Білім беру сапасын жоғарылату жағдайында қарастырылған барлық міндеттер мұғалімдерді әдістемелік қолдауды жетілдіру, шығармашылықпен жұмыс істеуіне қолайлы жағдай туғызуды қажет етеді. Осы ретте, Қызылорда облысының білім беру саласы бойынша оқушылардың білім сапасын жоғарылату және мұғалімдерді қолдау мақсатында бірқатар шаралар атқарылып келеді.
Қашықтықтан оқыту және тәжірибе алмасу үшін түрлі цифрлық платформалар мен ресурстар ұсынылды. «Онлайн-мектеп» жобасы бойынша облыстағы инновациялық мектептер тәжірибесінің негізінде 365 бейнесабақтар әзірленіп, басқарманың бейнесабақтар каналына жүктелді. Қызылорда облысының білім басқармасы республикалық деңгейде жүргізу ұсынылған «Оқуға құштар мектеп», «Мектеп парламенті» «Дебаттық қозғалыс», «Мектеп театры» және бірқатар бастамашыл жобаларды жүзеге асырып келеді. Білім беру ұйымдарын түрлі бағыттар бойынша «тірек білім беру ұйымдары» ретінде қалыптастырып, тәжірибелерін облыс көлемінде нысаналы таратуды қолға алды.
«Оқуға құштар мектеп – Оқуға құштар ұлт» жобасы аясында «Балалар кітапханасы» облыстық жобасының маңызы зор. Осыған сәйкес, мектеп оқушыларының оқу сауаттылығын жоғарылату және оқушылардың кітап оқуға деген қызығушылығын арттыру мақсатында 186 мектептің кітапханасы Coworking-орталықтарға бейімделді. Білім беру ұйымдары кітапханаларының қазіргі жағдайына ішінара талдау жасалды. Coworking-орталықтарды мазмұнды іс-шаралармен қамту бағытында Қызылорда қаласындағы Назарбаев зияткерлік мектептерінің және «Білім-Инновация» лицейлерінің атқарылған жұмыстары басшылыққа алынды. Осы орайда, «Үздік кітапхана – Coworking-орталық» және «Үздік кітапханашы» облыстық конкурстары ұйымдастырылып, Қызылорда қаласындағы №2 Абай атындағы үш тілде оқытатын мамандандырылған сыныптары бар мектеп – «Балалар кітапханасы» жобасының «тірек мектебі» болып бекітілді. Үлгілі кітапхана ұйымдастыру, барлық кітапханашыларға тәжірибе тарату, Coworking-орталық, электронды оқу залы, оқу сауаттылығын дамыту мақсатында телестудия жабдықталды. Үш тілде «Абайтану» курсы бойынша бейнесабақтар түсірілуде. Кітапхананың материалдық-техникалық жабдықталуы жүргізіліп, автоматтандырылған жүйесі әзірленуде. Сонымен қатар, қазақ, орыс, ағылшын тілдері бойынша үлгі ретінде пәндік кабинеттер жасақталды.
Қызылорда қаласындағы «Алтын ұя» бөбекжай бақшасы цифрлық білім беруге арналған «ІТ-балабақша» пилоттық жобасын ендіруді бастады. Бөбекжай бақшасы цифрлық білім беру ресурстары бар 18 «Bilimbook» панельдерімен, STEAM-кабинетімен жабдықталды. Жоғары жылдамдықты интернет қызметіне ауыстырылды. Барлық тәрбиешілер біліктілік арттырудан өтіп, ІТ-құзіреттілік бағытында тәжірибе алмасты. Атқарылған жұмыстар нәтижесінде ”BILIMKIDS» платформасы ұйымдастырған «Үздік жаңашыл тәрбиеші» байқауының қорытындысымен республика бойынша мазмұнды 10 жұмыс қатарына «Алтын ұя» бөбекжай бақшасының 4 жұмысы еніп, тәрбиешілер марапатталды. Сонымен қатар, «Алтын ұя» бөбекжай бақшасының тәжірибесі 2021 жылғы республикалық тамыз кеңесінің пленарлық мәжілісінде көпшілік назарына ұсынылды.
