне нұр ғой.
Қызылорда облысы ана мен балаға ерекше ден қойып, денсаулығын назарда ұстап келеді. Облыс әкімі Нұрлыбек Нәлібаевтың төрағалығымен өткен алқа отырысында денсаулық сақтау саласы, оның ішінде аймақтағы ана мен бала денсаулығын қорғау мен эпидемиологиялық ахуал кеңінен талқыланған еді. Жиында облыстық денсаулық сақтау басқармасының басшысы Сәбит Пазылов өңірдегі ана мен бала өлімінің көрсеткіші туралы айтып, оған әсер ететін негізгі факторларды тізбеледі.
Өткен жылы өңірде 10 ананың өлімі тіркелсе, биыл жыл басынан бері 3 ана қайтыс болған. Облыс әкімі бұл мәселеге ерекше мән беріп, тиісті шаралардың шұғыл қабылдануы қажеттігін атап, басқарма басшысына бірқатар тапсырма жүктеді.
— Тіркелген ана мен бала өлімі көрсеткішін тек табиғи факторларға, материалдық-техникалық базаға сілтеудің қажеті жоқ. Жауапкершіліктен құтылмайсыздар! Әрбір өлім-жітім – бір отбасының тағдыры, қасіреті. Бұл ретте, қысқа мерзімде көтерілген мәселе бойынша шұғыл және пәрменді шаралар қабылдауымыз қажет.
Облыстық денсаулық сақтау басқармасы 10 күн ішінде ана мен бала өлімін төмендету мақсатында сала мамандарымен және ғылыми қауымдастық өкілдерімен мәселені жан-жақты зерделеп, кешенді жоспар әзірлеп, бекітуді тапсырамын. Сонымен қатар, жүкті әйелдерге қауіп факторларымен және ауыр экстрагенитальды патологиямен кеңес беру үшін республика деңгейіндегі білікті мамандарды тарта отырып, консилиумдар ұйымдастыру қажет. Жүкті әйелдерді уақытында есепке тұрғызу және балаларға патронаж жасау жұмыстарын күшейтіп, әйелдер арасында жүктілікті жоспарлау бойынша түсіндірме жұмыстарын кеңінен жүргізу қажет, — деді Нұрлыбек Нәлібаев.
Алқа отырысында талқыланған мәселенің бірі – өңірдегі эпидемиологиялық ахуал. Жыл басынан коронавирус инфекциясымен тіркелген науқастар саны 4918-ді құраған. Өңір «Жасыл аймақта» болғанымен аталған ауруды жұқтырған адамдар санын азайту бағытында тиісті шаралар қабылдау қажеттілігі туындады.
Жиында облыстық санитариялық-эпидемиологиялық бақылау департаментінің басшысы Динара Жаңабергенова облыс аумағындағы эпидемиологиялық жағдайды тұрақтандыру бағытындағы шаралар туралы да баяндады.
Аймақ басшысы коронавирустық инфекцияның таралуының алдын алу бойынша жауапты сала басшыларына кешенді жұмыс жүргізуді, оның ішінде вирус жұқтырған азаматтарды дер кезінде анықтап, ауруханалардағы төсек-орын мен қажетті дәрілік препараттардың қорын дайындауды тапсырды.
Өңірде Конго-Қырым геморрагиялық қызбасының эпидемиологиялық ахуалы нашарлауда. Мәселен, жыл басынан қызбаға күдікпен 31 науқас тіркелсе, оның 14-і зертханалық сынама қорытындысымен расталды. 4 жағдай адам қазасымен аяқталған. Облыс әкімі санитариялық-эпидемиологиялық департамент тарапынан қолайсыз 116 елді мекеннің анықталып, оған қажетті қаржы бөлініп, көктемгі дезинсекция жүргізілгенімен расталған жағдайдың өте көп тіркелгенін айтып, департамент жұмысын сынға алды.
Алқа отырысының қорытындысымен қала және аудан әкімдері шұғыл түрде өз аумақтарындағы елді мекендерде қора-жайларды, аулаларды кенеге қарсы өңдеу басталғанға дейін және жыл көлемінде тұрақты түрде қидан, қоқыстан таза ұстауды қамтамасыз етуді міндеттеді. Ал, облыстық денсаулық сақтау басқармасы емдеу методикасын күшейту бойынша нақты шаралар қабылдауы тиіс.
Облыс әкімі аймақ үшін өзекті болған мәселелер бойынша шұғыл шара қабылдап, алдағы уақытта оны болдырмауын қамтамасыз етуді тапсырды. Ал өз қызметіне салғырт қараған жауапты тұлғалар жіберген кемшіліктері үшін жауапкершілікке тартылады.
Аурудың жақсысы жоқ. Ал, Ана денсаулығы бүгінгі заманның көкетесті мәселелерінің бірі болып қала береді. Халқымызда «Ана – мақтан, ана – жыр, Ана – бақыт, жанашыр» деген мақал бар емес пе? Бұл мақалдың құндылығын жоймай, болашақ аналарымыз дендерінің сау болуына өздері де үлкен үлес қосып отыруы керек. «Ана» деген ардақты атқа ие болған келіншектер, ақ жаулықты әжелеріміздің атына кір келтірмей денсаулықтарына немқұрайлы қарамауы тиіс. Ана денсаулығының мықтылығы, елімізге дені сау, мықты ұрпақ әкелері белгілі. «Дені саудың – жаны сау». Ана – шаңырақ шуағы, отбасының бақыты мен берекесі. Сондықтан кесел мен кесірден ұлтымыз аман болсын.
Айдар САЙЛАУОВ
