Білім туралы қазіргі таңда толғанатын мәселелер жетіп артылады. Білім сапасы, балалардың қызығушылығы, ұстаздың білім беру жүйесіндегі тың идеялары бәрі де өзекті тақырып. Мектеп табалдырығынан бастау алған білім, жоғары оқу орындарында жалғасын табады. Оқушылардың барлығы тек бір ғана мамандықты таңдап, бір білім саласына ғана байланбайды. Оқушылардың икеміне қарай, қызығушылығына байланысты ата-ананың, мұғалімдерінің бағыт көрсетуімен өз жолын таңдайды. Бұл ретте мектептегі әр пәннің өзінше білім беріп, балаларды қызықтырып сабақ үйретуі маңызды рөл атқарады.
Мектептің білім беру жүйесінде жас ұрпақты жан-жақты дамыту мен тәрбиелеуде, олардың жалпы мәдениетін қалыптастыруда тұлғаны шығармашылыққа тәрбиелеуде, табиғат пен қоғам алдындағы жауапкершілігін сезінуде, Жер бетінде тіршілікті сақтауда география пәнінің ықпалы зор. География ғылымдарының жетістіктері мен қоршаған ортада болып жатқан өзгерістерді ескере келе мектепке беріліп отырған әлеуметтік тапсырыс жас ұрпақтың географиялық сауаттылығы мен географиялық мәдениетін көтеруге бағытталған.
География пәнін тереңдетіп оқытудағы «геотехнология» пилоттық жобасы аясында №282 мектеп-лицей базасында семинар өтті. Облыстық оқу орталығының (әдістмелік кабинет) директоры Сырым Асқаров және Қызылорда қаласы бойынша білім бөлімінің басшысы Ерлан Боданов, Қорқыт ата атындағы Қызылорда университетінің математика ғылымдарының кандидаты Д.Джанмолдаев және қала мектептерінің басшылары семинарға қатысты.
«Заманауи балаға – заманауи көзқарас», «Мұғалім тұлғасының кәсіби дамуы» тақырыбында шеберлік сабағын университет ғалымдары, мектеп мұғалімдері семинар барысында өткізді. Сондай-ақ, гео-бейінді өлшемдер зертханасы ашылды. Бұл зертханада оқушылар сабақ барысында география пәніне арналған құрылғылармен жұмыс жасайтын болады.
Қалалық мектептердің деңгейі күн өткен сайын артып, дамып келеді. Жасалып жатқан жобалардың барлығы да оқушылардың білім саласында жетістікке жетуіне үлкен жол салып береді. География пәніне қызығушылығы оянған әрбір шәкірт болашақта тың мәселелерді көтеріп, өзіндік жаңалық алып келетіндеріне сенім мол. Қалалық білім бөлімінің қолдауы арқылы мектептердің көптеген жұмыстары шешіліп жүр. Ерлан Теңізбайұлының қала мектептерінің барлығын өз көзімен көріп, бақылауының арқасында бірқатар мәселелер шешімін тапты. Алдағы уақытта білім беру бағыты мектептерде жаңғырып сала бермек.
Қ.ӘНДЕШҰЛЫ