С.Толыбеков атындағы № 3 ІТ-мектеп-лицейі «ІТ-мектеп (Бағдарламалау мектебі)» пилоттық жобасын ендірді. Төменгі сынып оқушыларынан бастап барлық пәндерде компьютерлік технологиялар мен цифрлық білім беру ресурстарының көмегімен оқыту жүзеге асырылуда. Информатика пәнін және 5-11 сыныптар аралығында «Бағдарламалау негіздері» бағытында тереңдетіп оқытылуда. Ал, Ә.Мүсілімов атындағы №101 мектеп-лицей «Жасыл мектеп» пилоттық жобасы бойынша «тірек мектебі» болып бекітілген. Мектепте биология және жаратылыстану бағытындағы пәндер тереңдетіліп оқытылады. Оқушылардың белсенді қатысуымен білім берудің экологиялық бағыты саласында тиімді білім беру моделін енгізу максатында жылыжай өндірісі, қалдықтарды өңдеу, экологиялық білім беруді ақпараттық-насихат және т.б. бағыттар бойынша жұмыс жүргізіліп, ұйымдастырылған республикалық конференцияға отандық және шет мемлекеттердің ғалымдары қатысты. Сайып келгенде, білім ордалары жаңашылдыққа бейімделуде алда келеді. Мәселен, Б.Момынбаев атындағы №278 ІТ-мектеп-лицейі «Кәсіпкерлік мектебі» пилоттық жобасы бойынша «тірек мектебі» болып танылды. Төменгі сыныптардан бастап көркем еңбек бағытындағы негізгі пәндерге кәсіпкерлік негіздері бағытындағы курстар қосымша оқытылады. Жоба аясында оқу-өндірістік комбинат ашылып, 3 мамандық (тігінші, жүргізуші, азпазшы) бойынша қысқа мерзімді курстар басталды. Мектеп бітіруші түлектер белгілі бағыты бойынша куәлік те алуда. Алдағы уақытта ІТ-кәсіпкерлік бағытындағы екі мамандық бойынша қосымша курс ашылатын болады. Сонымен қатар, №261 орта мектеп «Мектеп парламенті» жобасы бойынша «тірек мектебі» болып нақтыланды. Мектеп тәрбие саласының «Әкелер мектебі», «Аналар мектебі», «Мектеп парламенті», «Балалар ұйымдары», ұлттық өнер және «Мектеп театры» бағыттарының бір мектеп базасында үйлесімді жұмысын қалыптастыру бағытында тәжірибесі таратылып келеді.
Негізінен жаңа жабдықпен жасақталған мектеп балаға берілетін білім қуатын күшейте түспек. Атап айтсақ, №264 мектеп-лицейі «Мектеп обсерваториясы» жобасы бойынша «тірек мектебі» болып бекітілген. Негізгі бағыты – физика және астрономия бағытында тереңдетіп оқыту. Мектепте қазіргі уақытта обсерватория, жаңа үлгідегі физика кабинеті, телестудия, биология-жаратылыстану зертханалары жабдықталып, жұмыс жасауда. Сондай-ақ. «Цифрлық түзету» пилоттық жобасы ендірілетін білім беру ұйымы ретінде №5 көру қабілеті бұзылған балалардың арнайы (түзету) мектеп-интернаты бекітілген. Мектеп-интернат цифрлық білім беру ресурстарымен, робототехника жабдықтарымен, жылыжай, компьютерлік сынып және т.б. құрылғыларымен жабдықталды. Педагог қызметкерлерді әдістемелік қолдау мақсатында арнайы курстарға жіберілді. Жалпы алғанда, көрсетілген жобалар белгілі бір негізгі пәнді тереңдетіп оқытуға бағытталып отыр. Негізгі пәнді тереңдетіп оқытумен қатар, осы мектептер сол пән бойынша облыстық пән бірлестіктерінің (шығармашыл мұғалімдер қауымдастығының) тәжірибелік-сынақ алаңы ретінде қалыптасты. Кез-келген тәжірибелік жұмыстарды, зерттеу жұмыстарын осы мектептер базасында университет ғалымдарымен бірлесіп өткізу мүмкіндігі жасалған. Аталған жобалар бір реттік іс-шаралармен ғана шектелмей, оқу жоспарлары мен бағдарламаларының мазмұны толықтырылуда. Қажетті мамандардың біліктілігі арттырылып, жыл көлемінде дамыту бағытында тұрақты сүйемелдеу жүргізіліп келеді. Осы тәжірибелердің негізінде әрбір бағыт бойынша аудандардағы білім беру ұйымдарына аталған жобалар кезең-кезеңімен ендіріледі.
Алдағы уақытта «Жасыл балабақша» жобасы, «Геотехнология» жобасы, «Химия-биологиялық талдау зертханасы» жобасы және т.б. жобалар кезең-кезеңімен жүзеге асырылатын болады. «Тірек білім беру ұйымы» ретінде қалыптасқан мектептер әрбір пәнді оқытудағы жаңашыл тәжірибелерді тарататын, сол пәннің мұғалімдеріне ресурстық орталық ретінде жұмыс жасайтын, ғылыми-әдістемелік қолдау көрсететін мектептер желісіне айналмақ.
Сырым Асқаров,
оқу орталығының директоры
