Екі мыңға жуық оқушыға кәсіби бағдар берілді

«Жол активтерінің ұлттық сапа орталығы» Қызылорда облыстық филиалының мамандары жыл басынан бері аймақ мектептерімен тығыз байланыс орнатып, оқушыларға мамандық таңдауда кәсіби бағдар берді.

Еңбек нарығындағы статитистикаға жүгінсек, бүгінде жол саласында маман тапшы. Жыл сайын республика бойынша 3 мың шақырымнан астам жол салынады. Алайда, жұмыс ауқымы көп болғанымен салада білікті кадрлар жеткіліксіз. Яғни, елімізде жолшы мамандығын даярлауға осы кезге дейін аса мән берілмей келді. Соған сәйкес, қазір жол саласында еңбек етіп жүргендердің дені Кеңес заманынан келе жатқан кадрлар. Алды зейнет жасына жетсе де, орнын басатын маман жоқтың қасы. Қайтпек керек!? Болашақ жолшыларды мектеп қабырғасынан тәрбиелеу керек. Бұл бағытта «Жол активтерінің ұлттық сапа орталығы» екі жылдан бері еліміз бойынша «2000 мектеп» жобасын қолға алып, жастарға мамандық таңдауда кәсіби бағдар беріп келеді. Мәселен, жыл басынан бері орталық қызметкерлері өңірдегі 88 білім ордасын қамтып үлгерген. Мамандар  52 мектептің жоғары сынып оқушыларымен ZOOM платформасы арқылы онлайн конференция өткізіп жолшы болуға шақырса, 36 білім ордасына арнайы барып, жоғары сынып шәкірттерімен жүздесті. Оны үстіне, еліміздегі оқу орындарында техникалық мамандықтарға грант саны әлдеқайда ұлғайып, жол саласы бойынша маман атануға мүмкіндік мол. Тек, жастар соған қызығушылық танытып, еңбек нарығындағы сұранысқа ие мамандықтарды игерсе дейміз.

Марат ИСКАКОВ,

«ЖОЛ АКТИВТЕРІНІҢ ҰЛТТЫҚ

САПА ОРТАЛЫҒЫ» ҚОФ ИНЖИНЕРІ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған