Әлемді ғылым құтқарады

Ғаламның ілгері жылжып дамуына ғылымның тигізер пайдасы мол. Қазіргі адам өміріндегі күнделікті пайдаға жаратып жүрген жетістіктер кезіндегі ғылымға ден қойған ғалымдар еңбектерінің нәтижесі. Ғылымның ойлап табуының басты себептерінің бірі адам мүмкіндіктерін жоғарылату еді. Себебі, тек қана тамақ ішіп, таң атырып, жануарлар сияқты өмірін өткізу ғалымдарға ұнамады. Қиялдары мен үздіксіз жұмыстарының арқасында қажетті нәтижеге жетіп, адам мүмкіндіктерін көбейтіп кетті. Қазақ халқы да ғылымға үлкен мән беру үстінде. Әлемге ықпалды ғылыми жаңалықтармен жүргізу барлық мемлекеттердің мақсаты.

12 сәуір – ғылым қызметкерлерінің күні. Жылда бұл күн атаусыз қалмайды. Бүгінде облыста 500-ге жуық ғылыми қызметкер бар. Айтулы күнге байланысты Қорқыт ата атындағы Қызылорда университетінде «Әлемді ғылым құтқарады» тақырыбында ғылым декадасы басталды. 1-29 сәуір аралығында ғылымды дамытуға байланысты іс-шаралар, халықаралық конференциялар, кездесулер өткізіледі. «500 ғалым» жобасы аясында Мәскеу мемлекеттік университетінен біржылдық тағылымдамадан өттім. Бүгінде ауыл шаруашылығын цифрландыруға байланысты ғылыми жоба дайындалуда. Жобаға қаржылық қолдау болса, алдағы уақытта жүзеге асатын болады,- деді экономика ғылымдарының кандидаты Алмакүл Әбдімомынова.

Ал, Археология және этнография ғылыми орталығының жетекшісі Әзілхан Тәжікеев:

– «Болашақ» бағдарламасы бойынша Германияның Тюбинген университетінен ғылыми тағылымдамадан өттім. Қазіргі уақытта отандық ғылыми мекемелермен қатар шетелдік ғалымдармен де әріптестік орнатылуда. Мәселен, Тюбинген университетімен қатар Германия археология инс­титутының Берлин қаласындағы филиалымен де әріптестік байланысты нығайттық. Сондай-ақ, Батыс Еуропа археологиясы туралы мағлұматтар алып, археология ғылымында жартылыстану ғылымдарының әдіс­терін қолдану, елімізде енді дамып жатқан «ландшафты археология» туралы қажетті ақпараттар алдым. Алдағы уақытта ғылыми зерттеу әдістерін өзіміздегі зерттеу жұмыстарында қолданылатын болады. Университет жанындағы «Археология және этнография» орталығының бекітілген жоспарына сәйкес жұмыстар жүргізілмек. Жанкент қалашығындағы археологиялық қазба жұмыстары енді Халықаралық Түркі Академиясының қызметкерлерімен бірлесіп өткізіледі. Одан бөлек, облыстық бюджеттің есебінен Жанкент, Бәбіш Мола, Сығанақ қалашықтарына жылдағыдай дәстүрмен жалғасатын болады. Алдағы жоспарларымыз легі ауқымды, – деді.

Сыр өңірі де ғылым мен білімге көңіл бөлуден кенже қалған емес. Қазіргі таңда еліміздің дамушы мемлекеттер қатарында болу үшін ғылымға ден қою – барлық өңірдің міндеті. Ғылым саласында түрлі еңбектер атқарылу үшін мемлекет тарапынан да қолдау жұмыстары қарастырылған. Тың жаңалықтарды ұсыну арқылы ғылым жолында еңбек ететін мамандар ел мәртебесін көтереді. Ғылым әлемдік прогресстің басты құралы болғандықтан, ғылымды дамыту – кез-келген елдің басты міндеті. Денсаулық сақтауда, коммуникациялық қызметтерде де ғылымның еңбегі орасан зор. Сол себепті ғылым қызметкерлері еліміздің ілгері басып, жаңалықтарымен әлемді таң қалдыру үшін тың жобаларды ұсынады деп сенеміз.

Қазақбай ӘНДЕШҰЛЫ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған