Еліміздің халық саны жылдан жылға өсіп, мемлекетіміздің демографиялық деңгейі артып келеді. Адам саны артқан сайын қажетті дүниелерге де сұраныс көп болары белгілі. Қазіргі таңда еліміздің басты мәселесі тұрғын үйлердің машақаты. Пәленбай жыл кезекке тұрып, «баспанама қол жеткіземін» деген адамдардың қарасы елімізде жыл сайын көбеюде. Қарапайым халық табанын тоздырып, жалдамалы пәтерден көшіп-қонуды әдетке айналдырып алған секілді. Барлық адам жеке шаңырағының болғанын қалайды, бірақ қалтасы көтермеу, жұмыссыздық деңгейінің төмендігі, мардымсыз жалақының әуресі, бұл үй алу армандарын уақытша тоқтатып жатады. Тиыннан теңге құрап, маңдай терімен тапқан қаржысын баспананың алғашқы жарнасына құйып, үйлі болып жатқан адамдардың еңбегі бір төбе. Жыл сайын соғылып жатқан тұрғын үйлердің көбісі нағыз қажет адамдарға жетпей, қалтасы қалың шенділерге қос-қостап сатылып жатқанын да жасыра алмаймыз. Қос-қос пәтері бар тұрғын үй иелері жалға беру арқылы қалтасын қампитып отырғаны тағы бар.
Бүгінде түйінді мәселелерді тарқату үшін билік тарапынан жиындар өткізіп жүр. Қараша халыққа пәтер керек және күнделікті тұтынатын азық-түлік тауарларының бағасының жоғары болмауы қажет. Осы екі мәселе Үкіметті де ойландырса керек, 7 жыл ішінде 111 млн. шаршы метр тұрғын үй салу мәселесі ҚР Премьер-министрі Әлихан Смайыловтың төрағалығымен өткен ҚР Президентінің сайлауалды бағдарламасының 44-тармағының іске асырылуы жөніндегі республикалық штаб отырысында қаралды. Әлеуметтік маңызы бар азық-түлік тауарларының бағасын реттеу күн тәртібіндегі екінші мәселе болып қаралды. Саланың жауапты басшылары баяндама жасап, тиісті тапсырма алды.
Сыр өңірінің тұрғындары баспаналы болуы үшін жергілікті әкімдік өңірдегі тұрғын үй мәселелері қараған жиын өткізді. Облыс әкімі Нұрлыбек Нәлібаев өткізген мәжілісте берілген тапсырмалардың өңірде орындалуы талқыланды. Қаржыландырудың барлық көздерінен 2023-2029 жылдары 5041,5 мың шаршы метр тұрғын үй салу жоспарланғанын аймақ басшысы айтып өтті.
— Биылғы төрт айда аймақта 174,3 мың шаршы метр тұрғын үй пайдалануға берілген. Бұл өткен жылдың осы кезеңімен салыстырғанда 102,4%-ға тең. «Қуатты өңірлер – ел дамуының драйвері» ұлттық жобасы аясында биыл қаржыландырудың барлық көздерінен 692,3 мың шаршы метр тұрғын үйді пайдалануға беру жоспарланған. Бұл жоспар жыл аяғына дейін толығымен орындалуы керек,- деді облыс әкімі.
Бюджет қаражатына салынатын көпқабатты тұрғын үйлердің сапалы салынуы, оның уақытылы аяқталуы бақылауда болуы тиіс. Халықтың әлеуметтік осал топтарына сатып алынуы жоспарланған 1000 пәтер мерзімінде халықтың игілігіне берілуі керек.
Қымбатшылық еліміздің ғана емес, басқа да мемлекеттердің басты проблемасы болып отыр. Кеше алған затының бүгін санаулы тиынға қымбаттағанын көрген жұрт қапаланып жатады. Бір айлық жалақысын азық-түлікке ғана жұмсайтын отбасылар бар десек сенбеуіңіз мүмкін. Тіпті, «Каспий ред» бөліп төлеу қосымшасы арқылы үйіне азық-түлік алып жатқан жандарды көргенде ішіміз қынжылып жатады. Әрине, басын ел бюджетіне тығып, қарашаның күн көрісіне алатын еңбекақыларынан хабарсыз кей басшыларға, сауда орталықтарындағы баға өте арзан болып көрінетін шығар. Осындай қоғамдағы қотыр шешімдердің себебінен ашынған халық билікке үміт артқысы келмейді. Екі сиырдың сүтін сатқанның өзінде тапқан ақшаны отбасыдағы екі адамнының азық-түлігіне жеткізу қиынның қиыны. Сол себепті де әр нәрсені сылтауратып, бағаны оңды-солды көтеретін сырттан тамақ жегіш басшылар үйдің тамағын жейтін халықтың жағдайын ойлауға міндетті.
Әлбетте, аталған проблеманы көтеріп, шешуге талпынып жүрген тұлғалар жетерлік. Бұл тақырып облысымызда көтерілмей, тұрғындардың қалтасына ауырлық салмауы үшін жергілікті әкімдік түрлі жұмыстар атқарып жүр. Облыс әкімінің қатысуымен жиын өткізіліп, мәселе қаралып, талқыланды.
Сәуір айында облыстағы инфляция деңгейі 103,7 пайызды құрағаны, ал бұл көрсеткіш республикада 104,2 пайыз екені күн тәртібіндегі екінші мәселеде талқыланды. Осы себепті, сауда орындарындағы әлеуметтік маңызы бар азық-түлік тауарлары бағасының сауда үстемесінің сақталуына мониторинг орнату, бақылау жұмыстары Қызылорда облысы бойынша сауда және тұтынушылардың құқықтарын қорғау департаментіне жүктелді. Шекті сауда үстемесінің қатаң сақталуы туралы кәсіпкерлер арасында түсіндірме жұмыстарын Қызылорда қаласы мен аудан әкімдіктері жүргізуі керек. Апта сайын ауыл шаруашылығы өнімдерінің жәрмеңкесін ұйымдастыру да міндеттелді. Маусымаралық кезеңде тиімді тауар интервенцияларын жүргізу үшін тұрақтандыру қорының жүктемесін, облыстық ауыл шаруашылығы және жер қатынастары басқармасы «Байқоңыр» әлеуметтік-кәсіпкерлік корпорациясымен бірлесіп қамтамасыз етуі қажет. Өзге өңірлердегі сатып алушылармен күріш өңдеуші кәсіпорындар делдалсыз келісім жасағаны маңызды. Осыған байланысты тиісті министрліктермен бірлесіп, өңірлердің әлеуметтік-корпорациялары, бизнес өкілдерінің қатысуымен бизнес-кездесу ұйымдастыру мүмкіндіктерін қарастыру тапсырылды.
Халықтың талап-тілегі нормадан ешқашан асқан емес. Мемлекетіміздің басты міндеті ел халқының әл-ауқатын көтеру. Тұрғын үйлермен қамтамасыз ету, бағаның тұрақты болуы секілді мәселелерді шешу – мемлекетіміздің негізгі жұмыстары. Сыр халқының осындай қиындықтарға тап болмауы үшін аймағымызда атқарылып жатқан жұмыстар ауыз толтырып айтуға тұрарлық. Облыс әкімінің тікелей араласуымен облыс орталығында, аудан, ауылдық округтердің мәселелері де қаралып, шешімін тауып жүргені көңілге сенім ұялатады.
Қ.ӨТЕБАЙ
