Дәстүрлі педагогикалық оқу

М.Мәметованың 100 жас, М.Мәметова атындағы педагогикалық жоғары колледжінің 90 жылдық мерейтойына орайластыра 2022 жылдың сәуір айында киелі шаңырақтың мен облыстық оқу орталығымен бірлесіп, алаш қайраткері Мағжан Жұмабаевқа арнап «М.Жұмабаев – тәлім-тәрбие ғылымының негізін қалаушы» тақырыбында облыстық дәстүрлі педагогикалық оқу өткізді.

Педагогикалық оқуға жетпіске жуық облыс көлеміндегі техникалық және кәсіптік білім беретін оқу орындарының оқытушылары, орта білім беретін мектеп мұғалімдері, мектепке дейінгі мекеме тәрбиешілері, 9-11 сынып оқушылары және колледж студенттері қатысты. Педагогикалық оқудың мақсаты М.Жұмабаевтың негізгі педагогикалық идеяларын, халық педагогикасының тәлім-тәрбиелік мұралары жөніндегі бағыт-бағдарын зерттеу, ағартушының педагогиканы жан сырының заңдылығын зерттейтін психология ғылымымен байланыстыра қарастырған ойларын ашып көрсету, мектеп оқушылары мен студенттердің тақырып аясында ғылыми ізденушілік-зерттеушілік құзыреттіліктерін дамыту.

Облыстық педагогикалық оқудың кіріспе сөзін колледж директоры, педагогика ғылымдарының магистрі Жақсыгүл Тоғанова алып, М.Жұмабаев жас ұрпақты тәрбиелеудің ғылыми негізін қалаған қазақ даласындағы зиялы қайраткердің бірегейі, ол кісінің педагогикалық қызметі мен шығармашылығына арналған колледжде «Бастауыш білім берудің педагогикасы мен әдістемесі» бөлімінің ұйымдастыруымен жыл сайын педагогикалық оқу дәстүрлі түрде ұйымдастырылып отыратындығын айтып өтті. Биылғы оқу жылында ұйымдастырылып отырған шара колледждің қос мерейтойымен орайластырылған V дәстүрлі педагогикалық оқу екендігін тілге тиек етіп, қатысушыларға ғылыми іздену жұмыстарына сәттілік тіледі.

Қос мерейтойға арналған педагогикалық оқудың пленарлық отырысында облыстық оқу орталығының техникалық және кәсіптік білім беру бөлімінін әдіскері Жанат Бексеитова, Ә.Тыныбаев атындағы №11 мектеп-лицейінің қазақ тілі мен әдебиеті пәнінің тәжірибелі мұғалімі Жанат Басықараева, колледж әдіскері Мөлдір Сахиева, игі іс-шараны жылда жоспарлы түрде өтуіне мұрындық болып жүрген «Бастауыш білім берудің педагогикасы мен әдістемесі» бөлімінің бөлім меңгерушісі Жанат Маханова өздерінің ізденіс жұмыстарымен бөлісіп, тақырыпты бүгінгі күннің білім беру саласындағы өзекті мәселелерімен байланыстырды.

Дәстүрлі педагогикалық оқудың пленарлық отырысы М.Жұмабаевтың педагогикалық мұрасын зерделеуге және қазіргі заманғы білім беру жүйесінде оның идеяларын жүзеге асыруға арналған төрт секциялық отырыспен жалғасты.

Бірінші секция М.Жұмабаевтың қазақ даласында алғашқылардың бірі болып «Педагогика» оқулығының авторы, ғылыми педагогикалық көзқарастары мен қазіргі заман педагогикасымен үйлестірілгендігіне арналып, «М.Жұмабаев педагогикасы – бала жүрегін жараламайтын адамгершілікті педагогика» деп аталып, модератор Меруерт Сактапбергенованың басшылығымен жүргізілді.

Екінші секция ағартушы педагогика мен психология ғылымын байланыстыра қарастырған, жеке адамның жан қуаттарына терең үңілген, алғашқылардың бірі болып, психологиялық ұғымдарға анықтама берген жантанушы ғалым екендігіне арналып, «М.Жұмабаев – психология саласында асқан білімдарлығын танытқан ағартушы» деп аталып, секцияны психология пәнінің оқытушысы Гүлзира Арыстанбекова жүргізді. Зиялы қайраткер бала тәрбиесінде халықтық педагогика тағылымдарын кеңінен пайдалануды насихаттаған.

Оқудың үшінші секциясы «Мағжан Жұмабаев және халық педагогикасы» деп аталып, модератор педагогика пәнінің оқытушысы Гүлжаухар Наубетова ақынның ұлттық тәлім-тәрбиесі жайлы тәжірибе бөлісулеріне жағдай жасады.

Төртінші секция «Мен жастарға сенемін…» деп аталып, модератор Гүлнұр Шалапованың басшылығымен 9-11 сынып оқушылары, колледж студенттерінің ағартушының мұрасы жайлы ғылыми шығармашылық жұмыстарының ой бөлісу алаңына айналды.

Педагогикалық оқудың қорытынды кезеңінде мұғалімдер, тәрбиешілер, оқытушылар ғалымның педагогика, психология, ұлттық тәрбие бағытындағы мұраларының ашылмаған қырларына талдау жүргізіліп, тұжырымдар, ұсыныстар берілді, ұйымдастырушы М.Мәметова атындағы педагогикалық жоғары колледж ұжымына қос мерейтойға орай ізгі ниеттері мен тілектерін білдірді. Педагогикалық оқуға қатысушыларға педагогикалық жоғары колледж ұжымы атынан алғыс айтылып, сертификаттар мен ізденіс жұмыстары жарияланған жинақтар табыс етілді.

Гульзира АРЫСТАНБЕКОВА,

Меруерт САКТАПБЕРГЕНОВА,

М.Мәметова атындағы педагогикалық

жоғары колледжінің оқытушылары

Пікір үстеу

Э-пошта мекенжайыңыз жарияланбайды. Міндетті өрістер * таңбаланған