Астанада оқушылар арасында биология пәнінен халықаралық олимпиада өз мәресіне жетті. Бірінші рет IBO осыдан 34 жыл бұрын алты елдің қатысуымен өткен болатын.
Биылғы жылы Қазақстанда өткен олимпиадаға 81 мемлекеттен командалар жиналды. Олимпиаданың ресми жабылу салтанатында Оқу-ағарту министрі Ғани Бейсембаев барлық қатысушыларға және халықаралық ұйымдастыру комитетіне алғысын білдірді. Ол олимпиаданың жалпы білім саласының дамуы үшін қаншалықты маңызды екенін атап өтті.
«IBO-2024 – білімнің бәсекелестік алаңы ғана емес, ол ғылым саласында мемлекеттердің достығы мен ынтымақтастығын тереңдетуге ықпал ететін халықаралық маңызды шара. Қазақстанда өткізген әрбір күн сіздерге жарқын естелік сыйлап, алдағы уақытта ғылымның жаңа биік белестерін бағындыруға шабыт береді деп ойлаймын. Болашақта сіздер орасан зор ғылыми жаңалықтар ашып, әлемнің ұлы ғалымдарының даңқты жолын жалғастырасыздар деп сенемін»,- деді Ғани Бейсембаев.
Олимпиада қорытындысы бойынша халықаралық комитеттің инспекторлары мен әділ қазылар IBO-2024 олимпиадасының ұйымдастырылуына жоғары баға берді, сондай-ақ қазақстандық жас ғалымдар әзірлеген олимпиада тапсырмаларының өзектілігі мен өзгешелігін атап көрсетті.
Бұл олимпиаданы өткізу үшін тынбай еңбек еткен ұйымдастыру комитеті үшін жоғары марапат болды. Еліміздің құрамасы 100% медаль көрсеткішіне қол жеткізіп, төрт қола медальды қанжығалады.
Сыр өңірінен қатысқан Әмина Қызылорда облысы №10 дарынды балаларға арналған «Білім-инновация» лицей-интернатының 11 сынып оқушысы Әмина Тынырбай командаластарымен толық құрамда қола медальді иемденді.
International Biology Olympiad — оқушылар арасындағы ең мықты 7 олимпиаданың бірі. Олимпиада күндері Қазақстан 81 елден келген 305 жас биолог пен 275 ғалымның тәжірибе алмасу алаңына айналды. Бір апта бойы қатысушылар биохимия, молекулярлық биология, биоинформатика және жан-жануарлардың анатомиясы мен физиологиясы бойынша екі теориялық, төрт практикалық турда сынға түсті.
Б.Бек
