Тәртіптің ең тамаша мектебі – отбасы. Әкемнің айтуынша, адам тәрбиелеу, өзінің туған ұлы мен қызын тәрбиелеу – адамзаттың аса маңызды азаматтық борышы. Ата-анамның отбасындағы қарым-қатынасы – біздер үшін үлгі.
Мен әкеммен мақтанамын! Әкем мен үшін – үлгі, өнеге мектебі. Сабырлы, қарапайым, мейірімді, әулетте сыйлы жанның әріптестеріне де мақтаныш екені айдан анық. Әкем аптаның әр күніне ерекше мән беріп, маған күннің тәртіп кестесін менімен келісе отырып, құрып қойған. Шахмат, тоғызқұмалақ ойнау, ағаштан бұйымдар жасау, сурет салу, сурет шығару, кітап оқу, спорт және ән үйірмесіне, дыбыс жазу студиясына бару, отбасыммен қыдыру, достарыма көңіл бөлу, анама көмектесу – мен атқаратын жұмыстардың бірқатары.
«Өнер, білім, бәрі де, оқуменен табылған»,- деп әкемнің өлеңдетіп кететін әдеті де бар. Әкем қызық, менімен үлкен адамша сөйлеседі. Мен оған қуанамын. «Қолыңнан бәрі келеді» деп, демеп қоятыны да бар. Шынында да, әр қадамыма мақтау айтып, қанаттандырып қоятыны қандай керемет! «Сен білмейсің, неге бүлдірдің, мынауың не?» десе, сағым сынып қалады ғой.
Отбасымда әкенің сөзі, әкенің орны, әкенің жолы деген қағидалар – менің әкеме деген құрметтің бір парасы. Шалқардай болған әкемнің аманшылығын, әжім торлап келе жатқан жүзінен қуаныштың табын көре берсем екен деп тілеймін. Әкем мектептің өміріне кең көлемде араласып, кез келген шақырылған іс-шара мен жиналыстарға да уақыт таба алады. Кейде әкеме қарап, риза боламын. Не деген кең кісі?! Құдды бір қойма сияқты. Қызметі де бар, уақыты да бар, қонаққа да уақыт тауып, анаммен жарасып кетіп бара жатқаны. Сонымен қатар, бата қайтаруда, кішілерге ақыл-кеңесін беруде, үлкендерге қамқорлық жасауда әкем орнықты әрекетімен көрінеді. Ағайын-туыс әкемді іздеп, қолпаштап, арқа сүйеп жүретіндігі әр кез байқалады.
Түйіндей келе, жақсы мінез-құлық пен ақыл екеуі біріккенде, адамшылық қасиеттер пайда болады ғой. Менің әкемнің бойында осы екі қасиет те бар. Менің әкем осындай! Мен әкемді мақтан тұтамын!
Айбол БАУЫРЖАНҰЛЫ,
№7 мектеп-лицейінің оқушысы
